Salm 12 - An tSaltair 1965 (Ó Cuinn)

Salm 12. Salvum me fac.

¹ Cuidigh liom, a Thiarna, ó nach bhfuil fíréan fágtha: ó chuaigh na fir fhíora i laghad i measc Shíl Ádhaimh.

² Labhraíonn gach duine díomhaointeas lena chomharsa: ní bhíonn a mbéal ach ag cur cluana, agus a gcroí cealgach ag cur i gcéill.

³ Scriosfaidh an Tiarna gach béal bréagach: agus an teanga a bhíos ag maíomh an díomais;

⁴ Agus an dream a dúirt, Gheobhaidh ár dteanga an bua dúinn: tá cead cainte againn, cé atá ina Thiarna orainn?

⁵ Ach anois ó nach bhfaigheann an dearóil faoiseamh ó bhuaireamh: agus ó bíonn na bochtáin ag osnaíl ó chroí.

⁶ Éireoidh mé, a deir an Tiarna: agus fuasclóidh mé gach duine acu ón té éiríos ina aghaidh, agus tabharfaidh mé suaimhneas dó.

⁷ Is briathra glana iad briathra an Tiarna: mar an airgead a ghlantar den chré, agus a athloisctear faoi sheacht sa tine.

⁸ Coimeádann tú iad, a Thiarna: cumhdóidh tú é ón aicme sin go brách.

⁹ Níl áit nach bhfuil faoi chosa lucht an oilc: nuair a éiríos siad in airde, cuirtear masla ar chlann na ndaoine.