Ghjuanni 5 - 4 Evangiles en Corse

Ghjesù guarisci un paraliticu

¹ Dopu, ci fù una festa di i Ghjudei è Ghjesù cuddeti in Ghjerusalema.

² È in Ghjerusalema, à cantu à a porta di i Pecuri, ci hè un bagnatoghju ch'eddi chjamani Betsata in abreiu, è chì hà cinqui archi.

³ Sottu à issi archi erani stracquati una mansa d' infermi, cechi, scianchi è paralizati.

⁴ […]

⁵ È quandì dà ci era un omu chì era infermu da trentottu anni in quà.

⁶ Ghjesù u visti stesu quandì dà, seppi ch'eddu era cusì da longu tempu, è li dissi: «voli essa risanatu?»

⁷ U infermu li risposi: «o Signori, ùn aghju à nimu chì mi possi fà entra in lu bagnatoghju quand'edda boddi l'acqua; chì, mentri ch'e vocu, fala un antru nanzi à mè.»

⁸ Ghjesù li dici: «arrizza ti, pidda u to catalettu è viaghja!»

⁹ È l'omu fù risanatu subitu, piddeti u catalettu è viaghjeti. Ed era un sabbatu quiddu ghjornu.

¹⁰ Si faci chì i Ghjudei diciani à l'omu guaritu: «hè sabbatu è ùn devi micca purtà u to catalettu.»

¹¹ Ma eddu li risposi: «quiddu chì mi hà risanatu mi hà dittu: pidda u to catalettu è viaghja.»

¹² Li dumandetini: «quali hè l'omu chì ti hà dittu: pidda è viaghja?»

¹³ Ma l'omu risanatu ùn sapia quali eddu era, chì Ghjesù era sparitu in la folla chì era quandì dà.

¹⁴ Da dopu, Ghjesù u infattò in u tempiu è li dissi: «a vedi, sè risanatu, ùn piccà più, ch'eddu ùn ti accadi peghju.»

¹⁵ L'omu isciti è feci sapè à i Ghjudei chì quiddu chì l'aia risanatu era Ghjesù.

¹⁶ È i Ghjudei erani appressu à Ghjesù, parch'eddu aia fattu cosi simuli in sabbatu.

¹⁷ Ma Ghjesù li rispundia: «u me Babbu travadda ancu ad avà, è ancu eiu travaddu.»

¹⁸ Par quissa i Ghjudei erani ancu più accaniti à fà lu mora, una par via ch'eddu ùn rispittaia micca u sabbatu, una antra, ancu peghju, parch'eddu dicia chì Diu era propiu u Babbu, è, cusì, si facia u paru di Diu.

U Puteri di u Fiddolu

¹⁹ Ghjesù risposi è dissi: «a vi dicu da veru, u Fiddolu ùn pò fà nudda da par eddu, for di ciò ch'eddu vedi fà da u Babbu; chì tuttu ciò ch'eddu faci u Babbu, u Fiddolu faci listessa.

²⁰ Chì u Babbu teni caru u Fiddolu è li metti à palesu tuttu ciò ch'eddu faci, è li palisarà opari ancu più maiò, chì vo' ni siati maraviddati.

²¹ Chì, com'è u Babbu sceta i morti è li dà a vita, cusì ancu u Fiddolu dà a vita à quali eddu voli.

²² Chì u Babbu ùn ghjudicheghja à nimu, ma u ghjudiziu l'hà datu sanu à u Fiddolu,

²³ da chì tutti unorini u Fiddolu com'eddi unorani u Babbu; à chì ùn unora u Fiddolu, mancu unora u Babbu chì u mandeti.

²⁴ A vi dicu da veru, à chì senti a me parola è credi in quiddu chì mi mandeti, hà a vita eterna, è ùn hè suttumissu à u ghjudiziu, ma hè passatu da a morti à a vita.

²⁵ A vi dicu da veru, veni l'ora — è ci semu — chì i morti ani da senta a boci di u Fiddolu di Diu è chì quiddi chì avarani intesu sarani vivi.

²⁶ Chì com'è u Babbu hà a vita in sè, cusì hà datu ancu à u Fiddolu d'avè a vita in sè.

²⁷ È li hà datu u puteri di ghjudicà, parch'eddu hè Fiddolu d'Omu.

²⁸ Ùn vi ni maraviddeti, chì veni l'ora chì tutti quiddi chì sò in i tombi ani da senta a so boci,

²⁹ è chì quiddi chì ani fattu u bè isciarani pà a risurrizzioni di a vita, è quiddi chì ani fattu u mali pà a risurrizzioni di u ghjudiziu.

³⁰ «Eiu da par mè ùn possu fà nudda; ghjudicheghju sicondu ciò ch'e' sentu, è u meiu u ghjudiziu hè ghjustu, parchì ùn cercu u meiu u vulè ma u vulè di quiddu chì mi mandeti.»

Tistimunianza par Ghjesù

³¹ «S'e' tistimunieghju par mè stessu, a me tistimunianza ùn hè vera.

³² Un antru tistimunieghja par mè, è socu ch'edda hè vera a tistimunianza ch'eddu mi faci.

³³ Eti mandatu ghjenti ind'è Ghjuvanni, ed eddu hà tistimuniatu pà a virità.

³⁴ Ma eiu, ùn ricevu micca tistimunianza da un omu, dicu cusì da chì vo' siati salvi.

³⁵ Quiddu era a lampada accesa è chì luci, è voi eti vulsutu ralicrà vi una stonda in a so luci.

³⁶ Ma eiu aghju una tistimunianza più alta cà quidda di Ghjuvanni; chì l'opari chì u Babbu mi hà datu ch'e' i cumpiissi, l'opari stessi ch'e' facciu, tistimunieghjani par mè, chì u Babbu mi hà mandatu.

³⁷ È eddu stessu, u babbu chì mi hà mandatu, hà tistimuniatu par mè, ùn eti mai intesu a so boci, nè vistu a so figura,

³⁸ è a so parola ùn l'eti micca in drentu à voi, posta chì vo' ùn criditi quiddu ch'eddu hà mandatu.

³⁹ Spizzicheti i Scritturi, parchì vo' criditi d'avè a vita eterna in eddi; ebbè, sò eddi chì tistimunieghjani par mè.

⁴⁰ È ùn vuleti vena ind'è mè par avè a vita.»

⁴¹ «Gloria da l'omini ùn ni ricevu

⁴² ma vi cunnoscu, a socu chì l'amor di Diu ùn l'eti in voi.

⁴³ Eiu socu vinutu in nomu di u me Babbu, è ùn mi riciviti; è s'eddu ni veni unu in nomu di sè stessu, quiddu l'éti da riceva.

⁴⁴ Comu pudeti creda, voi chì riciviti a gloria unu da l'altru, è mancu circheti a gloria chì veni da Diu solu?

⁴⁵ Ùn pinseti ch'e' avissi da essa eiu ad accusà vi davanti à u Babbu. Quiddu chì vi accusa hè Musè, in quali vo' eti missu a vostra spiranza.

⁴⁶ Chì sì vo' cridissiti in Musè, cridariati ancu in mè; chì quiddu hà scrittu à puntu di mè.

⁴⁷ È sì vo' ùn criditi i so Scritturi, comu cridareti i me ditti?»