Lúcás 4 - An Tiomna Nua agus Leabhar na Salm 2012

Íosa dá Phromhadh ag Sátan

¹ Tháinig Íosa, agus é lán den Spiorad Naomh, ar ais ón Iordáin, agus seoladh faoi luí an Spioraid sa bhfhásach é

² go ceann daichead lá, dá phromhadh ag an diabhal. Agus níor ith sé aon ní sna laethanta sin, agus nuair a bhí siad caite bhí ocras air.

³ Dúirt an diabhal leis: “Más tú Mac Dé, abair leis an gcloch seo arán a dhéanamh di féin.”

⁴ Agus dʼfhreagair Íosa é: “Tá scríofa: ‘Ní ar arán amháin a mhairfidh an duine.’”

⁵ Agus tar éis do é a sheoladh suas ar ard, thaispeáin sé dó ríochtaí uile na cruinne i nóiméad aimsire;

⁶ agus dúirt an diabhal leis: “Tabharfaidh mé duit an for-lámhas seo uile agus a nglóir siúd, óir is ar mo láimh a tugadh é, agus tugaim do cibé is áil liom é.

⁷ Dá bhrí sin, má dhéanann tusa adhradh i mo láthair, is leat é uile.”

⁸ Dúirt Íosa leis dá fhreagairt: “Tá scríofa: ‘Adharfaidh tú an Tiarna do Dhia, agus is dó amháin a bheidh tú ag seirbhís.’”

⁹ Ansin sheol sé go hIarúsailéim é, chuir sé ar bhinn an Teampaill é agus dúirt leis: “Más tú Mac Dé, caith thú féin as seo síos;

¹⁰ óir tá scríofa: ‘Tabharfaidh sé ordú dá aingil mar gheall ort, chun go ngardálfaidís thú’;

¹¹ agus: ‘Iompróidh siad ina lámha thú, le heagla go mbuailfeá do chos faoi chloch.’”

¹² Dúirt Íosa leis dá fhreagairt: “Tá ráite: ‘Ní bhainfidh tú triail as an Tiarna do Dhia.’”

¹³ Agus tar éis don diabhal é a phromhadh i ngach slí, dʼfhág sé é nó go dtiocfadh an uain.

Íosa i Nazarat

¹⁴ Agus dʼfhill Íosa le neart an Spioraid ar an nGailíl, agus leath a cháil ar fud na tíre go léir.

¹⁵ Agus bhíodh sé ag teagasc ina sionagóga, agus moladh ó chách air.

¹⁶ Tháinig sé go Nazarat, mar ar oileadh é, agus chuaigh isteach mar ba ghnáthbhéas dó sa tsionagóg lá na sabóide, agus mʼéirigh ina sheasamh chun an léitheoireacht a dhéanamh.

¹⁷ Síneadh chuige leabhar Íseáia fáidh, agus ar oscailt an leabhair dó, fuair sé an t-ionad ina raibh scríofa:

¹⁸ “Tá Spiorad an Tiarna orm, mar gur choisric le hola mé. Chuir sé uaidh mé ag tabhairt an dea-scéil do na boicht, ag fógairt a scaoilte do bhránna agus aiseag a radhairc do dhaill; ag scaoileadh lucht géarbhroide saor;

¹⁹ ag fógairt bhliain ghrásta an Tiarna.”

²⁰ Dʼfhill sé an leabhar ina chéile, thug ar ais don seirbhíseach é, agus shuigh. Agus bhí súile a raibh sa tsionagóg dlúite air.

²¹ Agus thosaigh sé ag rá leo: “Inniu atá an scríbhinn seo comhlíonta i gclós bhur gcluas.”

²² Agus thug cách fianaise air, bʼionadh leo na briathra grástúla a bhí ag teacht as a bhéal, agus deiridís: “Nach é seo mac Iósaef?”

