Marcu 2 - 4 Evangiles en Corse

U paraliticu di Cafarnau

¹ Unipochi di ghjorni dopu, Ghjesù ghjunse torna in Cafarnau. Intesu ch'ellu era in casa,

² accorse tanta ghjente chì, mancu firmava locu davanti à a porta. Ed ellu predicava a parolla.

³ Ed eccu chì quattru omi chì purtavarolla un paraliticu si fecenu avanti.

⁴ Ma cum'ellu ùn ci era mezu d'avvicinassi per via di a folla, scuprinu u tettu sopra à duv'ellu era Ghjesù, è, per l'apertura, fecinu falà a barella duv'ellu era stracquatu u paraliticu.

⁵ È Ghjesù, videndu a fede di quella ghjente disse à u paraliticu: «O figliò, i to peccati ti sò perdunati.»

⁶ Ci si truvavanu à pusà uni pochi di Maestri di a Lege chì pensavanu in elli stessi:

⁷ «Cumu hè ch'ellu parla cusì? Ghjestema. Quale pò perduna i peccati s'ellu ùn hè Diu solu?»

⁸ Ma Ghjesù chì avia subitu capitu ind'u so spiritu u perchè di isse riflessione li disse: «Cumu hè chè vo' rivugliulate isse cose ind'u vostru core?

⁹ Chì sarà u più faciule: à dì à u paraliticu: “I to peccati ti sò perdunati”, o à dilli: “arrizzati, piglia a to barella è viaghja”.

¹⁰ Allora, perchè vo'sappiate chì u Figliolu di l'Omu hà, nantu a terra, u putere di perdunà i peccati,

¹¹ ti ne dò l'ordine, disse à u paraliticu: arrizzati, piglia a to barella è vaitine in casa toia.»

¹² Quellu s'arrizzò subitu, pigliò a so barella è si ne andò vistu da tutti, di modu ch'elli fermonu meravigliati è, glurifichendu à Diu dicianu: «Ùn n'avemu mai vistu un affare simule.»

A Chjama di Levì

¹³ Ghjesù si n'andò torna ver' di u mare; tutta a folla andava à truvallu, è ellu insegnava.

¹⁴ Strada facendu, vide à Levì, u figliolu d'Alfeu, chì pusava à u so scagnu, è li disse: «Seguitami.» È Levì, arrizzendusi, u seguitò.

¹⁵ Era à tavulinu in casa di Levì è ci era assai publicani è peccatori attavulinati cù Ghjesù è i so discepuli, chì eranu parechji à seguitallu.

¹⁶ Allora i scribi (di u pertitu di i) Farusei, vistu ch'ellu manghjava cù i publicani è i peccatori, dissenu à i discepuli: «Cumu hè ch'ellu manghja cù i publicani è i peccatori?»

¹⁷ Ghjesù chì l'avia intesi li disse: «ùn sò i sani chì anu bisognu di u medicu: sò i malati! Ùn sò micca venutu per chjamà i ghjusti ma i peccatori.»

U dighjunu - Otre vechje è vinu novu

¹⁸ Èi discepuli di Ghjuvanni è i Farusei facianu u dighjunu. Allora uni pochi ghjunsenu à dilli: «Cumu hè chì i discepuli di Ghjuvanni è quelli di i Farusei facenu u dighjunu è i to discepuli ùn ne facenu?»

¹⁹ È Ghjesù li rispose: «Serà po chì l'amici di u sposu possanu fà u dighjunu tantu chì u sposu hè cun elli? Tantu chì u sposu hè cun elli ùn ponu fà dighjunu.

²⁰ Ma venera un ghjornu chì u sposu li serà cacciatu. Tandu faranu u dighjunu.

²¹ «Ùn ci hè nimu ch'impezzi un pannu vechju di stofa nova, chì tandu a stofa nova strappa u pannu vechju è a sdrigitura s'ingrenda.

²² È nimu mette u vinu novu inde l'otre vechje, o sinnò u vinu crepa l'otre, è vinu è otre ùn sò più da nulla. U vinu novu ci vole à mettelu inde l'otre nove.»

À puntu di u sabbatu

²³ Un sabbatu, mentre chì Ghjesù marchjava à l'orici d'un suminatu, i discepuli ci si cansedinu per strappassi due spighe.

²⁴ Allora i Farusei li dissenu: «Mì! Cumu hè chì i to discepuli facenu ciò chì ùn si deve fà u sabbatu?»

²⁵ Li rispose: «Ùn avete mai lettu ciò ch'ellu fece Davide quand'ellu si truvò inde u bisognu è chì ellu stessu è i so cumpagni ebbenu a fame?

²⁶ Cumu ch'ellu entrò in la casa di Diu, à l'epuca chì Abiatar era u capisacerdote, è manghjò i pani di l'offerta riservati à i soli sacerdoti, è ne dede ancu à i so cumpagni?»

²⁷ Poi disse: «U sabbatu hè statu fattu per l'omu è micca l'omu pè u sabbatu.

²⁸ È per ciò, u Figliolu di l'Omu hè patrone ancu di u sabbatu.»