Lucca 23 - 4 Evangiles en Corse

Ghjesù purtatu davanti à Pilatu

¹ È s'arrizzedinu tutti è u purtedinu ind'è Pilatu.

² È missinu à incausà lu, dicendu: «emu vistu chì quistu voli metta a rivolta ind' a nostra nazioni, l'impidisci di pagà i impositi à Cesaru, è dici d'essa Cristu, un rè.»

³ È Pilatu li dumandedi: «tù sè u Rè di i Ghjudei?» È Ghjesù li risposi: «cusì dici tù.»

⁴ È Pilatu dissi à i capisacerdoti è à a ghjenti accolta: «ùn trovu colpa varuna ind'è st'omu.»

⁵ Ma elli insistedinu dicendu: «metti a rivolta ind' u populu cù u so insignamentu, in la Ghjudea sana da a Galilea insini à quì.»

Ghjesù davanti à Erodi

⁶ È Pilatu sintendu què dumandedi s'ellu era Galileu l'omu

⁷ è quand'ellu imparedi ch'ellu vinia da u regnu d'Erodi, u mandedi à Erodi, chì era ancu ellu in Ghjerusalemi in quilli ghjorni.

⁸ È Erodi quand'ellu vidi à Ghjesù si ni ralicrò assai, chì era un pezzu ch'ellu u vulia veda, parch'ellu ni sintia parlà , è spirava di veda calchì miraculu ch'ellu faria.

⁹ È li feci parechji dumandi, ma Ghjesù ùn li risposi nulla.

¹⁰ Ed eranu arritti culà i capisacerdoti è i duttori di a Legi chì l'accusavanu briunendu.

¹¹ È Erodi dinò u trattedi cù disprezzu , cù i so suldati, è ridendu si ni, li feci metta una vistitoghja magnifica è u rimandedi à Pilatu.

¹² È divintedinu amichi trà Erodi è Pilatu quillu ghjornu, chì à principiu eranu in numicizia.

Ghjesù cundannatu à morti

¹³ Pilatu adunì i capisacerdoti è l'anziani di u populu

¹⁴ è li dissi: «m'eti purtatu st'omu dicendu ch'ellu mittia a rivolta ind'u populu, ed eccu, l'aghju intarrugatu davanti à voi, è ùn aghju trovu in ellu colpa varuna in tutti l'accusi chì vo' li feti.

¹⁵ È mancu ni hà trovu Erodi, chì u m'hà rimandatu, ed eccu, ùn hà fattu nulla da valè a morti.

¹⁶ Cusì l'aghju da fà casticà è dopu u lintaraghju.»

¹⁷ À ogni festa li tuccava à lintà li un prighjuneru.

¹⁸ Ma briunedinu assai tutti insemi: «togli lu ci, è lenta ci à Barabbà.»

¹⁹ Quillu era statu imprighjunatu par via di una rivolta fatta in la cità è par avè tombu.

²⁰ Pilatu li parledi dinò, par via ch'ellu vulia lintà à Ghjesù.

²¹ Ma elli briunavanu: «in croci, fà lu metta in croci.»

²² È Pilatu parledi pà a terza volta è dissi: «chì hà fattu di mali quistu? Ùn aghju trovu in ellu varuna colpa da valè a morti; l'aghju da fà casticà è dopu u lintaraghju.»

²³ Ed elli insistedinu cù i brioni, dumandendu ch'ellu fussi missu in croci, è vinsinu u puntu cù i so brioni.

²⁴ È Pilatu dicisi di fà ciò ch'elli dumandavanu.

²⁵ Lintedi quillu chì era statu imprighjunatu pà a rivolta è par avè tombu, cum'elli a dumandavanu, è à Ghjesù u li lascedi ch'elli ni fessinu ciò ch'elli vulianu.

Crucifissioni di Ghjesù

²⁶ È quand'elli u si purtavanu, scuntredinu un certu Simoni, di Cirena, chì vultava da a campagna è li dedinu a croci da purtà la daretu à Ghjesù.

²⁷ Marchjava cun ellu u populu accoltu, è i donni chì piignianu è si cimicavanu.