²³ Agus dúirt sé leo: “Gan amhras, tagróidh sibh liom an sean-fhocal: ‘A lia, leigheas thú féin. Na nithe a chualamar déanta i gCafarnáúm, déan anseo iad freisin i do dhúiche féin.’”

²⁴ Ach dúirt sé: “Deirim libh go fírinneach, fáidh ar bith ní ghlactar ina dhúiche féin.

²⁵ Ach go deimhin deirim libh, bhí mórán baintreach in Iosrael i laethanta Éilias, nuair a bhí an spéir dúnta ar feadh trí bliana agus sé mhí, ionas go raibh gorta mór sa tír go léir,

²⁶ agus ní chun aon duine acu a cuireadh Éilias ach chun baintreach mná i Zárafat i dtír Shiodón.

²⁷ Agus bhí mórán lobhar in Iosrael le linn Eilíseá fáidh, ach aon duine acu sin níor glanadh ach Námán an Siriach.”

²⁸ Agus a raibh sa tsionagóg, nuair a chuala siad an méid sin, líon siad dʼfheirg,

²⁹ agus mʼéirigh siad agus thiomáin amach as an gcathair é agus sheol é go dtí mala an chnoic ar a raibh a gcathair tógtha chun é a chaitheamh le faill.

³⁰ Ach ghabh sé trína lár agus dʼimigh leis.

Teagasc agus Leighseanna i gCafarnáúm

³¹ Chuaigh sé síos go Cafarnáúm, cathair sa Ghailíl. Agus bhí sé dá dteagasc lá sabóide.

³² Agus ghabh iontas iad faoina theagasc, óir bhí údarás lena bhriathar.

³³ Bhí sa tsionagóg duine a raibh spiorad deamhain mhíghlain ann, agus scread sé amach de ghlór ard:

³⁴ “Há, cad ab áil leat dínn, a Íosa Nazairéanaigh? Ar tháinig tú chun sinn a mhilleadh? Is eol dom cé hé thú: Naomh Dé.”

³⁵ Agus dúirt Íosa leis go bagrach: “Bí i do thost, agus imigh amach as.” Agus theilg an deamhan ar lár os comhair cách é agus dʼimigh amach as, gan dochar a dhéanamh dó.

³⁶ Agus bhí alltacht ar cách agus bhí siad ag caint eatarthu féin ag rá: “Cad é mar bhriathar é seo? Óir fógraíonn sé ar na spioraid mhíghlana le húdarás agus le cumhacht, agus gabhann siad amach.”

³⁷ Agus leath a chlú i ngach áit ar fud na tíre.

³⁸ Ar fhágáil na sionagóige dó, chuaigh sé isteach i dteach Shíomóin. Bhí máthair chéile Shíomóin gafa ag taom trom fiabhrais, agus rinne siad achainí air ar a son.

³⁹ Agus ina sheasamh dó os a cionn thug sé ordú géar don fhiabhras, agus dʼfhág an fiabhras í; agus mʼéirigh sí ar an mball agus thosaigh ag freastal orthu.

⁴⁰ Ar dhul faoi don ghrian, cách a raibh daoine acu a bhí tinn ó aon sórt galair, thug siad chuige iad; chuir sé a lámha ar gach duine acu agus leigheas iad.

⁴¹ Agus bhí mórán freisin, a n-imíodh na deamhain amach astu, ag screadach agus ag rá: “Is tú Mac Dé.” Agus labhair sé leo go bagrach agus níor lig dóibh labhairt, óir bhí a fhios acu gurbh é an Críost é.

⁴² Nuair a bhí ina lá, ar dhul amach dó, chuaigh sé go dtí áit uaigneach. Ach bhí na sluaite dá lorg agus tháinig siad mar a raibh sé, agus bhí dá choinneáil le heagla go n-imeodh sé uathu.

⁴³ Ach dúirt sé leo: “Ní foláir dom dea-scéal ríocht Dé a fhógairt do na cathracha eile, óir is chuige sin a cuireadh amach mé.” Agus bhíodh sé ag seanmóir i sionagóga Iúdáia.