Matteu 22 - 4 Evangiles en Corse

Parabula di u pranzu matrimuniale

¹ Ghjesù turnò à parlà li ghjuvendu si di parabule è li disse:

² «U regnu di i celi hè cum'è un rè chì fece fà un bellu pranzu pè e nozze di u figliolu.

³ Mandò i servi ch'elli chjaminu à u pranzu l'invitati, ma quelli ùn volsenu vene.

⁴ Tandu mandò altri servi cun l'ordine di dì li cusì: “Eeccu, aghju fattu appruntà u pranzu, i tori è l'animali ingrassati è tuttu hè in estice; venite à a festa.”

⁵ Ma l'invitati ùn li detenu capu è andonu à curà i so affari, à chì in campagna, à chì à fà negoziu.

⁶ È l'altri arrestonu i servi di u rè, i maltrattonu è i fecenu tumbà.

⁷ Tandu u rè entre in zerga, manda a so armata, face tumbà l'assassini è strughje a cità.

⁸ Dopu dice à i so servi: “U pranzu hè prontu ma l'invitati eranu indegni;

⁹ dunque andate pè e strade è tutti quelli ch'è vo truverete fate li vene à e nozze.”

¹⁰ I servi andetenu pè e strade è accolsenu tutti quelli ch'elli truvonu, bravi è gattivi vuleghji, è cusì fù piena a sala di u pranzu.

¹¹ Entre u rè per vede l'invitati è trova à unu chì ùn avia micca à dossu una vestitoghja da nozze;

¹² li dice: “O amicu, cum'hè ch'è tù sì ghjuntu quì senza a vestitoghja di e nozze?” Ma quellu si stà zittu.

¹³ Tandu u rè dice à i soi: “Ligate li i pedi è e mani è po lampate lu à u bughju di fora. Culà ci seranu pianti è circhenni.”

¹⁴ Perchè chì i chjamati sò parechji, ma quelli scelti sò pochi.»

L'impositu da l'imperatore

¹⁵ Tandu i Farusei vanu à cunsultà si trà d'elli per sapè cumu incappià à Ghjesù cù ciò ch'ellu dicia.

¹⁶ È li mandanu i so discepuli cù quelli di u partitu d'Erode. Dicenu: «O maestru, sapemu ch'è tù sì veritativu è ch'è tù insegni a strada di Diu, è ch'è tù ùn temi à nisunu perchè chì ùn guardi in facia à nimu.

¹⁷ Allora dì ci ciò chì pare à tè: l'impositu da l'imperatore, si pò pacà o micca?»

¹⁸ Ma Ghjesù chì sapia ch'elli eranu pessimi dice: «O falsacci, mi vulete mette à u provu?

¹⁹ Fate mi vede una muneta chì si ne paca l'impositu.» È quelli li porghjenu una pezza di muneta.

²⁰ Li dice: «Di quale sò issa faccia è isse parolle scritte?»

²¹ Elli dicenu: «Sò di Cesaru.» Tandu ellu risponde: «Ebbè! Rendite à Cesaru ciò chì hè di Cesaru, è à Diu ciò chì hè di Diu.»

²² Stupiti da ciò ch'elli avianu intesu, piglianu è si ne vanu.

I Saducei è a resurrezzione

²³ U listessu ghjornu venenu i Saducei chì pensanu ch'ellu ùn si pò rinnasce, è li dicenu:

²⁴ «O Maestru, hà dettu Musè: s'è unu more senza figlioli, u fratellu spuserà a veduva è cusì derà figlioli à u so fratellu .

²⁵ Or, ind'è noi, ci eranu sette fratelli. U primu si hè maritatu è po hè mortu. Cum'ellu ùn avia micca figlioli, hà lasciatu a moglia à u fratellu.

²⁶ Hè stata listessa pè l'altru è pè quill'altru, à sin'à u settesimu.

²⁷ À l'ultima, dopu à tutti l'altri, morse a moglia.

²⁸ Cusì po, u ghjornu di a resurrezzione, trà issi sette, di quale hà da esse a moglia, chì tutti l'anu avuta?»

²⁹ Ghjesù risponde: «Tamantu sbagliu! Ùn cunniscite nè a bibbia, nè a putenza di Diu.

³⁰ Chì à a resurrezzione ùn ci serà nè moglie nè mariti, ma tutti seranu cum'è l'anghjuli in celu.

³¹ In quantu à a resurrezzione di i morti, soca ùn avete lettu ciò ch'ellu vi hà dettu Diu:

³² Eu sò u Diu d'Abraamu, u Diu d'Isaccu, è u Diu di Ghjacobbe. Diu ùn hè u Diu di i morti, ma di i vivi .»

³³ E folle chì avianu intesu funu culpite da isse cose ch'ellu insignava.

U cumandu maiò

³⁴ Dopu intesu ch'ellu avia tappatu a bocca à i Saducei, i Farusei li s'accolsenu in giru.

³⁵ È unu trà d'elli [un maestru di a Lege] li fece sta dumanda per mette lu à u provu:

³⁶ «O maestru, chì hè u cumandu maiò di a Lege?»

³⁷ Ellu rispose: «Tù, tenerai u Signore, u to Diu, di core pienu è di anima piena è di mente piena.

³⁸ Quessu hè u primu cumandu è u maiò.

³⁹ Ed eccu l'altru chì ghjè sumigliu: Tù, tenerai à l'altri cum'è à tè stessu.

⁴⁰ Tutta a Lege è tutti i prufeta dipendenu d'issi dui cumandamenti.»

U Cristu, figliolu di Davide

⁴¹ Cum'elli eranu accolti i Farusei, Ghjesù

⁴² li fece sta dumanda: «Chì dite di u Missia? Di quale serà figliolu?» Elli dissenu: «Figliolu di Davide.»

⁴³ Ghjesù risponde: «Tandu cum'hè chì Davide, guidatu da u Spiritu di Diu, u chjama Signore dicendu:

⁴⁴ U signore hà dettu à u mo Signore: Vene è posa quì, à diritta, sin'à ch'eu ti metti i to nemichi sott'à li pedi ?

⁴⁵ È dunque s'è Davide u chjama u so Signore, cumu po esse u figliolu?»

⁴⁶ È nimu li pobbe risponde. È da issu ghjornu nimu ebbe mai più curagiu à dumandà li nunda.