Marcu 13 - 4 Evangiles en Corse

Ghjesù annunzia a ruvina di u tempiu

¹ È mentre ch'ellu escia da u tempiu, unu di i so discepuli li disse: «O Maestru, guarda ghjà chì belle petre è chì travagliu!»

² Ghjesù li disse: «U vedi issu tamantu travagliu, ebbè! Ùn n'hà da fermà petra sopra à petra. Tuttu sera distruttu.»

U principiu di i guai

³ È mentre ch'ellu pusava in a culletta à l'Olivetu, di punta à u tempiu, Petru, Ghjacumu, Ghjuvanni è Andria soli cun ellu, l'interrugavanu.

⁴ «Dicci quandu chì ste cose anu da accade? È chì serà u segnu quandu chì tuttu què serà in puntu di realizassi?»

⁵ È Ghjesù principiò à dilli: «fate casu chì nimu v'inganni!

⁶ Chì parechji affaccaranu, aduprendu u miò nome è dicendu: “Sò eiu”, è inganneranu assai ghjente.

⁷ Quandu ch'è vo'senterete parlà di guerre, o di rimusci di guerre, ùn vi pigli u tremu. Bisogna chì tuttu què accadi, ma ùn serà ancu a fine.

⁸ Chì si rivulterà populu contr'à populu, è regnu contr'à regnu. In certi lochi ci seranu i terramoti, a fame. Serà u principiu di i dulori.

⁹ Fate casu à voi stessi, perchè vi manderanu in tribunale, vi pesteranu da i colpi ind'e sinagoghe. Serete purtati davanti à i guvernatori è i rè in testimunianza per via di mè.

¹⁰ Ma prima ci vole à sparghje u Vangelu in tutte e nazione.

¹¹ E quand'elli vi purtaranu per ghjudicavi, ùn vi fate penseru per ciò ch'è v'averete da dì. Dite solu ciò chì vi serà datu à l'ora vulsuta. Chì tandu, un serete micca voi chì parlerette, ma u Spiritu Santu.

¹² Infatti, un fratellu ferà cundanna l'altru fratellu à morte. Un babbu u figliolu. I figlioli si rivulteranu contru à i genitori, è i feranu more.

¹³ È serete in odiu à tutti per vìa di u miò nome. Ma quellu chì resisterà fin'à l'ultima sera salvu.»

U disguastu maiò

¹⁴ «Quandu ch'è vo'viderete l'orrore di u disguastu stabbulitu duv'ellu ùn avia da esse —à chì leghje capisca—, tandu chì quelli chì sò in Ghjudea fuganu pè a muntagna.

¹⁵ Quellu chì serà in terrazza, ch'ellu ùn fali in casa, è ch'ellu ùn ci entri per vulè riguarà qualcosa.

¹⁶ Quellu chì serà in campagna, ch'ellu ùn rientri per riguarà u so mantellu.

¹⁷ Guai, tandu, à e donne incinte, è à quelle chì daranu à sughje ind' issi ghjorni!

¹⁸ Ma precate chì ste cose ùn accadinu d'invernu.

¹⁹ Chì ci seranu ind' issi ghjorni e tribulazione cumu mai si n'hè vistu da poi u principiu di a creazione, opera di Diu, fin'à oghje, è cum'ellu ùn si ne viderà mai più.

²⁰ È sì u Signore ùn avissi accurtatu issi ghjorni, nimu a si francheria. Ma grazia à l'eletti ch'ellu hà sceltu, issi ghjorni l'hà accurtati.

²¹ Allora, sì qualchissia vi dicesse: “Eccu chì u Cristu hè qui, o ecculu quallà”, ùn ci credete.

²² Chì affacheranu i falzi Cristi, i falzi prufeti, chì feranu meraculi è maraviglie per ingannà, s'ella fussi pussibule, ancu l'eletti.

²³ Voi guardatevi, ghjà ch'eiu v'aghju annunziatu tuttu.»

A venuta di u Figliolu di l'Omu

²⁴ «Ma, in quelli ghjorni, dopu à isse tribulazione, “U sole s'oscurerà è a luna ùn darà più a so luce.

²⁵ E stelle cascheranu da u celu, è e putenze di i celi seranu in cunvugliu ”.

²⁶ È tandu videranu u Figliolu di l'Omu, venendu annantu à i nuli, putentissimu è gloriosu.

²⁷ È tandu manderà i so anghjuli per adunì quelli ch'ellu hà sceltu, da i quattru punti di l'orizonte, da u capu di a terra à u capu di u celu.»

A parabula di a fica

²⁸ «Or amparate a parabula di a fica: Quandu ch'elle inteneriscenu e so punte, è ch'elle affaccanu e fronde, sapete chì l'estate s'avvicina.

²⁹ Cusì quandu chè vo'viderete accade ste cose, sappiate ancu voi ch'ellu hè vicinu, à le porte.

³⁰ A vi dicu da veru: sta generazione ùn passera prima chè tuttu què ùn sìa accadutu.

³¹ U celu è a terra passeranu, ma e miò parolle ùn passeranu micca.»

U ghjornu è l'ora chì ùn sì cunnoscenu

³² «In quant'à u ghjornu o à l'ora, nimu i cunnosce, nè l'anghjuli di u celu, nè u Figliolu, nimu fora di u Padre.

³³ Siate attenti è veghjate, ghjà ch'è vo' ùn sapete quand'ella sera.

³⁴ Hè cum'è un omu chì, partendu luntanu, lascia à so casa è ne dà a carica à i so servi, a ognunu secondu u so travagliu, è chì dumanda, à u purtinaru d'apre l'ochju.

³⁵ Allora aprite l'ochji, ghjà ch'è vo' ùn sapete quandu chì u patrone di casa venerà: o di sera, o à mezanotte, o à u cantà di u ghjallu, o a mane,

³⁶ Di modu chì, s'ellu vene à l'ispensata, ch'ellu ùn vi trovi durmendu.

³⁷ È ciò ch'e' vi dicu, a dicu à tutti: aprite l'ochji!»