Marcu 4 - 4 Evangiles en Corse

A parabula di u suminadore

¹ Si messe torna a insignà, vicinu à u mare. Era avvintu da l'immensa folla è li tucchede à cullà ind'una barca ancurata in mare, mentrea ancurata in mare, mentre chì a ghjiente si fermava à orlu di mare.

² L'insignava aduprendu assai e parabule è ind'u so insignamentu li dicia:

³ «State à sente: u seminatore partì per suminà.

⁴ È mentre ch'ellu suminava, unepoche di granelle casconu à orlu di strada. Si calonu l'acelli è e si pizziconu.

⁵ Ne cascò dinò inde u petricaghju, duv'ella era scarsa a terra. Nascinu subitu chì a terra ùn era fonda.

⁶ Ma à u pisà di u sole funu trascallate è si secconu per mancanza di radiche.

⁷ Ne cascò dinò inde e spine ma e spine crescinu è l'assuffuconu è fruttu ùn ne dedenu.

⁸ Ne cascò inde a terra bona è quelle spuntonu, crescinu è dedenu u fruttu. E granelle resenu u trenta u sessanta o u centu.»

⁹ È disse: «A chì hà orecchje da sente, ch'ellu senti.»

À chì ghjovanu e parabule

¹⁰ Quand'elli funu trà elli, quelli chì eranu cun ellu è i dodici li dumandedinu di e parabule.

¹¹ Ellu rispose: «A voi hè cuncessu di cunnosce u misteru di u Regnu di Diu. Ma per quelli di fora hè tuttu in parabule,

¹² di modu chè, Guardendu ch'elli ùn veghinu, sintendu è bè ch'elli ùn capiscanu, per ch'elli ùn si cunvertinu è avè riscattu di i so peccati. »

Ghjesù spiega a parabula di u suminadore

¹³ È li disse: «Ùn avete micca capitu sta parabula? Allora chì ne serà di tutte l'altre!

¹⁴ U suminatore lampa a sumente di a Parolla.

¹⁵ È quelli chì sò à orlu di strada quand'ella casca a sumente sò quelli chì sentenu a Parolla, ma subitu ch'elli l'anu intesa, ghjunghje Satana è a li caccia da u core.

¹⁶ È quelli chì ricevenu a sumente inde u petricaghju, sò quelli chì sentenu a Parolla è l'accettanu subitu cù gioia.

¹⁷ Ma radiche ùn ne anu: sò ghjente di una stonda. S'elli sò tribbulati o perseguitati per via di a Parolla, inciampanu subitu.

¹⁸ È l'altri chì ricevenu a sumente à meze spine, sò quelli chì anu intesu a Parolla,

¹⁹ ma chì si lascianu piglià da i penseri di issu mondu, da l'ingannu di e richezze, da e voglie dirraghjunate, chì suffocanu a Parolla è cusì quella ùn pò fruttà.

²⁰ Quelli chì ricevenu a sumente in la terra bona, sò quelli chì stanu à sente a Parolla, chì a mettenu in pratica. È cusì danu u fruttu, à u trenta, a u sessanta o à u centu.»

A lumera sottu à u bacinu

²¹ Poi li disse: «Soca s'accende una lumera per mettela sottu à u bacinu o sottu à u lettu? Ùn hè fatta a lumera per stà nant'à u candeleru?

²² Chì ùn ci hè nulla di piattu chì ùn abbia da esse scupartu, ùn ci hè secretu chì ùn abbia da vene palesatu.

²³ A chì hà orecchje per sente, ch'ellu senti.»

²⁴ Poi li disse: «Siate attenti à ciò ch'è vo'sentite: a misura ch'è vo aduprate per l'altri serà aduprata per voi è ci serà ancu u soprappiù.

²⁵ Cusì, a chì pussete li sera datu torna, è à chì ùn hà li serà cacciatu u so pocu è tantu.»

A parabula di a sumente chì cresce

²⁶ È disse: «U Regnu di Diu hè cum'è un omu chì sumena i sò chjosi.

²⁷ Ch'ellu dormi o ch'ellu veghji, di notte cum'è di ghjornu, a sumente inghjerma è cresce senza ch'ellu sappii comu.

²⁸ A terra da per ella produce prima l'arba, poi a spiga è a spiga, dopu, s'empie di granelle.

²⁹ Quandu chì u fruttu hè maturu, l'omu dà subitu di manu à a falce, ghjà ch'ella hè venuta a cugliera.»

A parabula di a sumente di a senapa

³⁰ È dicia: «À chè l'assumiglieremu u Regnu di Diu, in chì parabula u raprisintaremu?

³¹ Hè cum'è una granella di senapa, chì, à u suminà, hè a più chjuca di tutte e sumente di a terra,

³² poi suminata ch'ella hè, cresce è diventa più maiò chè tutta l'ortaglia. Face a fronda tantu è tantu chì l'acelli di u celu s'ascondenu in a so ombra.»

L'adopru di e parabule

³³ È l'annunziava a Parolla cù parechje parabule simule, secondu ciò ch'elli pudianu capisce.

³⁴ À e folle, ùn li parlava mai senza parabule. Ma solu cun elli, à i so discepuli li spiegava tuttu.

Ghjesù calma una tempesta

³⁵ È quellu ghjornu, toccu a sera, li disse: «Andemu da mare indà.»

³⁶ Dopu d'avè licenziatu a folla, accumpagnonu à Ghjesù in mare cù a barca duv'ellu si truvava dighjà, è d'altre barche seguitavanu.

³⁷ È si levò una forte tempesta di ventu. I marosuli assaltavanu a barca chì s'empiia d'acqua.

³⁸ Ghjesù chì era in poppa durmia nant'à un capezzale. U sveghjonu dicenduli: «O Maestru, simu persi è mancu ti ne primureghji?»

³⁹ Arrente à u mare: «Zittu, pianta.» U ventu cascò è ci fù a bunaccia.

⁴⁰ Poi li disse: «chì avete à teme? Fede ùn ne avete ancu?»

⁴¹ Funu presi da un gran timore, dicendusi unu à l'altru: «Quale sarà quessu, chì ancu u ventu è u mare li stanu sottumessi?»