Matteu 23 - 4 Evangiles en Corse

Ghjesù denuncia i Scribi è i Farusei

¹ Tandu Ghjesù s'adrizzò à a ghjente accolta è à i so discepuli è disse:

² «I Scribi è i Farusei sò incaricati di dì è di spiicà a Lege di Musè.

³ Dunque fate puru è osservate ciò ch'elli vi diceranu, ma ùn fate secondu i so atti, chì dicenu è ùn facenu.

⁴ Leganu tamante some è e mettenu in collu à l'omi, ma per move le ùn ci volenu mette mancu un ditu.

⁵ Tutti i so atti, i facenu propiu per fà si vede da a ghjente. I stucci ch'omu si mette à dossu per a prichera, elli l'anu più grandi; i frisgi di i vestiti da pricà, l'anu più longhi.

⁶ Li piace à piglià u primu rangu in i ripasti è e prime sedie in e sinagoghe,

⁷ à esse salutati in piazza publica è à sente si chjamà Maestru da a ghjente.

⁸ Ma voi, ùn vi fate chjamà Maestru: chì maestru ùn ne avete chè unu è site tutti fratelli.

⁹ Annantu à a terra, ch'è vo ùn chjamite Babbu à nimu: chì Babbu ùn ne avite chè unu, u Babbu di u celu.

¹⁰ Ch'è vo ùn vi faccite chjamà Patroni: chì patrone ùn ne avite chè unu, u Messia.

¹¹ U più maiò trà voi altri serà u vostru servu;

¹² à chì si face più grande serà fattu più chjucu; à chì si face più chjucu serà fattu più grande.

¹³ «Guai à voi, falsi chè vo site, scribi è Farusei chì chjudite à l'omi u regnu di i celi; voi stessi ùn ci entrite è à l'entranti li chjudite e porte.

¹⁴ Guai à voi, falsi chè vo site, scribi è Farusei chì vi manghjate a robba di e veduve è fate vista di pricà tantu. Moltu più serete cundannati.

¹⁵ «Guai à voi, falsi chè vo site, scribi è Farusei chì girate terra è mare per riesce à cunverte una sola persona, è po quand'è voi l'avete acquistata, a fate degna di l'infernu duie volte peghju chè voi!

¹⁶ «Guai à voi chì aprite a strada à a cechesca quand'è vo dite: “À chì ghjura pè u tempiu, ùn hè nunda; ma à chì ghjura pè l'oru di u tempiu, quessu hè ligatu.”

¹⁷ Mansa di scemi è di cechi! Chì serà po u valevule, l'oru o u tempiu chì santificheghja l'oru?

¹⁸ È dite dinò: “À chì ghjura pè l'altare, ùn hè nunda; ma à chì ghjura pè a robba offerta, quessu hè ligatu.”

¹⁹ Mansa di cechi! Chì serà po u valevule, a robba offerta o l'altare chì santificheghja a robba offerta?

²⁰ Chì à chì ghjura per l'altare ghjura per l'altare è per tuttu ciò chì hè nantu;

²¹ à chì ghjura per u santuariu ghjura per u santuariu è per Quellu chì ci stà;

²² à chì ghjura per u celu ghjura per u tronu di Diu è per Quellu chì ci posa.

²³ «Guai à voi, falsi chè vo site, scribi è Farusei chì pagate a tassa di a menta, di u finochju è di u cuminu, quandu ch'è vo lasciate corre u più gravu in a Lege: u dirittu, a misericordia è a fideltà; quessa sì, ci vulia à fà la, senza nigligintà u restu.

²⁴ Guidi cechi, chì arrestate u muscusgiulu in lu stacciu ma vi inghjuttite u camellu!

²⁵ «Guai à voi, falsi chè vo site, scribi è Farusei chì purificate u fora di u calice è di u piattu, quandu chì u drentu hè pienu zeppu à robba di latrucinu è di ingurdizia.

²⁶ Faruseu cecu! Purificheghja prima u drentu di u calice, per chì u fora venga purificatu ancu ellu.

²⁷ «Guai à voi, falsi chè vo site, scribi è Farusei chì v'assumigliate à tumbini imbiancati: à l'infora parenu belli, ma à l'indrentu sò pieni à ussicami è robba impura.

²⁸ Cusì site voi altri: da fora, parite à ognunu ghjente ghjusta, ma à l'indrentu, site trapieni à inghjustizia è falsità.

²⁹ Guai à voi, falsi chè vo site, scribi è Farusei chì inalzate i sipolcri di i prufeta è adurnate e fosse di i ghjusti,

³⁰ è dite: “sè no avessimu campatu à i tempi di i nostri babbi, ùn seriamu micca stati i so cumplici per tumbà i prufeta.”

³¹ Cusì tistimuniate contru à voi stessi: site i figlioli di quelli chì anu tombu i prufeti!

³² Ebbè! Fate puru ancu voi cusì è peghju!

³³ Serpi, figlioli di serpi, cumu vi puderiate francà da u castigu di l'infernu?

³⁴ Ghjè per quessa chì eu, vi mandu prufeta, savii è maestri di a Lege. Ne tumberete è ne crucifisserete, ne staffilerete in e vostre sinagoghe è i percoterete da cità in cità,

³⁵ per ch'ellu vi ricaschi addossu tuttu u sangue di i ghjusti spartu annantu à a terra, dapoi u sangue d'Abel u ghjustu sin'à u sangue di Zaccaria, figliolu di Baracchia, ch'è vo avete tombu trà u santuariu è l'altare.

³⁶ Da veru a vi dicu, tuttu què hà da ricascà annantu à sta ghjente d'oghje.»

Lamentu di Ghjesù annantu à Ghjerusaleme

³⁷ «Ghjerusaleme, Ghjerusaleme, tù chì assassini i prufeta è tombi à petrate quelli chì ti sò mandati, quantu volte aghju vulsutu accoglie i to figlioli cum'è a cioccia accoglie i so piulelli sottu à l'ale, è ùn avete vulsutu micca!

³⁸ Ebbè! V'hà da esse lasciata diserta, a vostra casa.

³⁹ Chì, a vi dicu, oramai ùn mi viderete più, sinu à u ghjornu chè vo diciarete: benedittu Quellu chì vene à nome di u Signore!»