Eabhraigh 3 - Tiomna Nua 1951 (de Siúnta)

¹ Uime sin, a bhráithre naomhtha, a rannpháirtidhthe san ngairm neamhdha, breathnuighidh Abstal agus Árd‐Shagart an chreidimh admhuighmíd, Íosa Críost;

² do bhí dílis do’n té d’órduigh é, mar bhí Maois ’n‐a thigh‐sean uile.

³ Óir do measadh gurbh fhiú eisean onóir san mbreis ar Mhaois, san méid gur mó an onóir atá ag dul do’n té do thóg an teach ’ná do’n tigh féin.

⁴ Óir do thóg duine éigin gach teach; acht is é Dia do thóg gach a bhfuil ann.

⁵ Agus go dearbhtha, do bhí Maois dílis mar sheirbhíseach ’n‐a thigh‐sean uile, chum fiadhnaise do thabhairt ar na neithibh do bhí le h’innsin ’n‐a dhiaidh sin;

⁶ acht is amhlaidh atá Críost mar Mhac os cionn tighe Dé; agus is sinne a theach‐san, acht ár muinighin agus an dóchas atá mar adhbhar glóire againn do chongbháil go daingean go deireadh.

⁷ Uime sin, mar deir an Spiorad Naomh, Indiu, má chluineann sibh a ghuth,

⁸ Ná cruadhuighidh bhúr gcroidheacha, amhail le linn na ceannairce, Amhail i lá an chathuighthe san bhfásach,

⁹ San áit ’n‐a ndearna bhur sinnsir frómhadh orm, Agus ’n‐a bhfacadar m’oibreacha ar feadh dhá fhichid bliadhan.

¹⁰ D’á bhrigh sin do bhíos i bhfeirg leis an ngeinealach úd; Agus adubhart, Bíonn siad i gcómhnaidhe ag dul amudha ’n‐a gcroidhe: Agus do bhíodar gan eolas ar mo shlighthibh;

¹¹ Mar mionnuigheas im’ fheirg, Ní rachaidh siad isteach im’ shuaimhneas.

¹² Tabhraidh aire, a bhráithre, ar eagla go mbéadh droch‐chroidhe dí‐chreidmheach am ar bith i n‐aon duine agaibh, go dtréigfeadh sibh an Dia beo:

¹³ acht bidhidh ag brostú a chéile lá i ndiaidh lae, a fhaid agus glaodhtar An Lá Indiu air; ar eagla go gcruadhóchaidhe aon duine

¹⁴ agaibh le meabhlaireacht an pheacaidh óir do rinneadh sinn rannpháirteach le Críost, acht go gcongbhuighmíd ár gcéad mhuinighin go deireadh;

¹⁵ a fhaid agus deirtear, Indiu, má chluineann sibh a ghuth, Ná chruadhuighidh bhur gcroidheacha, amhail le linn na ceannairce.

¹⁶ Óir ciarbh iad do chuala agus do rinne ceannairc? Nárbh iad‐san go léir tháinig as an Éigipt i n‐éinfheacht le Maois iad?

¹⁷ Agus cia leo go raibh Dia i bhfeirg ar feadh dhá fhichid bliadhan? Nárbh iad‐san do rinne peacadh iad, gur thuit a gcuirp san bhfásach?

¹⁸ Agus ciarbh iad gur dhearbhuigh sé dhóibh nach racaidís isteach ’n‐a shuaimhneas, acht iad‐san amháin do bhí easumhal?

¹⁹ Chímíd, d’á bhrigh sin, nár fhéadadar dul isteach ann mar gheall ar easbaidh creidimh.