Matteu 21 - 4 Evangiles en Corse

Entrata in trionfu in Ghjerusaleme

¹ È quand'elli s'avvicinonu da Ghjerusaleme è ghjunsenu ver di Betfaghè, in li cuntorni di u Monte di l'Alivi, tandu Ghjesù mandò dui discepuli,

² dicendu li: «Avviate vi voltu u paese di fronte à voi, è ùn starete tantu à truvà una sumera ligata è un sumerucciu; sciuglite li è purtate mi li.

³ È s'è nimu vi dice nunda, li dicerete chì u Signore n'hà bisognu», ma ch'ellu l'hà da rimandà subitu.

⁴ Quessa hè accaduta da ch'ella venga cumpiita a parolla di u Signore, detta da u prufetu:

⁵ Dite à a figliola di Sione: Eccu: vene à tè u to rè pusatu, dolce, nant'à una sumera cù u so sumerucciu, figliolu di una fera .

⁶ Andonu, i discepuli, è fecenu ciò ch'ellu li avia cumandatu Ghjesù,

⁷ purtonu a sumera è u sumerucciu, messenu i so mantelli nant'à l'animali, è ellu pusò nantu.

⁸ A maiò parte di a ghjente in a folla stesenu i so mantelli nant'à a strada; l'altri taglionu a frasca ind'è l'arburi è a sparsenu nant'à a strada

⁹ E folle chì venianu davanti è quelle chì u suvitavanu gridavanu dicendu: Osanna à u figliolu di Davide: Benedettu à chì vene in nome di u Signore: Osanna in l'altu di l'altu.

¹⁰ È cum'ellu entria in Ghjerusaleme, a cità sana trimò dicendu: «Qual'hè quessu?»

¹¹ È e folle dicianu: «Quessu hè u prufetu Ghjesù quellu di Nazarè di a Galilea.»

Ghjesù purificheghja u Tempiu

¹² È Ghjesù entrì in u tempiu, messe fora à tutti quelli chì vendianu è cumpravanu in u tempiu è lampò in pianu e tavule di quelli chì cambiavanu soldi è i pusatoghji di quelli chì vendianu i culombi,

¹³ è po li dice: «Hè scritta: A mo casa serà chjamata casa di prichera, or voi ne fate una tana di ladri .»

¹⁴ È li s'avvicinonu cechi è zoppi in u tempiu, è ellu i guarì.

¹⁵ Vistu e maraviglie ch'ellu avia fattu, è intesu i zitelli chì gridavanu in u tempiu dicendu: «Osanna à u figliolu di Davide», i capisacerdoti è i maestri di a Lege s'inzergonu

¹⁶ è li dissenu: «I senti ciò ch'elli dicenu?» Ghjesù li disse: «Iè. Ùn avete mai lettu: Da a bocca di i ciucci è di i criaturi ti n'ai ricacciatu una lode?»

¹⁷ È, lascendu li, surtì fora da a cità, à via di Betania, è passò a notte quallà.

A fica secca

¹⁸ A mane, vultendu in cità, ebbe a fame,

¹⁹ è videndu una sola fica nant'à a strada s'avvicinò è ùn ci truvò altru nunda chè fronde, è li dice: «ch'ellu ùn ti venghi mà più fruttu», è subitu a fica firmò secca.

²⁰ Videndu quessa, i discepuli si maraviglionu è dissenu: «Cume serà ch'ella si hè siccata di colpu a fica?»

²¹ Ghjesù rispose è li disse: «A vi dicu da veru, s'è vo avessiti a fede è ch'è vo ùn dubitessiti, ùn solu quella di a fica, ma ancu per dì à stu monte: “pesa ti è lampa ti in mare”, cusì accaderebbe.

²² È tuttu ciò ch'è vo dumanderete cù a fede in a prichera, l'averete.»

Da quale vene l'auturità di Ghjesù?

²³ È cum'ellu era ghjuntu in u tempiu, ind'u mentre ch'ellu insignava li s'avvicinonu i capisacerdoti è i capipopulu dicendu: «Cù chì auturità faci què? È issa auturità, quale a ti hà data?»

