Ghjuanni 12 - 4 Evangiles en Corse

L'unzioni in Betania

¹ Or sei ghjorni nanzi à a Pasqua, Ghjesù ghjunsi in Betania, u paesi di Lazaru ch'eddu aia risuscitatu da frà li morti.

² Cusì li fecini fà cena quandì dà, Marta sirvia, è Lazaru era unu di quiddi chì erani à tola cun eddu.

³ Maria piddeti u parfumu, una libra di nardu Puru di altu valori, ni unsi i pedi di Ghjesù, è i li asciuveti cù i so capeddi; è a casa s'impiiti di quiddu parfumu.

⁴ È Ghjuda l'Iscariotu, unu di i so discipuli, quiddu chì l'aia da tradì, dissi:

⁵ «è comu hè po di ùn avè vindutu issu parfumu par trecentu pezzi d'arghjentu, chì l'avariami dati à i povari?»

⁶ Dissi cusì, micca par primura di i povari, ma parchì eddu era latru è chì, tinendu a scatula di i soldi, si piddaia ciò chì era lampatu.

⁷ Tandu Ghjesù dissi: «lascia la farè! Ch'edda u tenghi pà u ghjornu di u me intarru.

⁸ Chì i povari l'aveti sempri cù voscu, ma à mè, ùn mi avareti micca sempri.»

Cumplottu contru à Lazaru

⁹ Cusì a folla maiò di i Ghjudei seppi ch'eddu era quandì dà, è ghjunsini, ùn solu par via di Ghjesù, ma ancu par veda à Lazaru ch'eddu aia risuscitatu da frà li morti.

¹⁰ È i capisacerdoti diciditini di fà tumbà ancu à Lazaru,

¹¹ chì parechji di i Ghjudei si ni andaiani par via d'eddu è cridiani in Ghjesù.

Intrata triunfali in Ghjerusalema

¹² U dopu ghjornu a folla maiò di quiddi chì erani ghjunti pà a festa, sintendu chì Ghjesù vinia in Ghjerusalema,

¹³ piddetini rami di palmu è iscitini à scuntrà lu briunendu: «Osannà! Binadettu quiddu chì veni in nomu di u Signori, u Rè d'Israela !»

¹⁴ Ghjesù truveti un samireddu è si colsi, com'edda hè scritta:

¹⁵ ùn tema, o fiddola di Sion. Mì, u to Rè ghjunghji, à dossu à u fiddolu di un sameri .

¹⁶ Quissa, i so discipuli ùn la capitini micca subitu, ma quand'ì Ghjesù fù glurificatu, tandu si ricurdetini ch'edda era stata scritta è ch'eddi l'aiani fatta.

¹⁷ A folla chì era cun eddu quand'eddu chjameti à Lazaru da a tomba è u risusciteti da frà i morti li facia da tistimoniu.

¹⁸ Par quissa dinò, parchì eddi aiani intesu ch'eddu aia fattu issu segnu miraculosu, a folla andeti à truvà lu.

¹⁹ Tandu i Farusei dissini trà eddi: «a videti chì ùn vinciti nudda? Mì chì li hè partutu à daretu u mondu sanu?»

I Grechi cù Ghjesù

²⁰ Trà a ghjenti chì cuddaia à inghjinuchjà si pà a festa, ci era unipochi di Grechi

²¹ andetini à truvà à Filippu di Betsaida di Galilea è u intarrughetini dicendu: «o signori, vulemu veda à Ghjesù.»

²² Filippu và è a dici à Andria, è po vani Filippu è Andria è a dicini à Ghjesù.

²³ Ghjesù li rispondi è dici: «hè vinuta l'ora ch'eddu sia glurificatu u Fiddolu di l'Omu.

²⁴ A vi dicu da veru, s'eddu ùn mori u graneddu di u granu cascatu in tarra, stà solu. Ma s'eddu mori, dà u fruttu assai.

²⁵ À chì teni caru a so anima a perdi, à chì odia a so anima in issu mondu a tinarà pà a vita eterna.

