Lúcás 3 - An Tiomna Nua agus Leabhar na Salm 2012

Eoin Baiste ag Fógairt Aithrí

¹ Sa chúigiú bliain déag de réimeas Thibir Caesar, nuair a bhí Pointias Píoláit ina ghobharnóir ar Iúdáia, agus Héaród ina rí cúige ar an nGailíl, agus Pilib a dheartháir ina rí cúige ar cheantar Iotúráia agus Thrachóiníteas, agus Lusáinias ina rí cúige ar Aibiléiné,

² faoi ard-sagartacht Annas agus Cháiafas, tháinig briathar Dé chun Eoin mac Zacairiá sa bhfhásach.

³ Agus ghabh sé ar fud na tíre go léir timpeall na hIordáine ag fógairt baiste aithrí chun peacaí a mhaitheamh,

⁴ mar atá scríofa i leabhar ráite Íseáia fáidh: “Glór duine ag éamh sa bhfhásach: ‘Réitígí bóthar an Tiarna, déanaigí díreach a chosáin.

⁵ Líonfar gach cumar, agus ísleofar gach sliabh agus cnocán; déanfar na camshlite díreach agus na bóithre anacra réidh,

⁶ agus feicfidh an uile cholainn slánú Dé.’”

⁷ Dúirt sé ansin leis na sluaite a bhí ag teacht amach chun baiste a fháil uaidh: “A sceith na bpéisteanna, cé a thug leid daoibh teitheadh ón díbheirg atá le teacht?

⁸ Tugaigí, más ea, torthaí uaibh is dual don aithrí. Agus aire daoibh gan a rá libh féin: ‘Tá Abrahám ina athair againn,’ óir deirim libh gur féidir le Dia clann a thógáil dʼAbrahám as na clocha seo.

⁹ Anois féin, tá an tua le fréamh na gcrann, agus gach crann nach dtugann toradh fónta uaidh, gearrfar anuas agus caithfear sa tine é.”

¹⁰ Agus bhí na sluaite ag fiafraí de: “Cad tá le déanamh againn, más ea?”

¹¹ Dúirt sé leo dá bhfreagairt: “An té a bhfuil dhá chóta aige, tugadh sé cóta don té atá ina uireasa, agus an té a bhfuil rud le hithe aige, déanadh sé a leithéid chéanna.”

¹² Tháinig poibleacánaigh freisin chun baiste a fháil agus dúirt siad leis: “A mháistir, cad tá le déanamh againne?”

¹³ Dúirt sé leo: “Gan níos mó a éileamh ná a bhfuil ordaithe daoibh.”

¹⁴ Dʼfhiafraigh saighdiúirí de, freisin: “Agus cad tá le déanamh againne?” Agus dúirt sé leo: “Gan éigean a dhéanamh ar dhuine ar bith, ná dearbhú éithigh; agus sibh a bheith sásta le bhur bpá.”

¹⁵ Ó bhí an pobal ar fionraí, agus cách ag machnamh ina gcroí i dtaobh Eoin, go mbʼfhéidir gurbh é an Críost é,

¹⁶ dʼfhreagair Eoin dá rá leo uile: “Táim-se do bhur mbaisteadh le huisce, ach tá an té ag teacht atá níos treise ná mé, nach fiú mé iall a chuarán a scaoileadh; baistfidh seisean sibh leis an Spiorad Naomh agus le tine.

¹⁷ Tá a cháiteog ina láimh aige chun a láithreán a léirghlanadh agus an t-arbhar a chruinniú isteach ina scioból, ach dóifidh sé an lóchán le tine dhomhúchta.”

Eoin Baiste dá Chur i bPríosún

¹⁸ Agus trína lán nithe eile fós a rá leo dá spreagadh, bhí sé ag fógairt an dea-scéil don phobal.

¹⁹ Héaród an rí cúige, áfach, a fuair milleán uaidh faoi Héaróidias, bean a dhearthár, agus faoi na droch-bhearta uile a bhí déanta aige,

²⁰ chuir sé an drochbheart seo i gceann an iomláin: Eoin a chur faoi ghlas i bpríosún.

²¹ Ach tar éis don phobal uile a bheith baiste, tharla, nuair a bhí Íosa féin baiste agus é ag guí, gur osclaíodh na flaithis,

²² agus tháinig an Spiorad Naomh anuas air i gcruth corpartha mar a bheadh colm, agus tháinig glór ó na flaithis: “Is tú mo Mhac muirneach; is duit a thug mé gnaoi.”

²³ Agus bhí Íosa féin, ag tosú dó, timpeall tríocha bliain: ina mhac–mar a síleadh–do Iósaef mac Héilí,

²⁴ mhic Mhatat, mhic Léiví, mhic Mheilchí, mhic Iannáí, mhic Iósaef,

²⁵ mhic Mhataitias, mhic Ámós, mhic Nahúm, mhic Easlaí, mhic Nagáí,

²⁶ mhic Mhát, mhic Mhataitias, mhic Sheiméín, mhic Iósaech, mhic Ióda,

²⁷ mhic Réasa, mhic Zarabáibil, mhic Shéailtiéil, mhic Néirí,

²⁸ mhic Mheilchí, mhic Aidí, mhic Chósam, mhic Ealmádam, mhic Éar,

²⁹ mhic Iósua, mhic Eiliasar, mhic Ióirím, mhic Mhatat, mhic Léiví,

³⁰ mhic Shimeon, mhic Iúdá, mhic Iósaef, mhic Iónam, mhic Eiliáicím,

³¹ mhic Mheilé, mhic Mheanná, mhic Mhatata, mhic Nátán, mhic Dháiví

³² mhic Ieise, mhic Óbaed, mhic Bhóaz, mhic Shalá, mhic Náiseon,

³³ mhic Aimineadab, mhic Aidmin, mhic Arnáí, mhic Heasrón, mhic Pheiris, mhic Iúdá,

³⁴ mhic Iacób, mhic Íosác, mhic Abrahám, mhic Thearach, mhic Náchór,

³⁵ mhic Shearúg, mhic Réú, mhic Pheilig, mhic Éibear, mhic Shéala,

³⁶ mhic Cháineam, mhic Arfacsad, mhic Shéam, mhic Naoi, mhic Laimeich,

³⁷ mhic Mhatúsalach, mhic Eineoc, mhic Iaireid, mhic Mhahalalael, mhic Cháineam,

³⁸ mhic Eanós, mhic Shéat, mhic Ádhaimh, mhic Dé.