Matha 9 - Na Ceithre Soiscéil agus Gníomhartha na n-Abstal 1943 (Pádraig Mac Giolla Cheara

Caibidil IX Leigheasann Críost duine a raibh galar creathach air: goireann sé ar Mhaitiú: Leigheasann sé bean a raibh cur fola uirthí: tógann sé inghean Iairuis ó’n bhás: bheir sé a n-amharc do dhá dhall: agus leigheasann sé balbhán a raibh deamhan ann.

¹ Agus ar dhul isteach san bhád dó, chuaidh sé thar uisce agus tháinic sé chun a chathrach féin.

² Agus féach, thug siad chuige duine a raibh galar creathach air, agus é sínte ar leabaidh. Agus ar fheiceáil a gcreidimh do Íosa, dubhairt sé leis an fhear a raibh an galar creathach air: Bíodh misneach agat, a mhic, tá do pheacaidhe maithte duit.

³ Agus féach, dubhairt cuid de na Scríobhaidhthe leo féin: Tá diamhasla dá dhéanamh aige seo.

⁴ Agus ar fheiceáil a smaointe do Íosa, dubhairt sé: Cad chuige a bhfuil droch-smaointe agaibh i bhur gcroidhthe?

⁵ Cé acu is fusa a rádh: Tá do pheacaidhe maithte duit: nó a rádh: Éirigh, agus siubhal?

⁶ Acht chun go raibh a fhios agaibh go bhfuil cumhacht ag Mac an Duine ar talamh peacaidhe a mhaitheamh, dubhairt sé annsin leis an fhear a raibh an galar creathach air: Éirigh, tóg suas do leabaidh, agus gabh abhaile chun do thighe.

⁷ Agus d’éirigh sé, agus chuaidh abhaile chun a thighe.

⁸ Agus ar a fheiceáil seo do na sluaighte, tháinic eagla ortha, agus thug siad glóir do Dhia, a thug a leithéid de chumhacht do dhaoine.

⁹ Agus nuair a d’imthigh Íosa as an áit sin, chonnaic sé fear, dárbh ainm Maitiú, ina shuidhe i n-oific na cánach, agus deir sé leis: lean mise. Agus d’éirigh sé agus lean é.

¹⁰ Agus thárla, ag caitheamh bídh dó san tigh, go dtáinic mórán puibliocánach agus peacach gur shuidh siad i gcuideachta Íosa agus a dheisciobal.

¹¹ Agus ar a fheiceáil sin do na Fairisínigh, dubhairt siad le n-a dheisciobail: Cad chuige a n-itheann bhur máighistir i gcuideachta na bpuibliocánach agus na bpeacach?

¹² Acht chuala Íosa iad, agus dubhairt: Ní ar na daoine slána a bhíos liaigh do dhíth, acht ar na daoine breoidhte.

¹³ Mar sin de, imthighigidh agus foghlaimigidh cad é is brígh le seo: Ní íodhbairt acht trócaire is toil liom. Óir ní tháinic mise le glaodhach ar na fíréin, acht ar na peacaigh.

¹⁴ Annsin tháinic deisciobail Eoin chuige, agus dubhairt: Cad chuige a dtroscann sinne agus na Fairisínigh go minic, acht ní throscann na deisciobail seo agat-sa?

¹⁵ Agus dubhairt Íosa leo: An féidir do chloinn an fhir nua-phósta mairgneach a dhéanamh a fhad agus bhíos an fear nua phósta ina gcuideachta? Acht tiocfaidh na laethe ina dtógfar uatha an fear nua-phósta, agus annsin dhéanfaidh siad troscadh.

¹⁶ Ní chuireann aoinneach paiste de éadach úr ar shean-cheirteach: óir baineann sé a lán féin de’n cheirteach, agus bíonn an strócadh níos measa.

