2 Corantaigh 6 - Tiomna Nua 1951 (de Siúnta)

¹ Agus ag obair i n‐éinfheacht leis dúinne, impighmíd oraibh gan grása Dé do ghlacadh go díomhaoin.

² Óir dubhairt sé, I n‐am oireamhnach d’éisteas leat, Agus i ló an tslánuighthe do chabhruigheas leat. Féach, anois an t‐am oireamhnach; féach, anois lá an tslánuighthe; gan adhbhar tuislidh do thabhairt d’aon duine,

³ chum nach bhfaghtar locht ar ár miniostrálacht;

⁴ acht cruthaimís gur seirbhísigh Dé sinn, i bhfoighid mhóir,

⁵ i gcruadhtan, i riachtanas, i ngéibheann, i mbuillibh, i bpríosúnaibh, i n‐achrannaibh, i ndian‐tsaothar, i bhfaireachán, i dtroscaidhibh;

⁶ i ngeanmhaidheacht, i n‐eolas, i bhfad‐fhulang, i gcáirdeamhlacht, san Spiorad Naomh,

⁷ le grádh gan ceilg, i mbriathar na fírinne, i gcumhacht Dé; le h‐armaibh fíréantachta i gcómhair na láimhe deise agus clé,

⁸ fá onóir agus fá easonóir, fá dheagh‐chlú agus fá mí‐chlú; mar mhealltóirí,

⁹ acht mar dhaoine fíora; mar dhaoine nach n‐aithnightear, acht aithnightear ’n‐a aimhdheoin sin; mar dhaoine atá ag saothrú an bháis, agus, féach, atáimíd beo; mar dhaoine curtar fá smacht, gan bheith marbhtha;

¹⁰ mar dhaoine brónacha, acht ag déanamh áthais i gcómhnaidhe; mar dhaoine bochta, acht ag bronnadh saidhbhris ar a lán; mar dhaoine nach bhfuil rud ar bith aca, acht gur leo gach uile rud.

¹¹ A Choirinnteacha, atá ár mbéal ar fhoscailt daoibh, atá fairsinge croidhe againn.

¹² Ní fhuil aon chumhangas croidhe againn ’n‐bhur dtaobh, acht is ’n‐bhur gcroidheachaibh atá an cumhangas.

¹³ Anois, chum cúiteamh de’n tsaghas céadna do thabhairt damh‐sa (ag labhairt mar labharfainn lem’ cháirdibh féin atáim), bidhidh fairsing mar an gcéadna.

¹⁴ Ná bidhidh fá chuing i n‐éinfheacht le lucht dí‐chreidimh: óir cia an cáirdeas atá ag fíréantacht le h‐éagcóir? nó cia an cumann atá ag an solas leis an dorchacht?

¹⁵ Agus cia an chómhaontú atá ag Críost le Bélial? nó cia an chuid atá ag an duine chreideas agus ag an duine nach gcreideann le chéile?

¹⁶ Agus cia an cóimhcheangal atá idir teampall Dé agus íodhla? óir is sinne teampall Dé bhí; mar adubhairt Dia, Déanfad cómhnaidhe ’n‐a measc, agus siubhalfad ’n‐a measc; béidhead‐sa im’ Dhia aca, agus béidhid‐sean ’n‐a bpobal agam‐sa.

¹⁷ D’á bhrigh sin, Tagaidh amach as a lár, Agus bidhidh ar deaghailt, Adeir an Tighearna, Agus ná bíodh aon bhaint agaibh leis an rud neamh‐ghlan; Agus glacfad chugam sibh,

¹⁸ Agus béidhead mar Athair agaibh, Agus béidh sibh‐se mar chlann‐mhac agus mar chlann‐inghean agam, adeir an Tighearna Uile‐chumhachtach.