Gníomhartha 25 - Na Cheithre Soisgéil agus Gníoṁartha na n-Aspol 1915 1921 (Peadar Ua Laoghaire)

CAIBIDIOL XXV. Caesar dhá ghairm ag Pól. Is áil le h-Agrippa, an Rí, eirteacht leis.

¹ Trí lá tar éis teacht d’ Fhéstus sa cheanntar chuaidh sé suas ó Chaesaréa go Ierúsalem.

² Agus tháinig uachtaráin na sagart agus uaisle na nIúdach ag triall air i gcoinnibh Phóil agus bhíodar a d’iarraidh achainíghe air,

³ A d’iarraidh go mbead sé fábhramhail dóibh ’n-a choinnibh, go n-órdóchadh sé é thabhairt go Ierúsalem, agus bhí ceilg déanta acu chun go marbhóchaidís é ar an slige.

⁴ Ach dubhairt Féstus go gciméadfí Pól i gCaesaréa agus go mbeadh sé féin ag dul ann go luath.

⁵ Agus, ar seisean, na daoine ar bhúr measg-sa atá ábalta air, téidís síos i n-aonfheacht liom agus má tá coir déanta ag an nduine cuiridís ’n-a leith í.

⁶ Níor fhan sé ’n-a measg ach ocht lá nú deich lá ’n-a dhiaidh san, agus chuaidh sé síos go Caesaréa agus an lá n-a dhiaidh san do shuidh sé sa tribúnal agus d’órduigh sé Pól a thabhairt ’n-a láthair.

⁷ Do thugadh, agus do sheasaimh ’n-a thimpal na daoine tháinig anuas o Ierúsalem, agus chuireadar a lán neithe troma’n-a leith, ach níor fhéadadar iad a dheimhniú,

⁸ Mar dhein Pól iad do fhreagairt: Ní’l coir déanta agam i n-aghaid dlighe na nIúdach, ná i n-aghaidh an teampuill, ná i n-aghaidh Chaesair.

⁹ Ba mhian le Féstus, ámh, comaoine chur ar na Iúdaígh agus dubhairt sé, ag freagairt Phóil: an maith leat dul suas go Ierúsalem agus go dtabharfí breith ort ansan am láthair-se, i dtaobh na neith seo? Annsan dubhairt Pól: Táim am sheasam ag tribiúnal Chaesair.

¹⁰ Is ann is ceart breith do bhreith orm. Ni’l coir déanta i n-aghaidh na nIúdach agam, mar is eól duit-se go dianmhaith.

¹¹ Má tá coir déanta agam, ná aon nídh do thuillfeadh bhás, ní’l aon chur i gcoinnibh an bháis agam; ach mura bhfuil aon nídh amhlaidh, de sna neithibh seo atá acu á chur am leith. ní’l ar chumas aon duine me thabhairt suas dóibh. Gairmim Caesar.

¹² Ansan do labhair Féstus leis an gcómhairle, agus d’fhreagair sé: Do ghairmis Caesar; go Caesar a raghair.

¹³ Agus nuair a bhí rainnt laethanta curtha dhíobh acu chuaidh Agrippa, an rí, agus Bernícé, síos go Caesaréa, ag fáiltiú roimh Fhéstus.

¹⁴ Dheineadar righneas ann ar feadh mórán laethanta agus d’innis Féstus do’n rí i dtaobh Phóil: Fear, ar seisean, a dh’fhág Féilics anso ’n-a phriosúnach,

¹⁵ Agus nuair a bhíos i nIerúsalem tháinig uachtaráin agus seanóirí na nIúdach chúgham ghá iarraidh orm é dhaoradh chun báis.

¹⁶ Dubhart leó nách é béas na Rómhánach aon duine dhaoradh chun báis gan lucht a chionntuighthe thabhairt os a chómhair agus caoi thabhart dó ar é féin do chosaint agus ar é féin do ghlanadh ar na coirthe.

¹⁷ Ach do thánadar anso láithreach, agus amáireach a bhí chúghainn do shuídeas sa tribiúnal agus d’órduigheas an fear a thabhairt am láthair.

¹⁸ Ansan d’eirigh na cionntuightheóirí ach níor chuireadar aon rud ’n-a leith n-ar fhéadas aon droch-nídh dh’feisgint ann.

¹⁹ Ach bhí ceisteana éigin acu ’n-a choinnibh a bhain le pé deismireacht creidimh atá acu féin, agus i dtaobh Íosa éigin a fuair bás agus go raibh Pól ’ghá rádh é bheith bheó.

²⁰ Níor mhaith liom féin aon bhaint a bheith agam le nídh de’n tsórd san agus d’fhiafraigheas de ar mhaith leis dul go Ierúsalem chun go dtabharfí breith air ins na neithibh sin.

²¹ Ach do dhein Pól gairm, go gcimeádfí é chun go n-aireó-chadh Augustus a chúis, agus d’orduígheas é chimeádh go gcuirfead ag triall ar Chaesar é.

²² Ansan dubhairt Agrippa le Féstus: Ba mhaith liom féin, leis, an fear san do chloisint. Cloisfir amáireach é, ar seisean.

²³ Amáireach a bhí chúghainn tháinig Agrippa agus Bernicé agus leathadh mór futha, agus chuadar isteach sa halla éisteachta, iad féin agus na tribiúin agus maithe móra na catharach, agus d’órduigh Féstus Pól a thabhairt ’n-a lathair.

²⁴ Ansan dubhairt Festus: Á rí Agrippa agus a fheara uile atá againn anso, chíonn sibh an duine sin. Nuair a bhíos i nIerúsalem thainig an pobul Iúdach go léir chúgham ’ghá iarraid orm agus ’ghá rádh i nguthanaibh árda nár cheart é bheith beó a thuille.

²⁵ Ach níor fhéadar féin a d’fheisgint go raibh aon rud déanta aige do thuillfeadh bás. Ach do ghairm sé féin Augustus agus tá socair agam ar é do chur chuige.

²⁶ Ní’l aon níd cruinn agam, ámh, le sgrí ’n-a thaobh ag triall ar mo thighearna. Uime sin do thugas anso chúghaibh-se é, agus chúgat-sa go mór mór, a rí Agrippa, go gceisteóchadh sibh é agus go mbeadh rud agam a sgrífinn.

²⁷ Óir measaim gur obair mhíréasúnta cime chur uaim agus gan a dh’innsint cad ’tá ’n-a choinnibh.