Matteu 8 - 4 Evangiles en Corse

Ghjesù guarisce un leprosu

¹ Ghjesù era falatu da a muntagna è eranu una mansa di ghjente chì andavanu cun ellu.

² Ed eccuti ch'ellu affacca un liparosu, è li si indinochja davanti dicendu: «o Signore, s'è tù voli, mi poi purificà.»

³ Ghjesù stende a manu, u tocca è dice: iè chì vogliu, purificatu ch'è tù sia è quellu subitu subitu hè purificatu da a lepra

⁴ Tandu Ghjesù li dice: «Fà casu d' ùn parlà ne à nimu, ma vai è fà ti vede da u prete è presenta li u donu ch'ellu hà dettu Musè, ch'ellu ghjovi di prova à tutti.»

Ghjesù guarisce u servu di un centurione di l'armata rumana

⁵ Entrutu Ghjesù in Cafarnau, li s'affacca un centurione chì li chede aiutu, è dice:

⁶ «O Signore, ci aghju u mo servu stracquatu in lettu, hè paralizatu è strazia chì ùn ne pò più.»

⁷ Ghjesù li dice: «Aghju da vene à guarì lu.»

⁸ U centurione risponde è dice: «O Signore, ùn sò degnu ch'è tù entri in casa mea, ma dì solu una parolla è u mo servu hà da esse guaritu.

⁹ Chì sò ancu eu un omu sottumessu à un putere, è sottu à mè aghju i suldati. À unu li dicu: “Vai!” è ellu và. À l'altru: “Veni!” è ellu vene. À u mo servu li dicu: “Fà cusì!” è ellu a face.»

¹⁰ Intesu isse parolle, Ghjesù si maraviglia è dice à l'altri chì eranu cun ellu: «A vi dicu da veru: tamanta fede ùn l'aghju trova indè nimu d'Israele.

¹¹ È vi dicu chì parechji anu da vene da levante è punente è ch'elli s'anu da calà à tavulinu cù Abraamu, cù Isaccu è cù Ghjacobbu in u regnu di i celi.

¹² Invece quelli chì devianu stà in u regnu seranu lampati fora in a bughjura; è ci seranu i pienti è i chirchenni.»

¹³ È po Ghjesù disse à u centurione: «Vai, ch'ella ti sia fatta secondu a to fede.» È subitu tandu u servu fù guaritu.

Ghjesù guarisce parechje persone

¹⁴ Dopu Ghjesù entre in casa ind'è Petru. Vede a socera di quellu stracquata cù a freba.

¹⁵ Tocca a so manu è a freba sparisce; tandu a donna s'arrizza è mette à serve lu.

¹⁶ Toccu sera, li purtonu parechje persone indemuniate. Cù a so parolla mandò via i spiriti è guarì tutti i malati.

¹⁷ Cusì fù rializata a parolla di Diu detta da u prufetu Isaia: si hà pigliatu à dossu tutte e nostre debulezze è s'hà messu à collu tutti i nostri mali .

Ghjesù risponde à quelli chì u vulianu seguità

¹⁸ Videndu si una grande folla in giru, Ghjesù cumandò d'andà da culandi à u lavu.

¹⁹ S'avvicina un maestru di a Lege è dice à Ghjesù: «O Maestru, aghju da vene cù tè duv'è voglia ch'è tù vachi.»

²⁰ È Ghjesù dice: «E volpe anu e so tane è l'acelli di u celu anu i so nidi, ma u Figliolu di l'Omu ùn hà locu da ripone u capu.»

²¹ Un antru di i discepuli li disse: «O Sgiò Maestru, lascia ch'È vachi prima à interrà à babbu.»

²² Ghjesù li dice: «Veni cù mè è lascia i morti interrà i morti.»

Ghjesù calma a timpesta

²³ S'era imbarcatu cù i so discepuli chì andavanu cun ellu.

²⁴ Ed eccu ch'ellu ci fù in mare tamanta timpesta è a barca fù fasciata da i marosuli, ma ellu durmia.

²⁵ L'altri s'avvicinanu, u discetanu è dicenu: «O Signore, salva ci, chì simu persi.»

²⁶ Li dice: «Chì hè sta paura, o ghjente di poca fede?» Tandu s'arrizza, minaccia i venti è u mare, è vene a calma tamanta.

²⁷ Tandu, l'omi si ne maraviglianu è dicenu: «Chì omu serà questu, chì ancu i venti è u mare u stanu à sente?»

Ghjesù guarisce dui indemuniati in Gadarà

²⁸ Ghjuntu ch'ellu fù da mare in là, in i lochi di i Gadaresi, l'affacconu dui indemuniati isciuti da e tombe; da tantu ch'elli eranu periculosi, nimu pudia più passà pè quella strada.

²⁹ Ed eccu chì elli mettenu à mughjà: «Chì ci hè, da noi à tè, o figliolu di Diu, serai ghjuntu à strazià ci prima di l'ora?»

³⁰ È ci era, luntanu, una bella banda di porchi chì pascianu.

³¹ I demonii pricuravanu à Ghjesù: «S'è tù ci scacci, metti ci ind'è issa banda di i porchi.»

³² Ghjesù li dice: «Andate.» Tandu sortenu da l'omi è entrenu in i porchi. Ed eccu a banda sana chì si lampa in mare da l'elpa, è morenu tutti ind'è l'acqua.

³³ I purcaghji eranu scappati è andati à fà sapè tuttu pè a cità, è cuntetinu ancu quella di l'indemuniati.

³⁴ Ed eccu chì a cità sana esce à truvà à Ghjesù; è vistu lu, li dumandanu d'esce da i so cunfini.