Ghjuanni 10 - 4 Evangiles en Corse

A parabula di u pastricciali

¹ «A vi dicu da veru, quiddu chì ùn entri pà u cataru in a chjostra di i pecuri, ma ci ghjunghji pà in altrò, hè un latru è un banditu;

² ma quiddu chì ci entri pà u cataru hè u Pastori di i pecuri.

³ À eddu u guardianu li apri a porta, i pecuri sentini a so boci, ed eddu chjama i so pecuri, ugnuna di nomu è i faci escia.

⁴ Quand'eddu faci escia tutti i so pecuri, li viaghja nanzi, è i pecuri u suvetani, chì cunnoscini a so boci.

⁵ Ma un frusteru ùn lu suvitarani è scapparani, parchì a boci di i frusteri ùn la cunnoscini.»

⁶ Ghjesù li dissi stu asempiu, ma eddi ùn capitini ciò ch'eddu dicia.

Ghjesù u Pastori bonu

⁷ Ghjesù dissi dinò: «da veru a vi dicu, eiu socu u cataru di i pecuri.

⁸ Tutti quiddi chì sò vinuti nanzi à mè sò latri è banditi, ma i pecuri ùn l'ani micca stati à senta.

⁹ Eiu socu u cataru: si unu passa par mè sarà salvu, intrarà è isciarà, è truvarà i pascuri.

¹⁰ U latru ùn veni cà par furà, pulsà è tumbà; eiu socu ghjuntu da ch'eddi abbiini a vita, è ch'eddi l'abbiini à voli ni più.

¹¹ Eiu socu u Pastori bonu; u Pastori bonu dà a so vita pà i so pecuri;

¹² u servu chì ùn hè Pastori è chì i pecuri ùn sò i soii, guarda u lupu chì veni, si laca i pecuri è scappa è u lupu i si pidda è i sparguddeghja,

¹³ parchì eddu hè pacatu è di i pecuri ùn ni hà primura.

¹⁴ Eiu socu u Pastori bonu, cunnoscu i me pecuri è i me pecuri mi cunnoscini,

¹⁵ com'eddu mi cunnosci u Babbu, è chì eiu cunnoscu u Babbu, è docu a me vita pà i me pecuri.

¹⁶ Ed aghju altri pecuri chì ùn sò micca di issa chjostra; ancu quiddi, mi tocca à fà li rientra è sintarani a me boci, è sarà una banda sola, è un Pastori solu.

¹⁷ Par quissa u Babbu mi teni caru, parch'e' docu a me vita, par riacquistà la.

¹⁸ Nimu a mi togli, ma a docu da par mè. Aghju u puteri di dà la, è aghju u puteri di riacquistà la; issu cumandu l'aghju ricivutu da u me Babbu.»

¹⁹ È ci fù dinò a divisioni ind'è i Ghjudei par via di issi paroli.

²⁰ Chì parechji d'eddi diciani: «hà un dimoniu, è svarieghja; ma chì u steti à senta?»

²¹ Altri diciani: «issi paroli ùn sò di unu indimuniatu; soca un dimoniu pò apra l'ochji di i cechi?»

Ghjesù ricusatu da i Ghjudei

²² Tandu ci fù a festa di a Dedica di u Tempiu in Ghjerusalema. Era l'inguernu,

²³ Ghjesù spassighjaia in u tempiu, sottu à u portacu di Salamonu.

²⁴ L'accampetini i Ghjudei è li dissini: «insini à quandu ci avarè da tena infurficati? Sì tù sè u Missia, dì la ci à palesu!»

²⁵ Ghjesù li risposi: «a vi aghju ditta è ùn criditi; l'opari ch'e' facciu in nomu di u me Babbu, sò eddi chì tistimunieghjani par mè;

²⁶ ma voi ùn criditi, parchì ùn seti di i me pecuri.

²⁷ I mei i pecuri sentini a me boci, ed eiu i cunnoscu, è mi suvetani,

²⁸ Ed eiu li docu a vita eterna, ùn si pirdarani mai è nimu i cacciarà da in manu à mè.

²⁹ U me Babbu chì i mi deti hè più altu cà tutti, è nimu i pò caccià da in manu à u Babbu.

³⁰ Trà mè è u Babbu, semu unu solu.»

³¹ I Ghjudei accolsini dinò petri par tumbà lu à pitrati.

³² Ghjesù li risposi: «vi aghju fattu veda parechji opari beddi chì venini da u Babbu; par qualessa di issi opari mi tumbeti à pitrati?»

³³ I Ghjudei li rispunditini: «micca pà una opara bedda, ma pà a ghjastema, è parchì tù, chì sè un omu, ti fai Diu.»

³⁴ Ghjesù li risposi: «ùn hè scritta in a vostra Legi: aghju dittu: seti Dii?

³⁵ A Legi chjama “Dii” quiddi chì a parola di Diu li hè stata mandata, è ùn si pò squassà a Scrittura.

³⁶ È à mè, quiddu chì u Babbu hà santificatu è mandatu in u mondu, mi diti “ghjastemi” parch'e' aghju dittu: socu u Fiddolu di Diu?

³⁷ S'e' ùn facciu l'opari di u me Babbu, ùn mi criditi puri;

³⁸ ma s'e' i facciu, ancu sì vo' ùn criditi à mè, criditi in ì l'opari, chì vo' sappiiti chì u Babbu hè in mè, ed eiu in lu Babbu.»

³⁹ Eddi pruvetini (dinò) à arristà lu, ma li scappeti da in mani.

⁴⁰ È andeti dinò da Ghjurdanu in dà, induv'eddu battizava prima Ghjuvanni, è ci steti.

⁴¹ È parechji andetini à truvà lu è diciani: «Ghjuvanni segni miraculosi ùn ni hà fattu nisciunu, ma tuttu ciò ch'eddu hà dittu Ghjuvanni à puntu di quissu era vera.»

⁴² È parechji criditini in eddu quandì dà.