Matteu 7 - 4 Evangiles en Corse

A paglia è u cantellu

¹ «Ùn ghjudicate, di manera à ùn esse ghjudicati;

² chì com'è vo ghjudicate, sereti ghjudicati, è com'è vo misurate, serà misuratu per voi.

³ Perchè feghji a paglia chì hè in l'ochju di u to fratellu, mentre chì ùn t'avvedi d'avè un cantellu in u toiu?

⁴ O allora comu poi dì à u to fratellu: aspetta, ch'e ti cacci sta paglia da l'ochju quandu chì, in lu toiu, ci hè un cantellu?

⁵ O furdanò, caccia prima u cantellu da u to ochju, è tandu ci viderai per caccià a paglia da l'ochju di u to fratellu!

⁶ Ùn date ciò chì hè santu à i cani, ùn lampate e perule à i porci, di paura ch'elli e calceghinu, è chjimpà vi si s'elli si voltanu.»

Cherite, circate, pichjate à a porta

⁷ «Dumandate, è vi serà datu, circate, è truverate, pichjate, è vi serà apertu;

⁸ chì à chì dumanda riceve, è à chì cerca trova, è à chì pichja, li serà apertu.

⁹ O quale trà di voi, sì u figliolu li dumanda u pane, li derà una petra?

¹⁰ O s'ellu dumanda u pesciu li derà un serpu?

¹¹ Dunque sì voi, chì site gattivi, sapete dà belli rigali à i vostri figlioli, quantu più u vostru Babbu chì hè in i celi ne derà robba bella à quelli chì li dumandaranu.»

Comu fà à l'altri

¹² «Dunque, tuttu ciò chè vo vulerete chì l'altri fessinu per voi, fate la voi stessu per elli. Chì què hè a Lege è i Prufeti.»

E duie porte

¹³ «Entrate per a porta stretta, chì largu hè u passagiu è bella a strada chì portanu à a perdita, è sò numarosi quelli chì c'entrinu.

¹⁴ Ma strintu hè u passagiu è ristrettu u viottulu chì portanu à a vita, è quelli chì u trovanu sò pochi!»

Si cunnosci l'arburu à i frutti

¹⁵ «Guardate vi da i falsi prufeti, chì veninu sin'à voi vistuti da pecure allora chì, in sottu, sò lupi rapaci.

¹⁶ I ricunoscereti à i so frutti. Soca si pò coglie uva annantu à i tanghi o fighe annantu à i cardi?

¹⁷ Cusì ogni arburu bonu face i frutti belli, allora chì l'arburu fragicu faci i frutti gattivi.

¹⁸ Un arburu bonu ùn pò fà frutti gattivi nè una arburu fragicu frutti belli.

¹⁹ Ogni arburu chì ùn face micca un bellu fruttu, si taglia è si lampa in u focu.

²⁰ Di fatti, i cunoscereti à i so frutti.»

Dì è fà

²¹ «A chì mi dice “O Signore, O Signore” ùn entrerà sicuru in lu regnu di i celi, ma à chì face a voluntà di u mo Babbu chì hè in i celi, quellu, sì.

²² Parechji mi diceranu quellu ghjornu: “O Signore, O Signore, ùn hè in nome toiu chè no avemu prufetizatu, è lampatu fora i demonii, è fattu miraculi assai?”

²³ È tandu li diceraghju: “Ùn v'aghju mai cunisciutu; scantate vi da mè, voi chì fate l'iniquità!”»

Parabula di e duie case

²⁴ «Dunque, à chì sente ste parolle, e meie, è e mette in pratica, serà cum'è un omu astutu, chì hà custruitu a so casa annantu u scogliu;

²⁵ è hè falata a piossa, è sò vinute e piene, è anu suffiatu i venti, è si sò lampati contru à quella casa, è ùn si n'hè falata chì era stata fatta annantu à u scogliu.

²⁶ È à chì sente ste parole, e meie, è ùn e mette in pratica, serà cum'è un omu senza sennu, chì hà custruitu a so casa annantu à a rena;

²⁷ è hè falata a piossa, è sò vinute e piene, è anu suffiatu i venti, è si sò lampati contru à quella casa, è a casa si ne hè falata, è a so ruina fù tamanta!»

L'autorità di Ghjesù

²⁸ «È, quandu Ghjesù ebbe compiu di discorre, e folle eranu cumosse da u so insignamentu

²⁹ perchè ellu l'insegnava cum'è unu chì hà una autorità è micca com'elli fecianu i so maestri di a Lege.»