²⁸ È vultatu si versu elli, Ghjesù dissi: «figlioli di Ghjerusalemi, ùn piigniti par via di mè! Ma par voi piigniti puri è pà i vostri figlioli,

²⁹ chì eccu, veninu i ghjorni ch'ellu si hà da dì: “biati i donni stirili, i corpi chì ùn anu parturitu, è i petti chì ùn dedinu à sughja!”

³⁰ Tandu cuminciaranu à dì à i muntagni: cascheti ci à dossu! È à i culletti: piatteti ci .

³¹ Chì s'elli facinu cusì pà a legna verdi, di a legna secca chì ni sarà?»

³² È purtavanu dinò altri è dui latri da fà li mora cun ellu.

³³ È ghjuntu à u locu chjamatu u Craniu, culà missinu in croci à ellu è à i latri, unu à dritta è l'altru à manca.

³⁴ È Ghjesù dissi: “o bà, pardona li, chì ùn sanu ciò ch'elli facinu.” È elli si spartedinu a so vistitoghja tirendu à l'imbusca.

³⁵ Ed era culà u populu è guardava. È si ridianu d'ellu l'anziani di u populu dicendu: «l'altri l'hà salvi, ch'ellu salvi à ellu s'ellu hè u Cristu, u prasceltu di Diu.»

³⁶ È si ridianu d'ellu ancu i suldati è avvicinatu si li porsinu l'acetu

³⁷ è li dissinu: sì tù sè u rè di i Ghjudei, salva ti.

³⁸ È avia un iscrittu sopra: «u rè di i Ghjudei hè quistu.»

³⁹ È unu di i latri missi in croci u insultava dicendu: «ùn sè tù u Cristu? Salva à tè è à noi.»

⁴⁰ È li risposi quillu altru fraiendu lu: «soca ùn temi à Diu, tù chì ricevi listessa cundanna?

⁴¹ È par noi hè ghjusta, chì ricivimu u casticu ch'elli miretanu i nostri azzioni; ma quistu, ùn hà fattu nulla di spripusitatu.»

⁴² È dissi: «o Ghjesù, ricorda ti di mè quand'ì tù vinarè in lu to Regnu.»

⁴³ È Ghjesù li dissi: «a ti dicu da veru, oghji, sarè cù mè in paradisu.»

A morti di Ghjesù

⁴⁴ È sarà statu meziornu, quand'ellu vensi u bughju nantu à a tarra sana insini à trè ori,

⁴⁵ chì u soli era sparitu, è si straccedi u velu di u tempiu in dui pezzi.

⁴⁶ È ad alta voci Ghjesù dissi: «o Bà, in li to mani dò u me spiritu.» È dittu cusì persi u fiatu.

⁴⁷ È u cinturioni chì avia vistu tuttu ciò ch'era stalvatu feci loda à Diu dicendu: «di sicuru chì st'omu era ghjustu.»

⁴⁸ È tutta a ghjenti accolta pà u spittaculu, quand'elli vidinu i fatti, si ni vultedinu minendu si in pettu.

⁴⁹ È luntanu stavanu tutti quilli chì cunniscianu à Ghjesù, è ancu i donni chì eranu vinuti cun ellu da a Galilea, è guardavanu.

U intarru di Ghjesù

⁵⁰ È ci era un omu chì si chjamava Ghjaseppu, è chì era di u cunsigliu, un omu bravu è ghjustu

⁵¹ ùn era statu d'accunsentu cù ciò ch'elli avianu dicisu è fattu l'altri cunsiglieri , era vinutu da Arimatea, cità di i Ghjudei, è aspittava u Regnu di Diu.

⁵² Andedi ind'è Pilatu, è li chersi u catavaru di Ghjesù,

⁵³ u spicchedi da a croci, u fascedi ind'un linzolu è u missi ind'una tomba scavata in lu scogliu, chì nimu ci era statu intarratu mai.

⁵⁴ Ed era a vigilia di a festa, è avia da cumincià u sabbatu.

⁵⁵ È i donni chì l'avianu accumpagnatu, vinuti cun ellu da a Galilea, guardedinu a tomba è vidinu a manera ch'ellu ci era statu missu u catavaru,

⁵⁶ è vultati ch'elli funu in cità appruntedinu l'arumati è i prufumi.