Ghjuanni 6 - 4 Evangiles en Corse

Ghjesù faci manghjà cinqui mila omini

¹ Dopu Ghjesù francheti u mari di Galilea, chì si chjama ancu di Tiberiada

² È cun eddu andaia a ghjenti accolta, parch'eddi vidiani i segni miraculosi ch'eddu facia pà i malati.

³ Ghjesù cuddeti in a muntagna è si missi à pusà quandì dà cù i so discipuli.

⁴ È s'avvicinaia a Pasqua, a festa di i Ghjudei.

⁵ Alzendu l'ochji, Ghjesù visti a folla chì vinia à truvà lu è dissi à Filippu: «induva avaremu da cumprà pani da ch'eddi manghjini?»

⁶ Dicia cusì par metta lu à u provu; chì eddu a sapia ciò ch'eddu aia da fà.

⁷ Filippu li risposi: «mancu dui centu pezzi d'arghjentu ùn bastariani da ch'eddu tocchi à ugnunu calcusedda di pani.»

⁸ Unu di i so discipuli, Andria, u frateddu di Simon Petru, li dici:

⁹ «ci avemu quì un zitiddoni chì t'hà cinqui pani d'orzu è dui pesci; ma par tanta ghjenti chì sò?»

¹⁰ Ghjesù dissi: «feti pusà a ghjenti»; chì in quiddi lochi, ci era monda arba; cusì pusetini l'omini: sarani stati cinqui mila.

¹¹ Tandu Ghjesù piddeti i pani, ringrazieti à Diu, i spartiti trà quiddi chì pusaiani, cù pesci quant'eddi ni vuliani.

¹² È sazii ch'eddi funu, Ghjesù dissi à i discipuli: «accudditi i pani chì avanzani, ch'eddu ùn si ni perdi.»

¹³ Cusì fecini è cù ciò chì avanzaia di i cinqui pani d'orzu dopu manghjatu, impiitini dodici sporti.

¹⁴ A ghjenti, videndu u segnu ch'eddu aia fattu diciani: «Imbeh! quistu hè da veru u Prufeta chì veni in u mondu.»

¹⁵ Cusì Ghjesù seppi ch'eddi aiani da vena à piddà lu da fà lu rè, è si ni cuddeti in a muntagna, solu solu.

Ghjesù marchja nantu à l'acqua

¹⁶ Ghjuntu a sera, i so discipuli faletini sinu à u mari,

¹⁷ cuddetini in una barca chì vuliani passà da mari in dà, in Cafarnau. Era aghjà notti è Ghjesù ùn era ancu vinutu à truvà li.

¹⁸ Ci era u ventu forti, è u mari si scatineti.

¹⁹ Dopu ramatu cinqui o sei chilomitri, viditini à Ghjesù chì marchjaia nantu à u mari è chì s'avvicinaia da u battellu, è ni funi intimuriti.

²⁰ Eddu li dissi: «socu eiu; ùn timiti.»

²¹ Tandu u volsini piddà in barca, è a barca tuccheti subitu duv'eddi vuliani andà.

Ghjesù, u pani di vita

²² U dopu ghjornu, a ghjenti accolta chì era firmata da mari in dà visti chì barca ùn ci ni era cà una, è chì Ghjesù ùn ci era micca cuddatu cù i so discipuli, ma chì quiddi erani partiti soli.

²³ Ma ghjunsini i barchi da Tiberiada, vicinu à u locu duv'eddi aiani manghjatu u pani, da dopu chì u Signori ebbi ringraziatu.

²⁴ Cusì, quand'ì a ghjenti visti chì Ghjesù ùn ci era, nè mancu i so discipuli, si colsini ancu eddi in i barchi è andetini in Cafarnau à circà à Ghjesù.

²⁵ È u truvetini da mari in dà è li dissini: «Rabbì, quandu ci sè ghjuntu quì?»

²⁶ Ghjesù li risposi è dissi: «a vi dicu da veru, mi circheti, ma micca par avè vistu i segni; par avè manghjatu i pani ed essa stati sazii.

²⁷ Ùn ci voli micca à travaddà pà u cibu chì sparisci, ma pà u cibu chì ferma in a vita eterna, quiddu chì u Fiddolu di l'Omu vi darà; chì à eddu, u Babbu, Diu, li hà missu u so sugellu à dossu.»

²⁸ Tandu li dissini: «è comu faremu par fà l'opari di Diu?»

²⁹ Ghjesù risposi è li dissi: «l'opara di Diu hè chì vo' crerghiti in quiddu ch'eddu mandeti.»

³⁰ Tandu li dissini: «è chì segnu miraculosu faci po tù, chì no' u vechimi è chì no' ti crerghimi? Chì opara?

³¹ I nostri babbi manghjetini a manna in lu disertu, com'edda hè scritta: li deti pani vinutu da u celi ch'eddi manghjessini.»

³² Tandu Ghjesù li dissi: «a vi dicu da veru, u pani da u celi ùn lu vi deti Musè, ma hè u me Babbu chì vi dà u pani da u celi, u veru.

³³ Chì u pani di Diu hè quiddu chì fala da u celi è dà vita à u mondu.»

³⁴ Tandu li dissini: «o Signori, dà ci lu sempri issu pani.»

³⁵ Ghjesù li dissi: «eiu socu u pani di a vita; à chì veni ind'è mè ùn avarà fami mai, è à chì credi in mè ùn avarà mai seti.