¹⁷ Agus ní chuireann siad fíon úr i sean-bhuidéil: nó briseann na buidéil, doirtear an fíon, agus téigheann na buidéil amugha. Acht cuireann siad fíon úr i mbuidéil úra, agus sábháiltear iad araon.

¹⁸ Nuair a bhí sé ag rádh na neithe seo leo, féach, tháinic uachtarán áirithe chuige, thug adhradh dó, agus dubhairt: A Thighearna, fuair mo inghean bás anois; acht tar, cuir do lámh uirthí, agus béidh sí beo.

¹⁹ Agus d’éirigh Íosa, agus lean sé é le n-a dheisciobail.

²⁰ Agus féach, tháinic bean, a raibh cur fola ag goillstin uirthí le dhá bhliadhain déag, taobh thiar de, agus bhain sí le feaithim a éididh.

²¹ Óir dubhairt sí léi féin: Muna ndéanaidh mé acht baint le n-a éideadh, béidh mé slán.

²² Acht thionntuigh Íosa thart, agus chonnaic sé í, agus dubhairt: A inghean, glac misneach, rinne do chreideamh slán thú. Agus bhí an bhean slán ó’n uair sin amach.

²³ Agus nuair a tháinic Íosa go tigh an uachtaráin, agus chonnaic sé an lucht ceoil agus an sluagh ag tógáil gleo, dubhairt sé:

²⁴ Imthighigidh libh: óir ní marbh atá an cailín, acht ina codladh. Agus rinne siad gáire fonamhaide faoi.

²⁵ Agus nuair a cuireadh amach an sluagh, chuaidh seisean isteach, agus fuair greim láimhe uirthí. Agus d’éirigh an cailín.

²⁶ Agus chuaidh a gháir seo amach ar fud na tíre sin go h-uile.

²⁷ Agus nuair a bhí Íosa ag imtheacht as an áit sin, lean dhá fhear dhalla é, ag scairtigh, agus ag rádh: A Mhic Dháibhidh, déan trócaire orainn.

²⁸ Agus nuair a tháinic sé go dtí an teach, tháinic na daill chuige. Agus deir Íosa leo: An gcreideann sibh go dtig liom seo a dhéanamh díbh? Deir siad leis: Creidimíd, a Thighearna.

²⁹ Annsin chuir sé a lámh ar a súla, ag rádh: Déantar libh do réir bhur gcreidimh.

³⁰ Agus foscladh a súla, agus bhagair Íosa go géar ortha, ag rádh: Tabhairigidh aire agus ná bíodh a fhios seo ag aoinneach.

³¹ Acht d’imthigh siad-san amach, agus spréidh siad a cháil ar fud na tíre sin go léir.

³² Agus i ndiaidh dhul amach dóbhtha-san, féach, thug siad chuige duine balbh a raibh deamhan ann.

³³ Agus nuair a teilgeadh amach an deamhan, labhair an duine balbh, agus ghabh iongantas na sluaighte, gur dhubhairt: Ní fhacthas a leithéidh ariamh i n-Israél.

³⁴ Acht dubhairt na Fairisínigh: Teilgeann sé amach na deamhain tré phrionnsa na ndeamhan.

³⁵ Agus thaisteal Íosa na cathracha agus na bailte uilig, ag teagasc ina sineagóga, agus ag seanmóir soiscéal na ríoghachta, agus ag leigheas gach tinnis agus gach éagcruadhais.

³⁶ Agus ar fheiceáil na sluagh dó, bhí truaighe aige dóibh, de bhrígh go raibh siad cráidhte, agus ina luighe thart mar chaoirigh gan tréadaidhe.

³⁷ Annsin deir sé le n-a dheisciobail: Tá an fhóghmhar mór go dearbhtha, acht tá na h-oibridhthe gann.

³⁸ Ar an adhbhar sin, guidhigidh tighéarna an fhóghmhair, chun go gcuiridh sé oibridhthe amach chuig a fhóghmhar.