Lucca 2 - 4 Evangiles en Corse

A nascita di Ghjesù

¹ In quelli ghjorni fù publicatu un dicretu di Cesaru Augustu di fà u censu di tutta a tarra abitata.

² È issu censu, u prima, si fece in lu mentre ch'ellu era Quiriniu guvernatore di a Siria.

³ Ed andetinu tutti à fà si scrive, ognunu in la so cità.

⁴ È cullede ancu Ghjaseppiu da a Galilea, da a cità di Nazarè in la Ghjudea, in la cità di Davide chì hè chjamata Betleeme, ghjà ch'ellu era di a casa è di u ceppu di Davide,

⁵ da fà si scrive, cù a spusata, Maria, chì era incinta.

⁶ È quand'elli eranu culà, funu compii i ghjorni, è vense u partu,

⁷ ed ebbe u so figliolu prima natu. U impannedinu è u chjinedinu ind'una manghjatoghja, chì, à l'ustaria, ùn ci era locu da elli.

I pastori è l'anghjuli

⁸ È ci eranu, ind'issu paese, pastori chì stavanu fora di notte, par dà capu à a so robba.

⁹ È un anghjulu di u Signore li si tense sopra, è a gloria di u Signore li lucichede in giru. È firmonu insischiti.

¹⁰ È li disse l'anghjulu: «ùn abbiate timore, eccu, v'annunciu una aligria maiò chì hà da esse da u populu sanu.

¹¹ Chì vi hè natu oghje, in la cità di Davide, un salvatore chì hè u Cristu Signore.

¹² Ed eccu da voi un segnu: Truvarete una criatura nascitoghja, impannata è chjinata ind'una manghjatoghja.»

¹³ È di colpu, ci fù cù l'anghjulu, tutta quanta l'armata di u cele chì laudava à Diu è dicia:

¹⁴ «Gloria indì l'alti celi à Diu è pace annantu à a tarra à l'omi di a bona vuluntà.»

¹⁵ È si ne andetinu l'anghjuli da indè elli ver di u celu è i pastori dissenu unu cù l'altru: «andemu ghjà sinu à Betleeme è vegamu ciò chì hè stalvatu è chì u signore ci hà fattu cunnosce.»

¹⁶ Ed andetinu lestri è truvetinu à Maria è à Ghjaseppiu è u zitellu nascitoghju chjinatu in la manghjatoghja;

¹⁷ è dopu vistu, fecenu sapè a parolla chì l'era stata detta à puntu di issu zitillucciu.

¹⁸ È tutti quelli chì avianu intesu funu maravigliati da u dettu di i pastori;

¹⁹ è Maria tinia tutte isse parolle in core è ci pinsava.

²⁰ È si ne vultetinu, i pastori, glurifichendu è ludendu u Signore di tuttu ciò ch'elli avianu intesu è vistu sicondu ciò chì l'era statu dettu.

²¹ Compii l'ottu ghjorni, vense l'ora di a so circuncisione è fù chjamatu cù u so nome Ghjesù, cum'ellu era statu chjamatu da l'anghjulu prima di ch'ellu fussi criatu in corpu.

Prisintazione di Ghjesù in lu tempiu

²² È compii ch'elli funu i ghjorni di a purificazione, sicondu a legge di Musè, u purtonu in Ghjerusaleme da prisintallu à u Signore,

²³ cum'ella hè stata scritta in la legge di u Signore: u masciu chì apre a matrice sarà chjamatu cunsacratu à u Signore

²⁴ è dedenu un sacrifiziu sicondu ciò chì hè dettu in la legge di Diu: un paghju di turturelle o dui culombi chjuchi.

²⁵ Or ci era un omu, in Ghjerusaleme, chì u so nome era Simeone ed st'omu era ghjustu è divutu ed aspittava u ricovaru d'Israele, è l'era addossu u Spiritu Santu.

²⁶ Ed era statu avartitu ellu, da u Spiritu Santu ch'ellu ùn avia da more prima di vede u Cristu di u Signore.

²⁷ È ghjunse in lu tempiu purtatu da u spiritu, è, in lu mentre chì u babbu è a mamma facianu entre u zitillucciu Ghjesù par ch'ellu li sia fattu sicondu l'usu di a Lege,

²⁸ ellu u ricivì in collu, binadì à Diu è disse:

²⁹ «avà poi lascià andà in pace u to servu, o Maestru, sicondu a to parolla;

³⁰ chì i me ochji anu vistu a to salvazione,

³¹ chì tù ai appruntatu da nanzu à tutti i populi,

³² luce da fà ch'elle ci veganu e nazione, è gloria di u to populu Israele.»

³³ È si maravigliavanu u babbu è a mamma di ciò ch'elli dicianu d'ellu.

³⁴ È Simeone i binadì è disse à Maria a mamma: «eccu, questu quì hè stabulitu da fà li cascà è da arrizzà li à parechji in Israele, è fà da segnu di cuntrastu

³⁵ —è à tè ti hà da trapanà l'anima a spada—, da ch'ellu venga palesu cum'elli raghjonanu parechji in li so cori.»

³⁶ È ci era Anna, una chì era prufeta, figliola di Fanuel di a tribbù d'Aseri, ed era annosa. Era campata sette anni cù u maritu

³⁷ è da dopu si era ferma vediva insin'à uttantaquattru anni. Ùn si alluntanava mai da u tempiu, facia u dighjunu è pricava di notte è di ghjornu.

³⁸ È prisintata si ghjustu tandu, ringraziava à Diu è parlava di u zitellu à tutti quelli chì aspittavanu a salvezza di Ghjerusaleme.

U ritornu in Nazarè

³⁹ Compiu ch'elli abbenu tuttu, sicondu a legge di u Signore, vultedinu in Galilea, in la so citai di Nazarè.

⁴⁰ È u zitellu criscia è pigliava forza, vinia colmu di saviezza è si avia addossu a grazia di Diu.

Ghjesù zitellu in lu tempiu

⁴¹ Ed andavanu tutti l'anni in Ghjerusaleme, trà u babbu è a mamma, pà a festa di a Pasqua.

⁴² Quand'ellu abbe dodici anni, è cullati ch'elli funu sicondu l'usu di a festa

⁴³ compii i ghjorni, à u vultà, u zitellu si firmede in Ghjerusaleme è u babbu è a mamma mancu a sapianu.

⁴⁴ È cridendu ch'ellu fussi in la caravagna, fecinu strada una ghjurnata è u circhedinu avvuleghju à i parenti è à quelli ch'elli cunniscianu,

⁴⁵ è, ùn avendulu trovu, vultedinu in Ghjerusaleme à circallu.

⁴⁶ Dopu trè ghjorni u truvedenu in lu tempiu, pusatu à mezu à i Maestri di a Lege chì i stava à sente è li facia dumande;

⁴⁷ è à chì u sintia era smaravigliatu da a so intilligenza è da e so risposte.

⁴⁸ È videndulu, funu culpiti è a mamma li disse: «o u me figliolu, cumu hè chì tù ci ai fattu cusì? Mì chì trà mè è babbitu eramu affannati, ti circavamu.»

⁴⁹ Li disse: «è chì m'aviate da circà? Soca ùn la sapiate chì, in ciò chì hè di babbu, mi tocca ad esseci?»

⁵⁰ È mancu capianu elli e parolle ch'ellu l'avia dettu.

⁵¹ È falede cun elli ed andete in Nazarè è li stava sottumessu. È a mamma si tinia tutti i detti in core.

⁵² È Ghjesù criscia, cumpiitu di ghjudiziu, di parsona è di grazia, davanti à Diu è à l'omi.