Lucca 21 - 4 Evangiles en Corse

L'ufferta di a veduva

¹ Fighjulendu bè, Ghjesù vide i ricchi chì lampavanu i so doni in lu tisoru di u tempiu,

² è vide una veduva misiriosa chì ci lampava dui soldi, è disse:

³ «Da veru a vi dicu, issa tinta veduva hà messu più ella cà tutti quill'altri,

⁴ chì elli anu datu doni cù u so soprappiù, ma ella, misiriosa è bè, hà lampatu tuttu ciò chì era u so ghjuvevule par campà.»

Annuncia a distruzzione di u Tempiu

⁵ Mentre chì unipochi parlavanu di u tempiu è dicianu ch'ellu era adurnatu di belle petre è d'oggetti ufferti à Diu, Ghjesù disse:

⁶ «anu da vene i ghjorni chì, di ciò chì vo guardate, ùn firmarà una petra annantu à l'altra chì ùn sia lampata in tarra.»

Annunciu di a fine

⁷ Li chersinu: «o Maestru, quandu accadaranu isse cose? È qualessu sarà u segnu di ch'elle anu da accade?»

⁸ Ellu disse: «attenti à ùn fà vi ingannà; chì parechji vinaranu in nome meiu, dicendu: “sò eiu!” è “u mumentu s'avvicina”, ùn l'andate apressu, nò.

⁹ Quand'ì vo sintarete ch'ellu ci hè guerre è cumbugli, ùn vi spavintate chì ci vole chì isse cose accadinu prima. Ma ùn sarà subitu a fine.»

¹⁰ Tandu li disse: «una nazione si farà numica d'una antra nazione è un regnu d'un antru regnu,

¹¹ è ci saranu i tarramoti maiò, è, sicondu i lochi, e peste è e fame nere, è ci saranu i spaventi è i segni maiò vinuti da u cele.

¹² Ma prima di tuttu què, vi mittaranu e manu addossu è vi parsiguitaranu, vi daranu à e sinagoghe è à e prighjone da chì voi siate ghjudicati, vi purtaranu davanti à i rè è à i guvernatori, par via di u me nome.

¹³ È vi sarà l'occasione d'una tistimunianza.

¹⁴ Mittite vi puru in capu d'ùn avè da appruntà difesa.

¹⁵ Chì à a spirtezza ch'e' vi mittaraghju eiu in bocca, mancu ci si pudaranu oppone nè purtà ci cuntrastu tutti i vostri numichi.

¹⁶ Sarete dati ancu da babbi è mamme, da fratelli, da parenti è amichi, è parechji di voi altri saranu tombi.

¹⁷ È par via di u me nome, ognunu vi purtarà odiu.

¹⁸ Ma mancu un capellu di vostru andarà di male.

¹⁹ À marzè à a vostra pacenzia, acquistarete d'esse vivi.»

Annuncia a distruzzione di Ghjerusaleme

²⁰ «Quand'ì vo vidarete à Ghjerusaleme accampata da l'armate, sappiate, tandu, ch'ella hè vicina a so ruvina.

²¹ Tandu, quelli chì sò in Ghjudea, ch'elli piglinu e muntagne, quelli chì sò in cità, ch'elli scappinu, è quelli chì sò in campagna, ch'elli ùn entrinu in cità.

²² Chì saranu i ghjorni di u pagamentu, da ch'ellu venga cumpiitu tuttu ciò chì hè statu scrittu.

²³ Malasciu à chì avarà figlioli in corpu è à chì darà à sughje in quelli ghjorni; chì ci saranu, indì sta tarra e disgrazie maiò, è a stizza di Diu contru à stu populu.

²⁴ È cascaranu sottu à u tagliu di a spada, è partaranu prighjuneri in tutte e nazione è à Ghjerusaleme a si mittaranu sottu à i pedi l'altre nazione finu à ch'elli venganu à fine i tempi di quelle.»

Ghjunghjarà u Figliolu di l'Omu

²⁵ «È ci saranu i segni in lu sole è in la luna è e stelle, è, annantu à a tarra, e nazione intimurite da u rimusciu è u trostu di u mare saranu indì l'affanni.

²⁶ È à l'omi, li sarà toltu u rispiru, da a paura, aspittendu ciò chì hà da accade in lu mondu; chì saranu smosse e putenze di i celi,

²⁷ è tandu si vidarà u Figliolu di l'Omu chì vene ind'un nuvulu cù a putenza è a gloria maiò.

²⁸ Quand'elle cuminciaranu ad accade isse cose, addirrizzatevi è pisate u capu chì s'avvicina u tempu chì voi sarete salvi.»

U paragone di a fica

²⁹ È li dede un paragone: «guardate a fica è tutti l'arburi,

³⁰ da chì vo i videte ch'elli caccianu, sapete da par voi chì l'istate s'avvicina.

³¹ Cusì, ancu voi, quand'ì voi vidarete ch'elle stalvaranu isse cose, sappiate chì u Regnu di Diu sarà vicinu.

³² Da veru, a vi dicu, ùn hà da smarrì issa leva ch'elle ùn stalvinu isse cose.

³³ U celu è a tarra anu da smarrì, ma e me parolle ùn smarrisciaranu micca.»

Chjama à ch'omu veghji

³⁴ «Attenti à ch'elli ùn diventinu pisivi i vostri cori, causa di l'abusi, e briachine è i frastorni di a vita, è chì issu ghjornu ùn vi venga addossu, à l'impinsata

³⁵ cum'ella fala una reta, chì vene hà da vene, addossu à l'abitenti di a tarra sana.

³⁶ Vighjate à ogni siconda è pricate da piglià forza è pudè vi traie da tutte isse cose chì anu da vene, è tene vi arritti davanti à u Figliolu di l'Omu.»

³⁷ Di ghjornu, stava in lu tempiu à insignà, è di notte iscia è si ne andava annant'à l'altura detta “di l'Alivi”.

³⁸ E', à l'alba, tutta a ghjente vinia in lu tempiu à sentelu.