Lucca 24 - 4 Evangiles en Corse

Ghjesù risuscitatu

¹ È u prima ghjornu di a sittimana, à l'albariumi, andedinu à a tomba cù l'arumati ch'elli avianu appruntatu.

² È truvedinu a petra vultulata da davanti à a tomba,

³ è, intruti, ùn truvedinu più u catavaru di u signori Ghjesù.

⁴ Ed eranu in lu dubbiu causa di issu fattu; tandu li si prisintonu dui omi cù una vistitoghja chì spampillulava.

⁵ Li era ghjuntu u siscu è guardavanu in tarra; l'omi li dissinu: «chì circheti u vivu à buleghju à i morti?

⁶ Ùn hè quì, chì si hè svighjatu; ricurdeti vi cum'ellu vi hà dittu quand'ellu era sempri in Galilea:

⁷ u Figliolu di l'Omu ci voli ch'ellu sia datu in mani à l'omi piccatori è missu in croci, è chì u terzu ghjornu ch'ellu s'arrizzi.»

⁸ È si ricurdedinu i so parolli.

⁹ È vultati ch'elli funu da a tomba, annuncedinu tutti issi cosi à l'ondici è à tutti l'altri.

¹⁰ Chì eranu a Matalena Maria, Ghjuvanna, Maria di Ghjacumu, è l'altri chì eranu cun elli

¹¹ è li parsinu ricapiti issi discorsi, è ùn li cridianu.

¹² Ma Petru s'arrizzedi, corsi à a tomba, si calò è ùn vidi cà i panni, è vultedi in casa soia maravigliendu si di u fattu stalvatu.

A marchja à via di Emmaus

¹³ Ed eccu chì dui d'elli, quillu ghjornu, facianu strada à via di un paesi chì si chjama Emmaus, à sissanta stadii da Ghjerusalemi.

¹⁴ È discurrianu trà di elli di tutti i fatti stalvati.

¹⁵ È mentri ch'elli discurrianu è raghjunavanu, Ghjesù stessu, avvicinatu si, viaghjò cun elli,

¹⁶ ma eranu impiditi i so ochji di cunnoscia lu.

¹⁷ È li dissi: «chì sò sti discorsi chì voi faciati marchjendu?» È piantedinu, imbafati.

¹⁸ È unu chì si chjamava Cleopas li rispundì: «saristi po tù u solu in Ghjerusalemi à ùn sapè i fatti stalvati sti pochi ghjorni?»

¹⁹ È li dissi: «qualessi?» È elli li dissinu: «quilli di Ghjesù u Nazarenu, chì fù un prufeta putenti, di fatti è di parolli, davanti à Diu è à tuttu u populu;

²⁰ cum'elli u dedinu i capi di i preti è i nostri magistrati da fà lu cundannà à morti, è u missinu in croci.

²¹ È noi spiravamu ch'ellu fussi quillu chì avia da riscattà à Israeli; ma cù tuttu què, eccu oramai u terzu ghjornu ch'elli sò stalvati sti fatti.

²² Ma unipochi di donni chì sò cù noscu ci anu cunturbatu, chì sò andati à l'alba à a tomba,

²³ ùn ci anu trovu u so catavaru, è sò ghjunti dicendu di avè vistu l'agnuli, chì u dicinu vivu.

²⁴ È andedinu unipochi di i nostri à a tomba è a truvedinu tali è quali ch'elli avianu dittu i donni, è à ellu ùn lu vidinu.»

²⁵ È ellu li dissi: «o scemi, losci di cori par creda tuttu ciò ch'elli dissinu i prufeti!

²⁶ Soca ùn ci vulia ch'ellu patissi què u Cristu è entra in la so gloria?»

²⁷ È li spiicò ciò chì trattava d'ellu in tutti i scritturi, cumincendu da Musè è da tutti i prufeti.

²⁸ È si avvicinedinu da u paesi duva elli andavanu, è ellu feci par francà lu.

²⁹ È insistedinu dicendu: «stà cù noscu, chì u ghjornu si ni hè andatu è faci annuttendu.» È intrì à stà cun elli.

³⁰ È quand'ellu era attavulinatu cun elli, pigliedi u pani, u binadì, è spartutu lu, u li dedi

³¹ è s'aprinu i so ochji è u cunnobbinu; è tandu ùn lu vidinu più.

³² È si dissinu: «ùn brusgiava po u nostru cori quandu ellu ci parlava par istrada, quandu ellu ci spiicava i scritturi?»

³³ È si arrizzedinu subitu, vultedinu in Ghjerusalemi è i truvedinu tutti accolti, l'ondici è quilli chì eranu cun elli,

³⁴ chì dicianu: «in fatti si hè svighjatu u signori, è hè statu vistu da Simoni.»

³⁵ È elli cuntedinu l'affari di a strada è cumu ellu si era fattu cunnoscia da elli à u sparta di u pani.

L'apparizioni à i discepuli

³⁶ È mentri ch'elli parlavanu cusì, Ghjesù fù arrittu à mezu à elli; li dissi: «paci cù voscu.»

³⁷ Insischiti è impauriti cridianu di veda un ispiritu.

³⁸ È li dissi: «parchì seti surpresi è vi collanu i raghjunamenti in lu cori?

³⁹ Guardeti i me mani è i me pedi par veda ch'e' sò eiu; tuccheti mi è guardeti, chì un ispiritu ùn hà carni è ossi, cum'è vo videti ch'e' l'aghju eiu»

⁴⁰ È dicendu cusì li feci veda i so mani è i so pedi.

⁴¹ È cum'ì da a troppa alicria ùn ci cridianu ancu è si maravigliavanu, li dissi: «aveti calcosa da magnà quì?»

⁴² È elli li dedinu un pezzu di pesciu arrustitu.

⁴³ È u pigliedi è davanti à elli u magnedi.

⁴⁴ È li dissi: «sò quisti i parolli ch'e' vi aghju dittu quand'e' eru sempri cù voscu, chì ci voli ch'elli sianu cumpiiti tutti i cosi scritti ind' a Legi di Musè, ind'è i prufeti è ind'i salmi chì trattanu di mè.»

⁴⁵ Tandu li aprì a menti da ch'elli capischinu i scritti;

⁴⁶ è li dissi: «cusì hè scritta, ch'ellu suffraria Cristu è ch'ellu s'arrizzaria da mezu à i morti u terzu ghjornuii ,

⁴⁷ è ch'elli sarianu annunciati in nomi soiu u pintimentuj è u pardonu di i piccati , à tutti i nazioni, à principià da Ghjerusalemi.

⁴⁸ Voi ni seti tistimoni.

⁴⁹ Ed eccu, eiu vi mandu addossu a prumessa di u me Babbu; è voi, steti in la cità, insini à quand'ì vo sareti vistuti cù a putenza di in sùk.»

Ascinsioni di Ghjesù

⁵⁰ È i purtedi for' di cità insini à a Betanial, è alzendu i mani i binadì.

⁵¹ È mentri chì ellu i binadia si spiccò da elli è fù purtatu in celim ,

⁵² È elli inghjinuchjatu li si davanti, vultedinu in Ghjerusalemi cù l'alicria maiò.

⁵³ È sempri eranu in lu tempiu è ludavanu à Diu.