Matha 11 - Na Ceithre Soiscéil agus Gníomhartha na n-Abstal 1943 (Pádraig Mac Giolla Cheara

Caibidil XI Cuireann Eoin a dheisciobail chuig Críost. Cáineann Críost díchreideamh na n-Iúdach, agus goireann sé chuige na daoine a mbíonn ualaighe ag goillstin ortha.

¹ Agus thárla, nuair a chríochnuigh Íosa múineadh a dháréag deisciobal, gur imthigh sé as sin a theagasc agus a sheanmóireacht ina gcathracha.

² Agus nuair a chuala Eoin, agus é gaibhte, fá oibreacha Chríost, chuir sé beirt dá dheisciobail chuige, gur dhubhairt leis:

³ An tusa an té atá le theacht, nó an mbéimíd ag súil le duine eile?

⁴ Agus dubhairt Íosa leo, ghá bhfreagairt: Imthighigidh agus innsigidh do Eoin na neithe a chuala sibh agus a chonnaic sibh.

⁵ Tá radharc ag na daill, tá siubhal ag na bacaigh, glantar na lobhair, tá éisteacht ag na bodhair, éirigheann na mairbh, agus tá an soiscéal dá theagasc do na bochta;

⁶ Agus is beannuighthe an té nach bhfaighidh scainneal ionnam-sa.

⁷ Agus nuair a bhí siad-san ag imtheacht, thoisigh Íosa a rádh leis na sluaighte fá Eoin: Cad é a ndeachaidh sibh amach san fhásach a fheiceáil? Giolcach dá luascadh le gaoith?

⁸ Acht cad é a ndeachaidh sibh amach a fheiceáil? Fear gléasta i n-éadaighe míne? Féach, is i dtighthe na ríogh a bhíos lucht an éadaigh mhín.

⁹ Acht cad é a ndeachaidh sibh amach a fheiceáil? Fáidh? Is eadh, adeirim libh, agus duine is mó ná fáidh.

¹⁰ Óir is é seo an té a bhfuil sé scríobhtha fá dtaoibh de: Féach, tá mé ag cur m’aingil rómhat amach chun do shlighe a réidhteach rómhat.

¹¹ Amén adeirim libh, níor éirigh eadar chlanna ban aoinneach is mó ná Eoin Baiste; acht is mó ná é an té ar lugha é i ríoghacht na bhflaitheas.

¹² Agus ó laethe Eoin Baiste go dtí anois tá foiréigean dá dhéanamh ar ríoghacht na bhflaitheas, agus is iad lucht fhoiréigin atá ghá fuadach.

¹³ Óir rinne na fáidhe uilig agus an dlighe fáidheadóireacht go dtí Eoin.

¹⁴ Agus má’s toil libh a thuigsin, is é seo Elías a bhí le theacht.

¹⁵ An té a bhfuil cluasa chun éisteachta air, éisteadh sé.

¹⁶ Cá leis, mar sin, a samhlóchaidh mé an ghlúin seo? Is cosamhail iad le páistí ina suidhe i láthair an mhargaidh, a scairteas le n-a gcomrádaidhthe,

¹⁷ Agus a deir: Rinneamar ceol díbh, agus ní dhearna sibh damhsa; rinneamar caoineadh, agus ní dhearna sibh mairgneach.

¹⁸ Óir tháinic Eoin gan é ag ithe ná ag ól, agus deir siad: Tá deamhan ann.

¹⁹ Tháinic Mac an Duine agus é ag ithe agus ag ól, agus deir siad: Féach, sin agaibh duine craosach agus póitire fíona, cara na bpuibliocánach agus na bpeacach. Agus fuair an eagna a saoradh tré n-a cloinn féin.

²⁰ Annsin thoisigh sé a lochtadh na gcathrach ina ndearnadh an chuid ba mhó dá mhíorbhailte, de bhrígh nach ndearna siad aithrighe.

²¹ Is mairg duit, a Chorosáin, agus is mairg duit, a Bhethsaida, óir dá ndéantaí i dTior agus i Sídoin na míorbhailte a rinneadh ionnaibh-sé, bhéadh aithrighe déanta acu i bhfad ó shoin i n-éadach róin agus i luaith.

²² Acht deirim libh, go mbéidh sócamhal ag Tior agus ag Sídoin ar lá an bhreitheamhnais, thar mar bhéas agaibh-se.

²³ Agus tusa, a Chapharnaum, an amhlaidh a árdóchar go neamh thú? Rachaidh tú síos go h-ifreann. Óir dá ndéantaí i Sodom na míorbhailte a rinneadh ionnat-sa, b’fhéidir go mairfeadh sé go dtí an lá atá indiu ann.

²⁴ Acht deirim libh, go mbéidh sócamhal ag tír Shodoim ar lá an bhreitheamhnais thar mar bhéas agat-sa.

²⁵ San am sin d’fhreagair Íosa, agus dubhairt: Bheirim buidheachas duit, a Athair, a Thighearna neimhe agus talaimh, de bhrígh gur fholuigh tú na neithe seo ar lucht eagna agus críonnachta, agus gur fhollsigh tú iad do leanbháin.

²⁶ Seadh, a Athair, de bhrígh gurbh í sin do dhéagh-thoil.

²⁷ Tá na h-uile neithe tugtha damh-sa ag m’Athair. Agus ní h-aithnid d’aoinneach an Mac acht an t-Athair, agus ní h-aithnid d’aoinneach an t-Athair acht an Mac, agus an té ar thoil leis an Mhac a nochtadh dó.

²⁸ Taraigidh chugam-sa, sibh-se uilig a bhíos tuirseach ag obair agus faoi ualach throm, agus bhéarfaidh mé faoiseamh díbh.

²⁹ Árduighigidh mo chuing-se oraibh, agus foghlaimigidh uaim, óir tá mé ceannsa, agus uiríseal i gcroidhe, agus gheobhaidh sibh suaimhneas do bhur n-anmanna,

³⁰ Óir is séimh í mo chuing, agus is éadtrom é m’ualach.