Gníomhartha 14 - Na Cheithre Soisgéil agus Gníoṁartha na n-Aspol 1915 1921 (Peadar Ua Laoghaire)

CAIBIDIOL XIV. Pól agus Barnabas ag seanmóiniú i n lcónium agus i Listra. Cláiríneach ’á leigheas. Daoine ghá mheas gur déithe iad. Gabhtar do chlochaibh ar Pól. Deinid siad seanmóiniú i nDerbhé agus i bPergé.

¹ Agus do thuit amach i n-Icónium go ndeaghadar isteach i n-aonfheacht i sinagóig na nIúdach agus gur dheineadar cainnt, i dtreó gur chreid sluagh líonmhar de sna Iúdaígh agus de sna Griéagaigh.

² Ach na Iúdaígh a bhí díchreideamhach, do ghríosadar agus do shéideadar suas chun feirge aigne na ngeinte i gcoinnibh na mbráithre.

³ Ach d’fhanadar mórán aimsire ann ag obair, agus a mainghín as an dTighearna, agus é ag déanamh fiadhnaise ar bhriathar a ghrásta, ag cur mírbhúiltí uathbhásacha d’á ndéanamh le n-a lámhaibh.

⁴ Bhí muinntir na catharach deighilte, ámhthach, cuid acu ag gabháil leis na Iúdaígh agus cuid acu ag gabháil leisna h-Aspuil.

⁵ Agus d’eirigh fuagar fé sna geintibh agus fé sna Iúdaígh, agus fé sna h-uachtaráin, chun iad do tharcuisniú agus gabháil do chlochalbh ortha,

⁶ Agus thuigeadar (an nídh sin) agus do theitheadar go Listra agus go Derbé, dhá chathair i Licaónia, agus go dtí an tír go léir mór-thímpall, agus bhíodar ag craobhsgaoile an tSoisgóil sa n-áit sin.

⁷ Agus bhí duine i Listra, n-a shuídhe, agus é ghan lút a chos ó fhagh sé bruinn a mháthar, agus níor shiúbhluigh sé riamh.

⁸ D’airigh an duine sin Pól ag cainnt. Agus d’fhéach Pól air agus chonnaic sé go raibh aige creideamh chun a slánuighthe,

⁹ Agus dubhairt sé do ghuth árd: Eirigh ad sheasamh ar do chosaibh! Agus do léim sé ’n-a sheasamh agus shiúbhluigh sé.

¹⁰ Agus nuair a chonnaic na daoine cad a bhí déanta ag Pól d’árdugheadar a nglór agus dubhradar, as Licaóinis: Táid na déithe, i riochtaibh daoine, tagaithe anuas chúgainn.

¹¹ Agus thugadar Iúpiter ar Bharnabas agus Mercurí ar Pól mar is aige bhí buadh cainnte.

¹² Agus bhí sagart le Iúpiter lasmuich de’n chathair agus thug sé leis tairbh agus coróinneacha, ar aghaidh an gheata, chun go ndéanfadh sé féin agus na daoine ídhbirt.

¹³ Nuair a dh’airigh na h-Aspuil, Pól agus Barnabas, an nídh sin do raobadar a gcuid éadaigh agus do léimeadar amach imeasg na ndaoine agus do liúghadar:

¹⁴ A dhaoine, cad ab áil libh ’á déanamh san? Daoine a gheobhaidh bás, mar sibh féin, iseadh sinne, agus táimíd ’ghá iarraidh oraibh iompáil ó sna neithibh baotha sin ar Dhia atá beó, ó isé chruthuigh neamh agus talamh agus muir agus gach a bhfuil ionta.

¹⁵ Ins na h-aimsiribh atá imighthe do leog sé do sna geintibh go léir gluaiseacht as a slightibh féin.

¹⁶ Ach fós níor fhág sé é féin gan cur i n-úil dóibh, óir thugadh sé tabharthaisí ó neamh uaidh, fearthainn agus tráthana torthamhla, agus do lionadh sé ár gcroidhe le bia agus le h-áthas.

¹⁷ Agus bíodh gus labhradar mar sin is ar éigin fhéadadar na daoine do chosg ar ídhbirt a dhéanamh chúcha.

¹⁸ Ansan, ámhthach, tháinig raint Iúdach agus do mhealladar na daoine agus ghabhadar do chlochaibh i bPól agus tharraigeadar amach as an gcathair é mar mheasadar go raibh sé marbh.

¹⁹ Ach bhí na deisgiobuil ’n-a thímpall agus d’eirigh sé agus tháinig sé isteach sa chathair, agus amáireach a bhí chughainn d’imthigh sé féin agus Barnabas so Derbhé.

²⁰ Agus dheineadar craobhsgaoile sa chathair sin agus thugadar teagasg d’á lán, agus ansan d’fhilleadar go Listra agus go h-Icónium agus go h-Antioch,

²¹ Ag neartú aigne na ndeisgiobul agus ’á gcómhairiú chun bheith seasamhach sa chreideamh, mar gur le mórán a dh’fhulag nach fuláir dúinn dul isteach i rígheacht Dé.

²² agus do chuireadar sagairt fé ghrádhaibh dóibh ins gach eaglais, agus dheineadar úrnuighthe agus trosgadh, agus ansan thugadar suas do’n Tighearna iad, óir do chreideadar ann.

²³ Agus d’imthigheadar treasna na Pisidia agus thánadar go dtí Pamphilia,

²⁴ Agus do labhradar briathar an Tighearna i bPergé agus chuadar síos go h-Attalía,

²⁵ Agus chuadar as san go h-Antioch, ar luing, an áit as an tugadh suas iad do ghrásta Dé chun na h-oibre a bhí críochnuighthe acu.

²⁶ Agus nuair a thánadar ann chruinnigheadar an eaglais agus d’innseadar na neithe móra a dhein Dia tríotha, agus conus mar a dh’osgail sé dorus an chreidimh do sna geintibh.

²⁷ Agus d’fhanadar aimsir nár ghearr i bhfochair na ndeisgiobul.