²⁶ À chì mi servi, ch'eddu mi suveti, è induv'e' socu eiu, quandì dà sarà ancu u me servu; à chì mi servi, u me Babbu li farà onori.»

U Fiddolu di l'Omu devi essa inalzatu

²⁷ «Avà a me anima hè in ì l'affannu, è chì aghju da dì? O Babbu, salva mi da st'ora? Ma hè par quissa ch'e' socu ghjuntu sinu à st'ora.

²⁸ O Bà, glurificheghja u to nomu.» Tandu vensi una boci da u celi: «aghju glurificatu è aghju da glurificà dinò.»

²⁹ A folla prisenti è chì sintia dissi: «hè statu u sonitu»; altri diciani: «un agnulu li hà parlatu.»

³⁰ Ghjesù risposi è dissi: «issa boci ùn hà parlatu par via di mè, ma par via di voi.

³¹ Avà hè u ghjudiziu di issu mondu, avà u capu di issu mondu hà da essa lampatu fora;

³² ed eiu quand'e' saraghju inalzatu da a tarra, traiaraghju à tutti insini à induv'è socu eiu.»

³³ Cusì dissi mintuvendu di chì morti ch'eddu aia da mora.

³⁴ A folla li risposi: «noi emu amparatu da a Legi chì u Missia ferma in sempiternu, comu hè chì tù dici ch'eddu ci voli ch'eddu sia inalzatu u Fiddolu di l'Omu? Quali saria po issu Fiddolu di l'Omu?»

³⁵ Tandu Ghjesù li dissi: «A luci hè sempri cù voscu, par pocu. Viaghjeti fin chì vo' aveti a luci, ch'eddu ùn vi piddi u bughju; è à chì viaghja à u bughju ùn sà induva eddu và.

³⁶ Fin chì vo' aveti a luci, criditi in a luci, par divintà fiddoli di a luci.» Cusì dissi Ghjesù, poi si ni andeti è si piatteti da eddi.

I Ghjudei chì ùn credini

³⁷ Ma ancu par avè li fattu veda tanti segni miraculosi, ùn cridiani in eddu,

³⁸ da ch'edda vinissi cumpiita a parola di u Prufeta Isaia, chì dissi: o Signori, quali hà cridutu ciò chì no' emu intesu? È à quali fù palesu u bracciu di u Signori ?

³⁹ Par quissa ùn pudiani creda, parchì Isaia hà dittu dinò:

⁴⁰ hà accicatu i so ochji è induritu i so cori ch'eddi ùn vechini cù l'ochji, ch'eddi ùn capischini cù u cori è cunvirtì si è ch'e' i risani .

⁴¹ Cusì dissi Isaia, parchì eddu aia vistu a so gloria è parlaia d'eddu.

⁴² Ma quantunqua, ancu trà i principali, parechji criditini in eddu, ma, par via di i Farusei, ùn la palisaiani, par ùn essa missi fora da a sinagoga;

⁴³ chì li piacia a gloria di l'omini più cà a gloria di Diu.

A parola di Ghjesù sarà u ghjudiziu

⁴⁴ Ghjesù dissi à boci rivolta: «à chì credi in mè ùn credi in mè ma in quiddu chì mi mandeti,

⁴⁵ è à chì mi fighjula fighjula quiddu chì mi mandeti.

⁴⁶ Eiu, a luci, socu vinutu in u mondu, chì quiddu chì credi in mè ùn stia in u bughju.

⁴⁷ È à chì senti i me paroli è ùn li teni, eiu ùn lu ghjudicheghju, chì ùn socu micca vinutu à ghjudicà u mondu, ma à salvà u mondu.

⁴⁸ À chì mi ricusa è ùn ricevi i me paroli hà u so ghjudici: hè a parola ch'e' aghju dittu chì u ghjudicarà in l'ultimu ghjornu.

⁴⁹ Parchì ùn parlu micca da par mè, u me Babbu chì mi hà mandatu mi hà cummandatu ciò ch'e' devu dì è annuncià.

⁵⁰ È a socu chì u so cummandu hè vita eterna; ciò ch'e' vi dicu, a dicu com'è u Babbu l'hà ditta à mè.»