³⁶ Ma a vi aghju ditta: m'eti vistu è ùn criditi.

³⁷ Tuttu ciò ch'eddu mi dà u Babbu vinarà ind'è mè, è à chì veni ind'è mè mancu u lampu fora,

³⁸ parchì socu falatu da u celi, micca da fà u meiu u vulè, ma u vulè di quiddu chì mi hà mandatu.

³⁹ Ed eccu u vulè di quiddu chì mi hà mandatu: chì di tuttu ciò ch'eddu mi hà datu, ch'e' ùn ni perdi nudda, ma ch'e' u risusciteghji l'ultimu ghjornu.»

⁴⁰ Eccu u vulè di u me Babbu: chì quiddu chì vedi u Fiddolo è credi in eddu abbii a vita eterna, è u risuscitaraghju in l'ultimu ghjornu.

⁴¹ È i Ghjudei diciulaiani par via ch'eddu aia dittu: «eiu socu u pani falatu da u celi.»

⁴² È diciani: «quissu ùn hè po Ghjesù, u fiddolu di Ghjaseppu, chì u babbu è a mamma i cunniscimu? Comu hè ch'eddu dici avà: socu falatu da u celi?»

⁴³ Ghjesù risposi è li dissi: «aiò ùn diciuleti trà voi.

⁴⁴ Nimu pò vena ind'è mè sì u Babbu chì mi hà mandatu ùn lu ci trai, ed eiu u risuscitaraghju l'ultimu ghjornu.

⁴⁵ Hè scrittu ind'è i Prufeta: è sarani tutti amparati da Diu. À chì hà intesu u Babbu è hà amparatu da eddu veni ind'è mè.

⁴⁶ Di sicuru u Babbu nimu l'hà vistu, for di quiddu chì veni da Diu, chì eddu l'hà vistu u Babbu.

⁴⁷ A vi dicu da veru, à chì credi hà a vita eterna.

⁴⁸ Eiu socu u pani di a vita.

⁴⁹ I vostri babbi manghjetini a manna in lu disertu, è po morsini.

⁵⁰ Eccu u pani falatu da u celi, da chì quiddu chì u manghja ùn morghi.

⁵¹ Eiu socu u pani vivu falatu da u celi; à chì manghja di issu pani sarà vivu in sempiternu, è u pani ch'e' daraghju hè a me carri, pà a vita di u mondu.»

⁵² È si liticaiani i Ghjudei dicendu: «è comu pudarà po quistu dà ci a so carri da manghjà?»

⁵³ Ghjesù li dissi: «a vi dicu da veru, sì vo' ùn manghjeti a carri di u Fiddolu di l'Omu è ùn biiti u so sangui, ùn aveti vita in voi.

⁵⁴ À chì mastuca a me carri è bii u me sangui hà a vita eterna, ed eiu u risuscitaraghju l'ultimu ghjornu.

⁵⁵ Chì a me carri hè u cibu veru, è u me sangui a bienda vera.

⁵⁶ À chì mastuca a me carri è bii u me sangui stà in mè, ed eiu in eddu.

⁵⁷ Com'eddu mi hà mandatu u Babbu vivu, ed eiu socu vivu par via di u Babbu, quiddu chì mastuca à mè sarà vivu ancu eddu par via di mè.

⁵⁸ Eccu u pani falatu da u celi, micca com'è quiddu ch'eddi manghjetini i babbi chì sò morti; à chì mastuca issu pani sarà vivu in sempiternu.»

⁵⁹ Cusì dissi Ghjesù quand'eddu insignaia in a sinagoga in Cafarnau.

I paroli di a vita eterna

⁶⁰ Tandu parechji di i so discipuli chì aiani intesu dissini: «hè dura issa parola! Quali a pò senta?»

⁶¹ Ma Ghjesù, chì sapia in sè stessu chì i so discipuli diciulaiani nantu à issu particulari, li dissi: «vi scandalizeghja issu discorsu?

⁶² È sì vo' vidissiti u Fiddolu di l'Omu cuddà induva eddu era prima?

⁶³ Hè u Spiritu, quiddu chì dà a vita, a carri ùn hè à ghjuvori micca; i paroli ch'e' vi aghju dittu, sò Spiritu è vita.

⁶⁴ Ma ci ni hè uni pochi di voi altri chì ùn credini,» chì da u principiu Ghjesù a sapia, quali eddi erani quiddi chì ùn cridiani, è quali l'aia da tradì.

⁶⁵ È dicia: «par quissa vi aghju dittu chì nimu pò vena ind'è mè, s'edda ùn li hè stata data da u Babbu.»

⁶⁶ Da tandu parechji di i so discipuli si tiretini in daretu è ùn andetini più cun eddu.

⁶⁷ Tandu Ghjesù dissi à i dodici: «soca vi ni vuleti andà ancu voi?»

⁶⁸ Simon' Petru li risposi: «o Signori, ind'è quali andariami? I paroli di vita eterna, l'ai tù

⁶⁹ è noi emu cridutu è sapiutu chì tù sè u Santu di Diu.»

⁷⁰ Ghjesù li risposi: «ùn socu eiu chì vi aghju sceltu, à voi, i dodici? È trà voi ci hè un diavuli.»

⁷¹ Dicia di Ghjuda, fiddolu di Simonu Iscariotu; chì era quiddu chì l'aia da tradì, quiddu, unu di i dodici.