Matteu 2 - 4 Evangiles en Corse

Ghjunghjenu i sapienti venuti da l'oriente

¹ Ghjesù era natu in Betleeme, una cità di Ghjudea, in tempi di u rè Erode. Tandu ghjunsenu in Ghjerusaleme unepochi di sapienti venuti da l'Oriente.

² Dissenu: «Duve hè issa criatura nata pocu fà, u rè di i Ghjudei? In Oriente avemu vistu spuntà a so stella è simu ghjunti quì à fà li onore.»

³ Intesu cusì fù scunvoltu u rè Erode, è, à tempu à ellu, Ghjerusaleme sana sana.

⁴ U rè piglia è accoglie tutti i capisacerdoti è i maestri di a lege, è li dumanda duv'ellu avia da nasce u Cristu.

⁵ Quelli risposenu: «In Betleeme di Ghjudea, cum'ellu l'hà scritta u prufeta:

⁶ È tù, o Betleeme, terra di Ghjuda, di sicura ùn serai a più chjuca di e cità di a Ghjudea, hì da tè hà da esce un guida è hà da appasturà u mo populu, Israeleit .»

⁷ Tandu Erode chjamò à l'appiattu i sapienti è si fece dì, in manera sicura, quand'ella era spuntata a stella

⁸ È po i mandò in Betleeme dicendu li: andate è buscate indezii precisi nant'à issa criatura. Quand'è vo l'averete trova, fate mi la sapè ch'eu voghi ancu eu à fà li onore.

⁹ Avendu lu intesu, partinu. Ed eccu chì a stella ch'elli avianu vistu in Oriente li viaghjava davanti; ghjunta sopr'à u locu duv'ella era a criatura, a stella si firmò;

¹⁰ à vede la ne sentinu tamanta gioia.

¹¹ Entrati in la casa, vedenu u zitellu cù Maria, a mamma. Si indinochjanu pè adurà lu, aprenu i so tisori è li offrenu rigali: oru, incensu è mirra.

¹² Più tardi un sognu l'avertì di ùn avè da turnà ind'è Erode, è si ne vultonu in i so lochi pè Ùnantra strada.

Fughjenu in Egittu

¹³ Partuti elli, un anghjulu di Diu si prisenta in sognu à Ghjiseppu è li dice: «pesa ti, piglia a criatura è a mamma, fughji in Egittu è stà ci sin'à ch'eu ti parli, chì Erode hà da fà circà a criatura pè tumbà la.»

¹⁴ Ghjiseppu si pisò, pigliò, di notte tempu, u criaturu è a mamma è partì in Egittu.

¹⁵ Ci stete sin'à a morte di Erode, da ch'ella venga cumpiita a parolla di u Signore, detta da u prufeta: Aghju fattu vene u mo figliolu da l'Egittu.

E criature sò stirpate

¹⁶ Tandu Erode videndu chì i sapienti l'avianu brullatu s'inzergò à l'alta è cumandò di tumbà ogni criatura di Betleeme è di tuttu u circondu, sin'à l'età di dui anni, sicondu u tempu calculatu da i sappienti.

¹⁷ Cusì vense cumpiita a parolla detta da u prufeta Ghjeremia:

¹⁸ Una voce si hè intesa in Rama, tamantu pientu è lamentu; Rachele pienghje i so figlioli it è ùn vole esse cunsulata chì ùn ci sò più .

Voltanu da l'Egittu

¹⁹ Mortu Erode, un anghjulu di Diu cumparse in sognu à Ghjiseppu in Egittu,

²⁰ è li disse: «pesa ti, piglia a criatura è a mamma è parti in terra d'Israele, chì sò morti quelli chì vulianu fà more u bambinu.»

²¹ Ghjiseppu si pisò, pigliò a criatura è a mamma è partì in terra d'Israele.

²² Ma quand'ellu intese chì Archelau era rè, invece di u babbu Erode, Ghjiseppu temì di andà ci è, prevenutu da un sognu, si ritirò in Galilea.

²³ À tempu ghjuntu andete à stà in una cità chjamata Nazarè. Cusì vense cumpiita a parolla detta da i prufeta: Nazarenu sarà chjamatu.