Ghjuanni 21 - 4 Evangiles en Corse

Ghjesù vistu da i setti discipuli

¹ Da dopu, Ghjesù si paliseti dinò à i discipuli vicinu à u mari di Tiberiada; eccu com'eddu li cumparsi:

² erani insemu Simon Petru, Tumasgiu chjamatu Didimu, Natanaela di Canà di Galilea, i fiddoli di Zebedeu è altri è dui di i so discipuli.

³ Simonu Petru li dici: «vocu à piscà.» Li dicini: «vinimu ancu noi cù tecu.» Iscitini è si colsini in barca, ma quidda notti ùn piddetini nudda.

⁴ Era aghjà ghjornu; Ghjesù era quandì dà, à taddu di mari, ma i discipuli ùn sapiani ch'eddu fussi Ghjesù.

⁵ Tandu Ghjesù li dici: «o ziteddi, eti u cumpani? Ahù?» Dissini.

⁶ Eddu li dici: «lampeti a reta à dritta di a barca, è eti da piddà.» Cusì lampetini è, da tanti i pesci, ùn la di faciani mancu più à salpà.

⁷ Tandu u discipulu chì Ghjesù tinia caru dici à Petru: «hè u Signori.» Tandu Simon Petru, sintindu ch'eddu era u Signori, si missi a tunica, chì era nudu, è si ciutteti in mari.

⁸ È l'altri discipuli vultetini cù a barca ùn erani micca luntanu da a tarra, forsa à centu metri , tirendu a reta di i pesci.

⁹ Quand'eddi scaletini viditini un focu di brusta, cù pesciu è pani à nantu.

¹⁰ Ghjesù li dici: «purteti unipochi di issi pesci chì vo' eti piscatu avà.»

¹¹ Tandu Simon Petru cuddeti è tireti a reta, piena di pesci grossi: centu cinquanta trè; è Puru cù tanti pesci in drentu, a reta ùn istrappeti.

¹² Ghjesù li dici: «viniti à fà cuddazioni.» Ma nimu di i discipuli aia curaghju à dumandà li: «quali sè» Sapendu ch'eddu era u Signori.

¹³ Ghjesù veni, pidda u pani, u li dà, è faci listessa pà u pesciu.

¹⁴ Fù a terza volta ch'eddu si palisò à i discipuli dopu d'essa risuscitatu da frà li morti.

Ghjesù è Petru

¹⁵ Dopu cuddazioni, Ghjesù dici à Simon Petru: «o Simò di Ghjuvanni, mi teni caru più cà quisti?» Eddu li dici: «isiè, o Signori, a sai ch'e' ti voddu bè.» Ghjesù li dici: «fà pascia i me agneddi.»

¹⁶ Li dici dinò una siconda volta: «o Simò di Ghjuvanni, mi teni caru?» Eddu li dici: «Isiè, o Signori, a sai ch'e' ti voddu bè.» Ghjesù li dici: fà pascia i me pecuri.

¹⁷ Li dici pà a terza volta: o Simò di Ghjuvanni, mi voli bè? Petru fù afflittu chì u Signori li abbii dumandatu pà a terza volta: «mi voli bè?» È risposi: «o Signori, tù chì sai tuttu, a sai po ch'e' ti voddu bè.» (Ghjesù) li dici: «fà pascia i me pecuri.

¹⁸ A ti dicu da veru, quand'ì tù eri ziteddu, ti mittii a cinta è andaii duv'è tù vulii; vechju chì tù sarè, purghjarè i to mani, è un antru ti mittarà a cinta, è ti purtarà induv'è tù ùn voli.»

¹⁹ Cusì dicendu, insignaia com'eddu aia da mora Petru, da glurificà à Diu; è, dopu parlatu cusì, li dici: «suveta mi.»

Ghjesù è u discipulu caru

²⁰ Vultatu si, Petru visti chì u discipulu chì Ghjesù tinia caru i suvitaia, quiddu chì in lu mentri di a cena li si era avvicinatu è aia dittu: «o Signori, quali ti hà da tradì?»

²¹ Tandu videndu lu Petru dici à Ghjesù: «o Signori, è d'eddu chì ni sarà?»

²² Ghjesù li dici: «s'e' voddu ch'eddu fermi insinu à ch'e' ghjunghi, chì ti pò fà? Tù suveta mi.»

²³ Cusì corsi a boci ind'è i frateddi, chì quiddu u discipulu ùn muraria; ma Ghjesù ùn li aia micca dittu ch'eddu ùn muraria, ma: «s'e' voddu ch'eddu fermi insinu à ch'e' ghjunghi, [chì ti pò fà?]»

²⁴ Hè quiddu discipulu chì tistimunieghja di issi cosi è chì l'hà scritti, è sapemu ch'edda hè vera a so tistimunianza.

²⁵ Ghjesù feci dinò parechji altri cosi, chì s'eddi s'avissini da scriva ad una ad una, crergu chì mancu u mondu pudaria tena i libri scritti.