Ghjuanni 13 - 4 Evangiles en Corse

Ghjesù lava i pedi à i discipuli

¹ Nanzi a festa di a Pasqua, sapendu ch'edda era ghjunta l'ora di passà da issu mondu ind'è u Babbu, Ghjesù chì aia tinutu caru i soi in u mondu i tensi sinu à a fini.

² È mentri ch'eddi faciani cena, u diavuli aia aghjà missu l'idea di tradiscia lu in u cori di Ghjuda fiddolu di Simonu l'Iscariotu;

³ Ghjesù, sapendu chì u Babbu l'aia missu tuttu in manu, sapendu dinò ch'eddu era vinutu da Diu è à Diu andaia,

⁴ s'arrizzeti da u pranzu, spuniti a so vistitoghja, piddeti un pannu è u si cinsi.

⁵ Dopu, lampeti l'acqua in u bazzì è missi à lavà i pedi di i discipuli è à asciuvà li cù u pannu ch'eddu si era cintu.

⁶ Cusì ghjunsi à Simon Petru; quiddu li dici: «o Signori, tù mi ai da lavà i pedi?»

⁷ Ghjesù risposi è li dissi: «ciò ch'e' facciu, ùn la sai avà, ma a saparè dopu.»

⁸ Petru li dici: «mai ch'edda ni sia chì tù mi lavi tù i pedi?» Ghjesù li risposi: «s'e' ùn ti lavu, mancu sarè chjamatu à sparta cù mecu?»

⁹ Simon Petru li dici: «o Signori, ùn solu i pedi, ma ancu i mani è u capu.»

¹⁰ Ghjesù li dici: «à chì si hè bagnatu, ùn hà più bisognu di lavà si, ma hè Puru sanu sanu; è voi seti puri, ma micca tutti.»

¹¹ Chì cunniscia quiddu chì l'aia da tradiscia; par quissa dissi: «ùn seti micca puri tutti.»

¹² Cusì, lavatu ch'eddu li ebbi i pedi piddeti dinò a so vistitoghja è si attavulineti dinò. Li dissi: «a capiti ciò ch'e' aghju fattu par voi?

¹³ Voi mi chjameti “u Maestru” è “u Signori” è diti bè, chì socu eiu.

¹⁴ Cusì sì eiu, chì socu u Signori è u Maestru, vi aghju lavatu i pedi, ancu à voi vi tocca à lavà vi i pedi trà voi.

¹⁵ Chì l'asempiu u vi aghju datu, da chì vo' fiati trà voi com'e' aghju fattu eiu à voi.

¹⁶ A vi dicu da veru, ùn ci hè schiavu chì sia più altu cà u so signori, nè mandataghju chì sia più altu cà quiddu chì u mandeti.

¹⁷ Biatu à voi sì voi a sapeti è a feti.

¹⁸ Ùn parlu micca di voi tutti; a socu eiu, quiddi ch'e' aghju sceltu; ma ch'edda venghi cumpiita cusì a Scrittura: Quiddu chì manghja u me pani hà pisatu u calcagnu contru à mè.

¹⁹ A vi dicu da avà, prima ch'edda accadi, chì quand'edda accadarà, chì vo' crerghiti ch'Eiu socu.

²⁰ A vi dicu da veru, à chì ricevi quiddu ch'e' mandu, ricevi à mè, à chì mi ricevi ricevi quiddu chì mi mandeti.»

Ghjesù annuncia ch'eddu sarà traditu

²¹ Dopu dittu cusì, Ghjesù fù affannatu assai, tistimunieti è dissi: «a vi dicu da veru, unu di voi m'hà da tradiscia.»

²² I discipuli si fighjulaiani, dumandendu si di quali eddu parlaia.

²³ Unu di i discipuli era attavulinatu à cantu à Ghjesù, era quiddu chì Ghjesù tinia caru.

²⁴ Tandu Simon Petru li feci mottu ch'eddu dumandessi à Ghjesù di quali eddu parlaia.

²⁵ È quiddu avvicinendu si à Ghjesù li dici: «o Signori, quali hè?»

²⁶ Ghjesù li rispondi: «quiddu ch'e' li aghju da intigna un pezzu di pani è dà di lu.» Tandu, (pidda) è intigni u pezzu di u pani è u dà à Ghjuda fiddolu di Simonu l'Iscariotu.

²⁷ Manghjatu u pezzu, Satanassu intriti in Ghjuda. Tandu Ghjesù li dissi: «ciò chì tù fai, fà la prestu.»

²⁸ Nimu di quiddi chì erani à tola sapia parchì eddu a dicia.

²⁹ Com'è Ghjuda guvarnaia i soldi, unipochi cuntaiani chì Ghjesù li dicissi: «compra ciò chì ci accorri pà a festa» o «dà calcosa à i povari.»

³⁰ Piddatu ch'eddu ebbi u pezzu, quiddu isciti subitu. Era notti.

U cummandu novu

³¹ Isciutu ch'eddu fù, Ghjesù dici: «avà hè statu glurificatu u Fiddolu di l'Omu, è Diu hè statu glurificatu in eddu.

³² [Sì Diu hè statu glurificatu in eddu], ancu Diu l'hà da glurificà in sè, è l'hà da glurificà prestu.

³³ O fidduleddi, socu sempri cù voscu, par pocu; mi circareti, ma com'e' dissi à i Ghjudei: induv'e' vocu, ùn ci pudeti vena, avà a dicu ancu à voi.

³⁴ Vi docu un cummandu novu: tiniti vi cari, com'e' vi aghju tinutu cari, ancu voi tiniti vi cari trà voi.

³⁵ Cusì sì voi vi vuleti bè trà voi saparani tutti chì vo' seti i me discipuli.»

Annuncia chì Petru u rinigarà

³⁶ Simon Petru li dici: «o Signori, induva vai?» Ghjesù li risposi: «induv'e' vocu ùn mi poi micca suvità avà, mi suvitarè dopu.»

³⁷ Petru li dici: «o Signori, comu hè ch'e' ùn ti possu suvità avà? Par tè lacaraghju u fiatu.»

³⁸ Ghjesù rispondi: «lacarè u fiatu par mè? A ti dicu da veru, ùn avarà cantatu u ghjaddu chì tù ùn m'abbii rinigatu trè volti.»