Matteu 16 - 4 Evangiles en Corse

Farusei è Saducei volenu vede un miraculu

¹ I Farusei è i Saducei si avvicinanu da Ghjesù è u mettenu à u provu dumandendu ch'ellu li fia vede un segnu da u celu.

² È ellu li risponde è dice: «[A sera dite chì ellu hà da fà u bellu tempu per via ch'ellu hè rossu u celu;

³ è a matina, dite chì ellu hà da esse tempurale chì u celu hè rossu scuru? Sapete leghje l'aspettu di u celu, è i segni di i tempi ùn li pudete leghje?]

⁴ Issa ghjente infida è gattiva cerca un segnu, ma ùn li si derà chè quellu di Ghjona.» È piglia è si ne và.

U levitu di i Farusei è di i Saducei

⁵ I discepuli si eranu scurdati di piglià u pane, prima di parte à via di l'altra sponda. Ghjesù li dice:

⁶ «Attenti, tenite vi luntanu da u levitu di i Farusei è di i Saducei.»

⁷ I discepuli ragiunavanu trà di elli è dicianu: «Hè per via ch'è no ùn avemu micca pigliatu u pane.»

⁸ Ghjesù si ne accorghje è dice: «O ghjente di poca fede, chì ragiunate trà di voi dicendu chì voi ùn avete pane?

⁹ Ùn avete ancu capitu? Soca ùn vi ne arricurdate di i cinque pani pè cinquemila persone nè di quante coffe ricusse?

¹⁰ Nè di i sette pani pè quattru mila persone nè di quante panere ricusse?

¹¹ Cumu hè ch'è vo ùn capite chì eu ùn parlava di pane? Tenite vi luntanu da u levitu di i Farusei è di i Saducei?»

¹² Tandu i discepuli anu capitu ch'ellu ùn parlava micca di levitu di u pane, ma di l'insignamentu di i Farusei è di i Saducei.

Petru dichjara chì Ghjesù hè u Missia

¹³ Ghjuntu da e parte di Cesarea di Filippu, Ghjesù dumanda à i discepuli: «Quale saria u figliolu di l'omu, secondu a ghjente?»

¹⁴ Quelli rispondenu: «À chì dice ch'ellu hè Ghjuvanni, à chì dice Elia, à chì dice Ghjeremia o unu di i prufeti.»

¹⁵ Ghjesù dice: «Ma voi, quale dite ch'eu sò?»

¹⁶ Simon Petru risponde:

¹⁷ «Tù si u Cristu, u Figliolu di u Diu vivu.» È Ghjesù li dice: «Beatu à tè, o Simò figliolu di Ghjona, chì issa cosa ùn ti l'anu micca palisata a carne è u sangue ma u mo babbu chì hè in celu.

¹⁸ Ed eu dicu ch'è tù sì Petru, è nantu à issa petra aghju da alzà a mo chjesa, è mancu e porte di l'infernu l'anu da piglià a suprana.

¹⁹ Ti aghju da dà e chjave di u regnu di i celi, è ciò ch'è tù averai ligatu nantu à a terra fermerà ligatu in i celi, è ciò ch'è tù averai scioltu nantu à a terra fermerà scioltu in i celi.»

²⁰ È po s'arricumandò à i discepuli ch'elli ùn dicanu à nimu ch'ellu era u Cristu.

Ghjesù annunzià ch'ellu hà da more è rinvivisce

²¹ Da tandu Ghjesù messe à fà capì à i so discepuli ch'ellu li tuccava à andà in Ghjerusaleme, chì l'anziani di u populu, i capisacerdoti è i maestri di a Lege l'avianu da fà soffre assai è tumbà lu, ma u terzu ghjornu ch'ellu avia da risuscità.

²² Tandu Petru u pigliò da parte è messe à rimpruverà lu dicendu: «Diu ne guardi, o Signore; mai ch'ella sia!»

²³ Ma Ghjesù si vultò è disse à Petru: «Vai via, o Satanassu; sì una pastoghja per mè chì ùn ai micca in capu e cose di Diu, ma quelle di l'omi.»

²⁴ È po Ghjesù disse à i so discepuli: «S'è unu vole vene cun mè, ch'ellu pianti di pensà à ellu stessu, ch'ellu agguanti a so croce è ch'ellu mi seguiti.

²⁵ À chì vole salvà a so vita l'hà da perde; à chì perde a so vita per mè a truverà.

²⁶ S'è unu vince u mondu sanu à chì li puderà ghjuvà s'ellu ci perde l'anima? O allora cùn chene l'hà da barattà, l'omu, a so anima?

²⁷ U Figliolu di l'Omu hà da vene in a gloria di u Babbu cù i so anghjuli. È pacarà à ognunu secondu a so manera di fà.

²⁸ A vi dicu da veru, chì unepochi di quelli chì sò quì ùn anu da more prima di avè vistu vene u Figliolu di l'Omu in u so regnu.»