Matha 1 - An Tiomna Nua agus Leabhar na Salm 2012

Íosa, Mac Dháiví …

¹ Leabhar ghinealach Íosa Críost, mac Dháiví, mac Abrahám.

² Ghin Abrahám Íosác; ghin Íosác Iacób; ghin Iacób Iúdá agus a dheartháireacha;

³ ghin Iúdá Peiris agus Zára ó Thámár; ghin Peiris Heasrón; ghin Hasrón Aram;

⁴ ghin Aram Aimineadab; ghin Aimineadab Náiseon; ghin Náiseon Salmónae;

⁵ ghin Salmónae Bóaz ó Rácháb; ghin Bóaz Óbaed ó Rút; ghin Óbaed Ieise;

⁶ ghin Ieise Dáiví rí. Ghin Dáiví Solamh ó bhean Úiríá;

⁷ ghin Solamh Reachabám; ghin Reachabám Aibia; ghin Aibia Ásá;

⁸ ghin Ásá Ióiseáfát; ghin Ióiseáfát Ióirím; ghin Ióirím Uizíá;

⁹ ghin Uizíá Iótám; ghin Iótám Ácház; ghin Ácház Hiziciá;

¹⁰ ghin Hiziciá Manaise; ghin Manaise Ámós; ghin Amós Ióisíá;

¹¹ ghin Ióisíá Iacóinia agus a dheartháireacha le linn bhroid na Bablóine.

¹² Tar éis bhroid na Bablóine, ghin Iacóinia Séailtiéil; ghin Séailtiéil Zarabáibil;

¹³ ghin Zarabáibil Aibiúd; ghin Aibiúd Eiliáicím; ghin Eiliáicím Azór;

¹⁴ ghin Azór Zádóc; ghin Zádóc Aichím; ghin Aichím Eiliúd;

¹⁵ ghin Eiliúd Eileázár; ghin Eileázár Matan; ghin Matan Iacób;

¹⁶ ghin Iacób Iósaef, fear céile Mhuire ónar rugadh Íosa ar a dtugtar Críost.

¹⁷ A bhfuil de ghlúine ann dá bhrí sin: ó Abrahám go dtí Dáiví, ceithre ghlúin déag; ó Dháiví go dtí broid na Bablóine, ceithre ghlúin déag; agus ó bhroid na Bablóine go dtí Críost, ceithre ghlúin déag.

… a Gabhadh ón Spiorad Naomh, a Rugadh ó Mhuire Ógh

¹⁸ Seo mar a tharla Íosa Críost a shaolú. Bhí Muire, a mháthair, luaite le hIósaef, agus sula ndearnadar aontíos, fuarthas torrach í ón Spiorad Naomh.

¹⁹ Ba dhuine cóir a fear céile Iósaef, ach níorbh áil leis go dtabharfaí míchlú di, agus chinn sé í a scaoileadh uaidh os íseal.

²⁰ Ag machnamh ar an méid sin dó, áfach, thaispeáin aingeal ón Tiarna é féin dó i mbrionglóid agus dúirt: “A Iósaef, a mhic Dháiví, ná bíodh eagla ort do bhean chéile Muire a thabhairt abhaile leat, óir, an leanbh atá gafa aici, is ón Spiorad Naomh é.

²¹ Béarfaidh sí mac, agus tabharfaidh tú Íosa mar ainm air, óir slánóidh sé a phobal óna bpeacaí.”

²² Thit an méid sin go léir amach chun go gcomhlíonfaí a ndúirt an Tiarna tríd an bhfáidh:

²³ “Beidh an mhaighdean torrach agus béarfaidh sí mac agus tabharfar Imeánúéil mar ainm air,” – ainm a chiallaíonn: Tá Dia linn.

²⁴ Dhúisigh Iósaef agus dʼéirigh, agus rinne mar a dʼordaigh aingeal an Tiarna dó: a bhean a thabhairt abhaile leis. Ach ní raibh cuid aige di nó gur rug sí mac, agus thug sé Íosa mar ainm air.