Marcu 3 - 4 Evangiles en Corse

L'omu cù a manu agrancata

¹ È torna entrò inde a sinagoga. Ci si truvava un omu chì avia una manu aggrancata.

² È vulianu vede s'ellu l'avia da risanà in sabbatu, per rimpruverallila.

³ Ghjesù disse à l'omu chì avia a manu aggrancata: «Arrizzati quì à mezu.»

⁴ È dumandò à tutti: «U abbatu, hè permessu di fà u bè o di fà u male? Di salva una vita o di tumbà?» Ma elli si stavanu zitti.

⁵ I fissò unu per unu, sdegnatu è cuntristatu per via di a cicaghjine di i so cori. Disse à quellu omu: «Stendi a manu.» L'omu a stese, è nè ritruvò l'usanza.

⁶ Allora u Farusei si n'andonu per raghjunà subitu cù quelli d'Erode, è vede cumu fà more à Ghjesù.

E folle à bordu di mare

⁷ È Ghjesù cù i so discepuli s'alluntanò ver'di u mare. Ma una folla maiò u seguitava, ghjente venuta da a Galilea, da a Ghjudea,

⁸ da Ghjerusaleme, da l'Idumea, da Ghjurdanu in dà, è da i circondi di Tiru è di Sidone. Avianu intesu cuntà ciò ch'ellu facia è eranu venuti à truvallu.

⁹ È disse à i so discepuli di teneli una barca pronta per ch'ellu ùn sia stringhizzatu da a ghjente.

¹⁰ Per via ch'ellu ne risanava tanti è tanti chì quelli ch'avianu qualchi infirmità si lampavanu à vulellu tuccà.

¹¹ È i spiriti maligni quand'elli u vedianu li s'inghjinuchjavanu è briunavanu dicendu: «Tù sì u Figliolu di Diu.»

¹² Ma Ghjesù, cù poca manera, i minacciava perch'elli ùn lu palisassinu.

Ghjesù sceglie l'apostuli

¹³ Culledi pè a muntagna è chjamò quelli ch'ellu'avia sceltu è elli li s'accustonu.

¹⁴ Ne scelse dodeci [è i chjamò apostuli] per avelli cun ellu è per mandalli à predicà,

¹⁵ cù u putere di risanà i malati è di scunvià i demonii:

¹⁶ [Ne scelse dodici], Simone, ch'ellu cugnumò Petru.

¹⁷ Ghjacumu è u fratellu Ghjuvanni, i figlioli di Zebedeu, ch'ellu cugnumò Boanerges, vene à dì “figlioli di u tonu”,

¹⁸ è Andria, è Filippu, è Bartulumeu, è Matteu, è Tumasgiu, è Ghjacumu u figliolu d'Alfeu, è Taddeu, è Simone u Cananeanu.

¹⁹ È Ghjuda Iscariotu, quellu chì u tradì.

Ghjesù è Belzebù

²⁰ Andò in casa è torna a folla ci si adunì. Ùn li davanu mancu tempu à manghjà.

²¹ U so imparintatu, messu à capu di sti fatti, ghjunse per riguarallu, pensendu ch'ellu ùn fussi più nantu à ellu

²² è i scribi chì eranu falati da Ghjerusaleme dicianu: «Hè cù Belzebù è ghjè cù a putenza di u principe di i demonii ch'ellu scunvia i demonii.»

²³ Chjamenduli, li parlò in paragone: «Cumu pò Satana scunvia à Satana?

²⁴ Sì un regnu hè divisu contru à sè, issu regnu ùn pò durà.

²⁵ È sì una casa hè divisa contru à sè, issa casa ùn po durà.

²⁶ Si Satana si rivolta contru à sè è si divide, ùn pò durà: hè a so fine.

²⁷ Nimu pò entre in casa d'un omu forte per arrubà, s'ellu ùn hè capace prima di ligà l'omu forte. Tandu sì chì li metterà a casa à l'abottu.

²⁸ A vi dicu da veru: tutti i peccati è e ghjisteme di i figlioli di l'omi seranu riscattati, quantu voglia ch'elli abbianu ghjistimatu.

²⁹ Ma per quellu chì averà ghjistimatu contru à u Spiritu Santu, ùn ci pò esse riscattu mai, chì ferma abeternu reiu di piccatu.»

³⁰ Era parch'elli dicianu: «Què hè in manu à un spiritu malignu.»

L'imparentatu veru di Ghjesù

³¹ Tandu ghjunsenu a mamma è i fratelli chì, da fora, u mandonu à chere.

³² In giru à ellu c'era assai ghjente à pusà. Li dissenu: «Mammata , cù i to fratelli [è surelle] sò fora è ti cercanu.»

³³ Ellu rispose è disse: «È quale hè mamma, è quale sò i miò fratelli?»

³⁴ Fissò unu per unu quelli chì pusavanu in giru è disse: «Eccu à mamma, ecculi i miò fratelli,

³⁵ [chì] quellu chì face a vulunta di Diu hè per mè fratellu, surella è mamma.»