Eabhraigh 5 - Tiomna Nua 1951 (de Siúnta)

¹ Óir gach árd‐shagart d’á dtógtar as lár na ndaoine, órduightear é ar son na ndaoine san méid bhaineas le Dia chum tíodhlaicthe agus íodhbartha d’ofráil ar son na bpeacadh:

² agus is fear é, gur féidir leis gan bheith ro‐dhian ar na daoinibh théigheas amudha tré aineolas, de chionn nach bhfuil sé féin gan a chion féin de’n laige.

³ Ar an adhbhar sin atá d’fhiachaibh air íodhbairt do dhéanamh i n‐éiric na bpeacadh, ní h‐é amháin ar son an phobail, acht ar a shon féin, leis.

⁴ Agus ní ghlacann aon duine an onóir seo chuige féin, acht amháin nuair gheibheann sé an ghairm ó Dhia, mar fuair Aáron.

⁵ Ar an gcuma chéadna níorbh uaidh féin do ghlac Críost an onóir chuige féin go ndéanfaidhe sagart de, acht ó’n té adubhairt leis, Is tusa mo Mhac, Indiu do gheineas thú:

⁶ mar adubhairt sé i n‐áit eile, leis, Is sagart go síorraidhe thú, Do réir úird Mhelcisidec.

⁷ Is eisean, i laethibh a fheola, tar éis urnaighthe agus athchuingthe d’ofráil, le h‐árd‐ghol agus le deoraibh chum an té go raibh ar chumas dó a shaoradh ó’n mbás, agus gur h‐éisteadh leis as ucht a naomh‐eagla,

⁸ is eisean, gidh gur Mhac é, d’fhoghlaim umhlacht de bhárr ar fhulaing sé:

⁹ agus tar éis dó teacht i bhfoirbhtheacht, do bhí sé mar ughdar slánuighthe shíorraidhe do na daoinibh go léir umhluigheas dó;

¹⁰ d’á ainmniú ag Dia mar árd‐shagart do réir úird Mhelcisidec.

¹¹ Tá mórán againn le rádh ’n‐a thaobh‐san, agus is deacair a mhíniú de chionn go bhfuil maill‐eisteacht oraibh.

¹² Óir nuair ba cheart daoibh fá’n am so bheith ’n‐bhur múinteoiribh, is amhlaidh atá gábhadh agaibh le duine do mhúinfeadh céad‐riaghlacha briathair Dé dhaoibh; agus atá sibh i riocht daoine gur mó atá bainne d’uireasbaidh oraibh’ ná biadh tacamhail.

¹³ Óir gach duine beathuightear ar bhainne, atá sé gan taithighe ar bhriathar na fíréantachta: leanbh is eadh é.

¹⁴ Acht is le h‐aghaidh daoine fásta atá an biadh tacamhail, le h‐aghaidh na ndaoine a mbíonn sé de chleachtadh ag a gcéadfaidhibh corpardha an mhaith d’aithint thar an olc.