Matha 16 - Na Ceithre Soiscéil agus Gníomhartha na n-Abstal 1943 (Pádraig Mac Giolla Cheara

Caibidil XVI Diúltann Críost cómhartha ó neamh a thaisbeáint do na Fairisínigh. Gheibh Peadar luach saothair a admhála, agus bheir Críost achmhusán dó as siocair gur chuir sé i n-aghaidh na páise. Caithfidh lucht leanamhna Chríost go léir diúltadh dóibh féin.

¹ Agus tháinic na Fairisínigh agus na Sadducaigh chuige a chur féachála air: agus d’iarr siad air cómhartha ó neamh a thaisbeáint dóibh.

² Agus dubhairt seisean leo, ghá bhfreagairt: Nuair a bhíos sé ina thráthnóna, deir sibh: Béidh soineann ann, óir tá an spéar dearg:

³ Agus ar maidin: Béidh stoirm ann indiu, óir tá an spéar ghruamdha ag deargadh.

⁴ Is eol díbh, mar sin, gnúis na spéire a bhreathnugadh: An é nach dtig libh cómharthaí na linne d’aithne? Iarrann droch-ghlúin adhaltrannach cómhartha, acht ní thabharfar cómhartha dí, acht cómhartha Iónais, fáidh. Agus d’fhág sé iad agus d’imthigh sé.

⁵ Agus nuair a tháinic a dheisciobail trasna na mara, bhí dearmad déanta acu arán a thabhairt leo.

⁶ Agus dubhairt seisean leo: Tabhairigidh aire agus seachnaigidh deascaidh na bhFairisíneach agus na Sadducach.

⁷ Acht thoisigh siad-san a mhachtnamh ina n-aigne, ag rádh: Mar nach dtugamar arán linn.

⁸ Acht bhí a fhios sin ag Íosa, agus dubhairt: A lucht an chreidhim bhig, cad chuige a bhfuil sibh ag machtnamh i bhur n-aigne, mar nach bhfuil arán agaibh?

⁹ Nach dtuigeann sibh go fóill, agus nach cuimhin libh na cúig h-aráin do’n chúig mhíle duine, agus cá mhéad bascáid a thóg sibh?

¹⁰ Ná na seacht n-aráin do’n cheithre mhíle duine, agus cá mhéad cliabh a thóg sibh?

¹¹ Cad chuige nach dtuigeann sibh nár i dtaoibh aráin a dubhairt mé libh: Seachnaigidh deascaidh na bhFairisíneach agus na Sadducach?

¹² Annsin thuig siad nár dhubhairt sé gurbh é deascaidh an aráin a bhí le seachnadh, acht teagasc na bhFairisíneach agus na Saddhucach.

¹³ Agus tháinic Íosa go críocha Chaesarea Philip, agus cheistigh sé a dheisciobail, ag rádh: Cé a deir na daoine is Mac an Duine?

¹⁴ Agus dubhairt siad-san: Cuid acu Eoin Baiste, agus cuid eile Elías, agus cuid eile Ieremías, nó duine de na fáidhe.

¹⁵ Deir Íosa leo: Acht cé a deir sibh-se is mé?

¹⁶ D’fhreagair Síomon Peadar, agus dubhairt: Is tú an Críost, Mac an Dé Bhí.

¹⁷ Agus d’fhreagair Íosa, agus dubhairt sé leis: Is beannuighthe thu, a Shíomoin, mac Ióna; óir ní feoil agus fuil a d’fhoillsigh sin duit, acht m’Athair atá ar neamh.

¹⁸ Agus deirim-se leat gur tusa Peadar, agus is ar an charraig sin a thógfas mé m’eaglais, agus ní bhéarfaidh geaftaí ifrinn buaidh uirthí.

¹⁹ Agus bhéarfaidh mé duit eochracha ríoghacht na bhflaitheas. Agus cibé nídh a cheanglóchas tú ar talamh, béidh sé ceangailte ar neamh: agus cibé nídh a scaoilfeas tú ar talamh, béidh sé scaoilte ar neamh.

²⁰ Annsin d’aithin sé dá dheisciobail gan innse dh’aoinneach gurbh é féin Íosa, an Críost.

²¹ Ó’n am sin amach thoisigh Íosa a léiriughadh dá dheisciobail go gcaithfeadh sé dul go h-Ierusalem, agus mórán neithe d’fhulang ó na seanóirí, agus ó na Scríobhaidhthe, agus ó uachtaráin na sagart, agus bás d’fhulang, agus éirghe arís ar an treas lá.

²² Agus thug Peadar i leath taoibh é, agus thoisigh sé a iomardadh, ag rádh: Gura fada uait é, a Thighearna; ní thiocfaidh sin ort-sa.

²³ Acht thionntuigh seisean, agus dubhairt le Peadar: Siar mo dhiaidh leat, a Shatain, is scainneal damh thú: óir ní h-iad na neithe a bhaineas le Dia a thaitneas leat, acht na neithe a bhaineas le daoine.

²⁴ Annsin dubhairt Íosa le n-a dheisciobail: Má’s áil le h-aoinneach teacht mo dhiaidh-se, diúltadh sé é féin, agus tógadh sé a chros, agus leanadh sé mé.

²⁵ Óir cibé ar mian leis a anam a shábháil, caillfidh sé é: agus an té a chaillfeas a anam ar mo shon-sa, gheobhaidh sé é.

²⁶ Óir cad é is feárrde duine, dá ngnóthuigheadh sé an domhan uilig, agus a anam féin a chailleamhaint? Nó cad é bhéarfas duine i n-éiric a anama?

²⁷ Óir tiocfaidh Mac an Duine i nglóir a Athar maille le n-a aingle: agus annsin bhéarfaidh sé do gach duine do réir a ghníomhartha.

²⁸ Amén adeirim libh, tá cuid dá bhfuil ina seasamh annseo nach mblaisfidh bás go dtí go bhfeicidh siad Mac an Duine ag teacht ina ríoghacht.