²⁴ Ghjesù rispose è li disse: «Anch'eu lasciate ch'eu vi facci una sola dumanda è s'è vo mi rispundite, anch'eu vi diceraghju cù chì auturità ch'è facciu què.

²⁵ U battezimu di Ghjuvanni da duve vene? Da u celu o da l'omi?» L'altri riflettianu trà di elli dicendu: «S'è no dimu: “Da u celu” ci hà da dì: “Tandu cumu hè chì voi ùn ci avete avutu fede?”

²⁶ Ma s'è no dimu: “Da l'omi” attenti à a folla chì tutti tenenu à Ghjuvanni da prufetu.»

²⁷ È rispundendu à Ghjesù dissenu: «Ùn la sapemu.» È anch'ellu li dice: «Mancu eu vi dicu cù chì auturità ch'è'facciu què.»

A parabula di i dui figlioli

²⁸ «Or chì vi ne pare? Un omu avia dui figlioli. S'avvicina da u primu è li dice: “U mo figliolu, oghje vai è travaglia in a vigna.”

²⁹ Quellu risponde è li dice: “Ùn ci vogliu andà”, ma dopu si pente è và à a vigna.

³⁰ U babbu s'avvicina da l'altru figliolu è li dice listessa cosa. Quellu risponde è li dice: “Eu vò, o bà”, ma ùn ci và.

³¹ Di i dui, qualessu hà fattu a vuluntà di u babbu?» Dicenu: «U primu.» Ghjesù li dice: «Da veru a vi dicu, in u Regnu di Diu, i publicani è e donne publiche ci anu da esse innanzu à voi.

³² Di fatti Ghjuvanni vi hè ghjuntu vicinu in una strada di ghjustizia, è ùn ci avete micca avutu fede. Or i publicani è e donne publiche anu avutu a fede in ellu; invece voi, avete vistu è mancu vi site pentuti dopu, è mancu avete avutu fede in ellu.»

A parabula di u vignaghjolu è di i paisani

³³ «Sentite un' antra parabula. Ci era un omu, prupietariu di una casa, chì piantò una vigna è l'accinse cù una chjudenda. In drentu ci fece un palmentu è alzò una torra, è po a dete in affittu à paisani è si n'andete in viaghju.

³⁴ Quand'ella vense a stagione di i frutti, mandò i so servi ind'è i paisani à piglià i so frutti.

³⁵ Ma i paisani aguantonu i servi: à unu u minonu, l'altru u tumbonu è u terzu u piglionu à petrate.

³⁶ Ellu mandò dinò altri servi, di più chè a prima volta, è i paisani li fecenu listessa cosa.

³⁷ Dopu l'omu li mandò u so figliolu dicendu: “u mo figliolu, po l'anu da rispettà.”

³⁸ Ma i paisani, videndu u figliolu, dissenu da sè à sè: “Questu hè l'erede: aiò, tumbemu lu è pigliemu ci a vigna.”

³⁹ L'aguantonu, u lamponu fora da a vigna, è u tumbonu.

⁴⁰ Dunque, quand'ellu venerà u patrone di a vigna, à issi paisani, chì li hà da fà?»

⁴¹ Elli dicenu: «I pessimi, i tumbarà in modu pessimu, è dopu, a vigna a derà à altri paisani, chì li ne deranu frutti quandu serà a stagione.»

⁴² Ghjesù li dice: «Ùn avete mai lettu in e scritture: A petra ch'elli anu latiatu i muratori hè diventata u capimonte cusì l'hà vulsuta u Signore chì maraviglia davant'à i nostri ochji?

⁴³ È perciò vi dicu ch'ellu vi serà toltu u Regnu di Diu è serà datu à un antru populu chì ne ricaccierà frutti.

⁴⁴ [È à chì cascherà nant'à sta petra serà sfracellatu; è à qual'ella falerà à dossu sarà schjacciatu].»

⁴⁵ Sentendu isse parabule, i capisacerdoti è i Farusei capinu ch'ellu parlava per elli.

⁴⁶ È pruvendu à arrestà lu, temianu e folle postu chì u tenianu da prufeta.