Matha 8 - Na Ceithre Soiscéil agus Gníomhartha na n-Abstal 1943 (Pádraig Mac Giolla Cheara

Caibidil VIII Glanann Críost an lobhar, agus leigheasann sé giolla an cheanntúra, máthair chéile Pheadair, agus mórán eile: ciúineann sé an stoirm ar an fhairrge, teilgeann sé deamhain amach as dhá dhuine, agus bheir sé cead do na deamhain dul isteach ins na muca.

¹ Agus nuair a tháinic sé anuas de’n tsliabh, lean sluaighte móra é:

² Agus féach, tháinic lobhar chuige, agus shléacht sé dó, ag rádh: A Thighearna, má’s áil leat, tig leat mé a dhéanamh glan.

³ Agus ag síneadh amach a láimhe do Íosa, leig sé air í, agus dubhairt: Is áil: Déantar glan thú. Agus san bhomaite bhí an lobhra glanta de.

⁴ Agus deir Íosa leis: Tabhair aire agus ná h-innis do dhuine ar bith; acht imthigh, taisbeán thú féin do’n tsagart, agus ofráil an tiodhlacadh a d’órduigh Maoise, mar fhiadhnaise dóbhtha-san.

⁵ Agus ar theacht isteach go Capharnaum dó, tháinic ceanntúir chuige, ghá ghuidhe,

⁶ Agus ag rádh: A Thighearna, tá mo ghiolla san bhaile ina luighe tinn le galar creathach, agus é fá phéin ghéir.

⁷ Agus deir Íosa leis: Rachaidh mé agus leigheasfaidh mé é.

⁸ Acht d’fhreagair an ceanntúir é, agus dubhairt: A Thighearna, ní fiú mise go dtiocfá faoi mo dhíon; acht abair amháin an focal, agus béidh mo ghiolla slán.

⁹ Óir is dhuine mise fosta atá faoi smacht, agus tá saighdiuirí fúm: agus deirim leis an fhear seo: imthigh, agus imthigheann sé; agus leis an fhear eile: tar, agus tig sé; agus le mo sheirbhíseach: déan seo, agus ghní sé é.

¹⁰ Ar a chluinstin sin do Íosa, bhí iongantas air, agus dubhairt sé leis an mhuinntir a bhí ghá leanamhaint: Amén, adeirim libh, ní fhuair mé a leithéid sin de chreidheamh i n-Israél.

¹¹ Agus deirim libh go dtiocfaidh mórán as an oirthear agus as an iarthar, agus go suidhfidh siad síos le h-Abraham, le h-Isaac, agus le h-Iacób i ríoghacht na bhflaitheas:

¹² Acht teilgfear clann na ríoghachta amach san dorchadas amuigh: béidh gol agus díoscarnach fiacal annsin.

¹³ Agus dubhairt Íosa leis an cheanntúir: Imthigh, agus bíodh duit do réir mar chreid tú. Agus fuair an giolla a shláinte ar an uair sin.

¹⁴ Agus nuair a tháinic Íosa go tigh Pheadair, chonnaic sé máthair a mhná ina luighe tinn le fiabhras:

¹⁵ Agus rug sé ar láimh léi, agus d’imthigh an fhiabhras dí; agus d’éirigh sí agus rinne freastal ortha.

¹⁶ Agus nuair a tháinic an tráthnóna, thug siad chuige mórán a raibh deamhain ionnta: agus theilg sé amach na spioraid le n-a fhocal: agus leigheas sé an méid a bhí easlán:

¹⁷ Ionnas go gcóimhlíontaí an rud a bhí ráidhte ag Isaias, fháidh, a dubhairt: Ghabh sé chuige ár n-éagcruadhais, agus d’iomchar sé ár ngalair.

¹⁸ Agus nuair a chonnaic Íosa sluaighte móra fá dtaoibh de, d’órdhuigh sé dul trasna an uisce.

¹⁹ Agus tháinic Scríobhaidhe áirithe, agus dubhairt leis: A Mháighistir, leanfaidh mé thú cibé ar bith áit a rachas tú.

²⁰ Agus deir Íosa leis: Tá plothógaí ag na sionnaigh, agus tá neadracha ag éanacha an aeir: acht ag Mac an Duine ní fhuil áit ar a leagfadh sé a cheann.

²¹ Agus dubhairt duine eile dá dheisciobail leis: A Thighearna, leig damh-sa dul a chéadradh, agus m’athair a chur.

²² Acht dubhairt Íosa leis: lean mise, agus cuireadh na mairbh a gcuid marbh.

²³ Agus nuair a chuaidh sé isteach san bhád, lean a dheisciobail é.

²⁴ Agus féach, d’éirigh stoirm mhór ar an fhairrge, san chruth go raibh an bád dá múchadh ag na tonnaí: acht bhí seisean ina chodladh.

²⁵ Agus tháinic a dheisciobail chuige, agus mhuscail siad é, ag rádh: A Thighearna, sábháil sinn, támuid dár gcailleadh.

²⁶ Agus deir Íosa leo: Cad chuige a bhfuil eagla oraibh, a lucht an chreidimh bhig? Annsin d’éirigh sé, thug órdughadh do na gaotha agus don fhairrge, agus tháinic ciúineas mór.

²⁷ Acht tháinic iongantas ar na fir, agus dubhairt siad: Cad é an cinéal duine é seo, óir tá na gaotha agus an fhairrge umhal dó?

²⁸ Agus nuair a tháinic sé trasna an uisce go tír na nGeraisíní, casadh air beirt fhear a bhí i seilbh deamhan, ag teacht amach as na tuambaí, agus iad as cuimse fíochmhar, san chruth nárbh fhéidhir le h-aoinneach an bealach sin a ghabháil.

²⁹ Agus féach, leig siad béic astú, ag rádh: Cad é an bhaint atá againne agus agat-sa le chéile, a Íosa, a Mhic Dé, an dtáinic tú le sinn a phianadh roimh an am?

³⁰ Agus i ngar dóibh bhí tréad mór muc ag ingheilt.

³¹ Agus d’athchuing na deamhain air, ag rádh: Má theilgeann tú as seo sinn, cuir isteach sinn i dtréad na muc.

³² Agus dubhairt sé leo: Imthighigidh. Agus ar imtheacht amach dóibh, chuaidh siad isteach ins na muca; agus féach, rith an tréad uilig de dhearg-ruathar síos fánaidh isteach san fhairrge, agus cailleadh san uisce iad.

³³ Agus theich na tréadaidhthe, agus ar theacht isteach san chathair dóibh, d’aithris siad gach nídh, agus fá dtaoibh díobhtha sin a bhí i seilbh na ndeamhan.

³⁴ Agus féach, chuaidh an chathair uilig amach i n-airicis Íosa, agus nuair a chonnaic siad é, d’iarr siad air imtheacht as a dtír.