Matteu 5 - 4 Evangiles en Corse

A predica nant'à u monte

¹ Quand'ellu vede tamanta folla, Ghjesù atteppa ver di u monte.

² Si cala cù i so discepuli à vicinu, è mette à insignà li, è dice:

I veri beati

³ «Beatu à chì hè povaru è a sà, chì l'hà da tuccà u regnu di i celi.

⁴ Beatu à chì pienghje, chì hà da esse cunsulatu.

⁵ Beatu à chì hè bravu, chì l'hà da vene a terra prumessa.

⁶ Beatu à chì hè in brama di ghjustizia, chì hà da esse suddisfattu.

⁷ Beatu à chì hà pietà di l'altri, chì pietà li si derà!

⁸ Beatu à chì hè puruin u so core, chì hà da vede à Diu!

⁹ Beatu hà chì porta a pace in giru, chì Diu l'hà da vulè pè figliolu!

¹⁰ Beatu à chì hè perseguitatu per causa di a ghjustizia, chì l'hà da tuccà u regnu di i celi!

¹¹ Site beati s'elli v'insultanu è vi perseguiteghjanu, è sì per causa mea dicenu di voi u male è u falsu.

¹² Ralegrate vi puru, chì vi tocca tamantu premiu in celu; dinò cusì funu perseguitati prima di voi i prufeti.»

U sale è u lume

¹³ «U sale di a terra site voi. Ma s'ellu vene lazzu u sale, cun chè s'hà da fà turnà salitu? Ùn vale più nunda, hè da ghittà è tutt'ognunu u calpeghja.

¹⁴ A luce di u mondu site voi. Ùn hà da esse piatta a cità inalpellata.

¹⁵ Quand'omu accende una lumera, ùn s'hà da assuffucà la, ma s'hà da mette bella in altu, da schjarì à tutti quelli di casa.

¹⁶ Cusì ch'ellu schjarischi u vostru u lume in pettu à l'omi, da ch'elli vechinu u bè chè vo fate, è fà ne e lode à u vostru babbu chì stà in celu.»

Ghjesù è a lege

¹⁷ «Ch'è vo ùn abbiate da crede ch'o' sia ghjuntu à scioglie a lege o i Prufeti: ùn sò ghjuntu à scioglie, ma à compie l'opara.

¹⁸ In verità a vi dicu: fin ch'elli duranu celu è terra, ùn si cambierà una virgula di a lege, è cusì fin chì tuttu sia compiu.

¹⁹ Tandu quellu chì scioglie unu solu, puru u più chjucu, d'issi cumandi, è insegna cusì à l'altri, sarà ellu u più chjucu in u regnu di i celi. Invece quellu chì rispetta a lege e insegna cusì, sarà ellu u più grande in u regnu di i celi.

²⁰ A vi dicu, s'è vo ùn fate a ghjustizia di più chè i scribi è Farusei, mancu ci entrerete in u regnu di i celi.»

Ghjesù è a zerga

²¹ «Avete intesu chì à l'antichi hè stata detta: Ùn tumberai micca. À chì tomba hè da purtà à u ghjudice.

²² Ma eu vi dicu: ognunu à chì si mette in stizza voltu u fratellu hè da esse ghjudicatu; à chì dice à u fratellu: “o rubbaccia!” hè da esse ghjudicatu da u Sinedriu; à chì li dice: “o scemu!” Hè da lampà in u focu eternu.

²³ Cusì s'è tù porti u to rigalu à l'altare, è ti vene in core chì u to fratellu hà qualcosa contr'à tè,

²⁴ lascia puru u to donu davant'à l'altare è parti, fà e paci cù u to fratellu, è dopu, vai è prisenta u to donu.

²⁵ Movi ti è accorda ti cù u to nemicu ind'u mentre ch'è tù sì per istrada cun ellu, prima ch'ellu ti metti in manu à u ghjudice, è u ghjudice mette ti in manu à u guardianu, è chì tù sia lampatu in prigiò.

²⁶ A ti dicu da veru: da quallà ùn ci sorti fin ch'è tù ùn averai pagatu l'ultimu soldu.»

Ghjesù è l'adulteriu

²⁷ «Avete intesu ch'ellu hè statu dettu: Ùn cummetterai micca l'adulteriu

²⁸ Eu a vi dicu, ognunu à chì guarda una donna di brama, hà aghjà cummessu l'adulteriu in u so core.

²⁹ U to ochju drittu s'ellu ti scandalizeghja caccia lu è frumbula lu luntanu, chì ti cunvene à perde un membru solu, è a to persona sana ch'ella ùn sia lampata in u focu eternu.

³⁰ È s'ella ti scandalizeghja a to manu dritta, stradeca la è lampa la luntanu, chì ti cunvene à perde un membru solu, è a to persona sana ch'ella ùn sia lampata in u focu eternu.»

Ghjesù è u ripudiu

³¹ «Hè statu dettu dinò: À chì ripudieghja a moglia, ch'ellu li dia una lettara di ripudiu

³² Ma eu vi dicu: à chì ripudieghja a moglia, for di u casu d'adulteriu, ne face una donna leggera; è à chì si piglia una donna ripudiata, cummette un adulteriu.»

Ghjesù è u ghjuramentu

³³ «Avete dinò intesu chì à l'antichi hè statu dettu: Ùn ghjurerai micca u falsu è i to ghjuramenti, teni li pè u Signore

³⁴ Ma eu vi dicu d'ùn ghjurà micca, nè per u celu, chì ghjè tronu di Diu,

³⁵ nè per a terra, chì ghjè u scambellu di i so pedi, nè per Ghjerusaleme, chì ghjè cità di u gran' Rè,

³⁶ nè mancu ai da ghjurà pè u to capu, chì ùn poi fà biancu o negru mancu un capellu di toiu.

³⁷ A vostra parolla ch'ella sia sì s'ell'hè sì, nò s'ell'hè nò. U soprappiù vene da u male.»

Ghjesù è a vindetta

³⁸ «Avete intesu ch'ellu hè statu dettu: ochju ochju, dente dente

³⁹ Ma eu vi dicu d'ùn risponde à u male; sì qualchissia ti mena nant'à a masca dritta, para li ancu l'altra a masca.

⁴⁰ À chì ti vole purtà in tribunale è piglià ti a casacca, lascia li ancu u mantellu;

⁴¹ è si qualchissia ti richere pè mille passi, fà ne per ellu duiemila.

⁴² À quellu chì ti dumanda, ai da dà, è à quellu chì ti chere un imprestitu, ùn li vultà u spinu.»

Ghjesù è i nemichi

⁴³ «Avete intesu ch'ellu hè statu dettu: “À u to prossimu porta li l'amore, à u to nemicu porta li l'odiu”.

⁴⁴ Eu vi dicu: i vostri nemichi tenite li cari, è pricate pè quelli chì vi perseguiteghjanu,

⁴⁵ da ch'è vo torniti figlioli di u vostru Babbu chì stà in i celi, chì face luce u so sole pè i gattivi è pè i bravi, è face piove nant'à i ghjusti è nant'à l'inghjusti.

⁴⁶ Chì s'è vo tenite caru à chì vi tene caru, a vostra paca chì hà da esse? Ùn facenu cusì ancu i publicani?

⁴⁷ È s'è vo salutate solu i vostri fratelli, chì fate di più chè l'altri? Ùn facenu cusì ancu i pagani?

⁴⁸ Siate dunque voi perfetti, cum'ell'hè perfettu u vostru Babbu di u celu.»