Lúcás 3 - Na Ceithre Soiscéil agus Gníomhartha na n-Abstal 1943 (Pádraig Mac Giolla Cheara

Caibidil III Seanmóireacht Eoin: baisteann sé Críost.

¹ Agus san cúigeadh bliadhain déag d’impireacht Thibériuis Caesar, nuair a bhí Point Pioláit ina uachtarán ar Iudaia, Ioruadh ina theatrarc ar an Ghailile, agus Pilip, a dhearbhráthair, ina theatrarc ar Iturea agus ar chríocha Thrathonítis, Lusanias ina theatrarc ar an Aibiléin,

² Le linn Annas agus Caiphas a bheith ina n-árdshagairt, tháinic briathar an Tighearna chuig Eoin, mac Shacaire, san fhásach.

³ Agus tháinic sé ar fud na gcríoch go léir timcheall na h-Iordáine ag teagasc baisteadh aithrighe chun maitheamhnas peacaidhe,

⁴ Mar atá scríobhtha i leabhar na bhfocal a dubhairt Isaias, fáidh: Guth duine ag glaodhach san fhásach: Ullmhuighigidh slighe an Tighearna: déanaigidh díreach a chasáin.

⁵ Líonfar gach gleann, agus ísleochar gach sliabh agus cnoc; agus béidh an cam díreach, agus an garbh ina bhealach réidh,

⁶ Agus tchífidh an uile fheoil slánughadh Dé.

⁷ Ar an adhbhar sin dubhairt sé leis na sluaighte a chuaidh amach le baisteadh d’fhagháil uaidh: A shliocht naithreach nimhe, cé mhúin díbh-se teicheadh ó’n fheirg atá le theacht?

⁸ Tabhairigidh uaibh, dá bhrigh sin, an toradh is dual do’n aithrighe, agus ná toisighigidh a rádh: Tá Abraham ina athair againn. Óir deirim libh go dtig le Dia clann a thógáil do Abraham as na clocha sin.

⁹ Óir tá an tuagh leagtha cheana féin ar bun na gcrann. Ar an adhbhar sin, gach crann nach dtabhrann toradh maith uaidh gearrfar agus caithfear san teinidh é.

¹⁰ Agus d’fhiafruigh na sluaighte de, ag rádh: Cad é mar sin atá le déanamh againn?

¹¹ Agus deir sé leo, ghá bhfreagairt: An té a bhfuil dhá chasóig aige, tabharadh sé do’n té nach bhfuil aige, agus an té a bhfuil biadh aige, déanadh sé mar an gcéadna.

¹² Agus tháinic puibliocánaigh fosta le baisteadh d’fhagháil, agus dubhairt siad leis: A Mháighistir, cad é atá le déanamh againne?

¹³ Agus dubhairt sé leo: Ná déanaigidh níos mó ná tá órduighthe díbh.

¹⁴ Agus cheistigh saighdiuirí é fosta, ag rádh: Agus cad é tá le déanamh againne? Agus dubhairt sé leo: Ná scannruighigidh aoinneach agus ná cuirigidh bréag ar aoinneach, agus bígidh sásta le bhur dtuarastal.

¹⁵ Agus ó bhí na daoine ag breathnughadh agus iad uilig ag meabhrughadh ina gcroidhthe fá dtaoibh de Eoin, arbh fhéidir gurbh é an Críost é.

¹⁶ D’fhreagair Eoin, ag rádh leo uilig: Tá mise bhur mbaisteadh leoga le h-uisce, acht tiocfaidh neach is treise ná mé, nach fiú mé iall a bhróg a scaoileadh: baistfidh seisean sibh leis an Spiorad Naomh agus le teinidh,

¹⁷ Agus tá a shluasad cháithte iná láimh aige, agus glanfaidh sé a urlár, agus cruinneochaidh sé an chruithneacht isteach ina scioból, acht dóighfidh sé an lóchán le teinidh dho-mhúchta.

¹⁸ Agus ag cómhairliughadh an phobail dó chraobhscaoil sé mórán neithe eile dóibh.

¹⁹ Agus Ioruadh, au teatrarc, nuair a d’aithbhrigh sé air Herodias bean a dhearbhráthar agus na h-uilc eile uilig a rinne Ioruadh,

²⁰ Chuir sé seo leo go léir, gur dhruid sé Eoin i bpríosún.

²¹ Agus thárla, nuair a bhí na daoine uilig dá mbaisteadh, agus nuair a baisteadh Íosa agus bhí sé ag guidhe, gur foscladh neamh,

²² Agus gur thuirling an Spiorad Naomh i riocht chorpordha mar cholmán air, agus tháinic guth ó neamh: Is tú mo Mhac múirneach, is ionnat atá mo mhór-thaitneamh.

²³ Agus bhí Íosa é féin ag toiseacht fá thuairim a dheich mbliadhan fichead d’aois, agus é, mar a shíltí, ina mhac ag Ióseph, mac Heli, mac Mhatait,

²⁴ Mac leibhí, mac Mhelchí, mac Ianne, mac Ióseph,

²⁵ Mac Mhatatíais, mac Amois, mac Nahuim, mac Heslí, mac Nagge,

²⁶ Mac Mhahait, mac Mhatatíais, mac Shemei, mac Ióseph, mac Iúda,

²⁷ Mac Ioanna, mac Resa, mac Shorobabeil, mac Shalatieil, mac Nerí,

²⁸ Mac Mhelchí, mac Addi, mac Chosain, mac Elmadain, mac Heir,

²⁹ Mac Íosa, mac Elieseir, mac Iorim, mac Mhatait, mac Leibhí,

³⁰ Mac Shimeoin, mac Iúda, mac Ióseph, mac Iona, mac Eliacim,

³¹ Mac Mhelia, mac Mhenna, mac Mhatata, mac Natain, mac Dháibhidh,

³² Mac Iesse, mac Obeid, mac Bhoois, mac Shalmoin, mac Naassoin,

³³ Mac Aminadaib, mac Araim, mac Esroin, mac Phareis, mac Iúdais,

³⁴ Mac Iacóib, mac Isaaic, mac Abrahaim, mac Tare, mac Nachoir,

³⁵ Mac Sharuig, mac Ragau, mac Phaleig, mac Hebeir, mac Shale,

³⁶ Mac Chainain, mac Arphacsaid, mac Sheim, mac Naoi, mac Lameic,

³⁷ Mac Mhatusale, mac Henoic, mac Iareid, mac Mhalaléil, mac Chainain,

³⁸ Mac Henois, mac Sheit, mac Adhaimh, mac Dé.