Matha 4 - Na Ceithre Soiscéil agus Gníomhartha na n-Abstal 1943 (Pádraig Mac Giolla Cheara

Caibidil IV Troscann Críost dhá fhichid lá: cuirtear cathuighthe air. Toisigheann sé a sheanmóireacht, a ghairm deisciobal chuige, agus a dhéanamh míorbhailte.

¹ Annsin threoruigh an Spiorad Íosa isteach san fhásach chun cathuighthe an diabhail a sheasamh.

² Agus nuair a throsc sé dhá fhichid lá agus dhá fhichid oidhche, bhí ocras air ina dhiaidh sin.

³ Agus tháinic an cathuightheoir chuige, agus dubhairt leis: Má’s Mac Dé thú, abair leis na clocha sin a bheith ina n-arán.

⁴ Acht d’fhreagair seisean, agus dubhairt: Tá sé scríobhtha: ní ar arán amháin a mhaireas an duine, acht ar an uile bhriathar dá dtig ó bhéal Dé.

⁵ Rug an diabhal leis annsin é isteach san chathair naomhtha, agus chuir ar bheinn an teampaill é,

⁶ Agus dubhairt leis: Má’s Mac Dé thú, teilg thú fhéin síos, óir tá sé scríobhtha: Go dtug sé órdughadh dá chuid aingeal i do thaoibh, agus tógfaidh siad ina lámha thú, ar eagla go mbuailtheá do chos n-éadan cloiche.

⁷ Dubhairt Íosa leis: Tá sé scríobhtha fosta: Ní chuirfidh tú féacháil ar an Tighearna, do Dhia.

⁸ Rug an diabhal leis arís é suas ar shliabh an-árd, agus thaisbeán ríoghachtaí an domhain go h-uile, agus a nglóir, dó,

⁹ Agus dubhairt leis: Bhéarfaidh mé iad seo uilig duit, má shléachtann tú damh, agus mé d’adhradh.

¹⁰ Annsin dubhairt Íosa leis: Imthigh leat, a Shatain, óir tá sé scríobhtha: Bhéarfaidh tú adhradh do’n Tighearna, do Dhia, agus is dó-san amháin a dhéanfas tú seirbhís.

¹¹ Annsin d’imthigh an diabhal uaidh; agus féach, tháinic aingle agus rinne siad freastal air.

¹² Agus nuair a chuala Íosa go raibh Eoin gaibhte, d’imthigh sé chun na Gailile.

¹³ Agus d’fhág sé cathair na Nasaire, go ndeachaidh a chómhnaidhe i gCapharnaum i n-aice na mara, i gcríocha Shabuloin agus Nephtalim.

¹⁴ Ionnas go gcóimhlíontaí an nídh a dubhairt Isaias, fáidh.

¹⁵ Talamh Shabuloin agus talamh Nephtalim, bealach na mara taobh thall de’n Iordáin, Gailile na gCinidheach:

¹⁶ An pobal a bhíodh ina suidhe i ndorchadas, chonnaic siad solus mór; agus d’éirigh solus do’n mhuinntir a bhíodh ina suidhe san chrích ar a raibh scáile an bháis.

¹⁷ Ó’n am sin amach thoisigh Íosa a sheanmóireacht, agus a rádh: Déanaigidh aithrighe, óir tá ríoghacht na bhflaitheas druidthe libh.

¹⁸ Agus ag siubhal do Íosa cois mhuir na Gailile, chonnaic sé beirt dhearbhráthar, Síomon, dá ngoirtear Peadar, agus Aindrias, a dhearbhráthair, ag cur eangaighe san fhairrge (óir ba iascairí iad),

¹⁹ Agus deir sé leo: Leanaigidh mise, agus dhéanfaidh mé iascairí ar dhaoine díbh.

²⁰ Agus ar an bhomaite d’fhág siad na h-eangacha annsin, agus lean siad é.

²¹ Agus ag imtheacht as sin dó, chonnaic sé beirt eile dearbhráthar, Séamus mac Shebede, agus a dhearbhráthair Eoin, i luing i dteannta a n-athar Sebede, agus iad ag cóiriughadh a gcuid eangach: agus ghoir sé chuige iad.

²² Agus ar an bhomaite d’fhág siad na h-eangacha agus a n-athair annsin, agus lean siad é.

²³ Agus thaisteal Íosa an Ghailile go léir, ag teagasc ina sineagóga, agus ag seanmóir soiscéal na ríoghachta, agus ag leigheas gach galair agus gach tinnis imeasc an phobail.

²⁴ Agus chuaidh a chliú amach ar fud na Síre go léir, agus thug siad chuige na daoine breoidhte go h-uile a bhí gaibhte ag galair agus pianta éagsamhla, iad sin a raibh deamhain ionnta, daoine a bhí as a meabhair, agus iad sin a raibh an galar creathach ortha, agus leigheas sé iad.

²⁵ Agus lean sluaighte móra é as an Ghailile, agus as an Decapolis, agus as Ierusalem, agus as Iudaia, agus as an taoibh thall de’n Iordáin.