Lúcás 2 - An Tiomna Nua agus Leabhar na Salm 2012

Oíche Nollag

¹ Tharla sna laethanta sin go ndeachaigh forógra amach ó Chaesar Ágastas an domhan uile a chlárú.

² Ba é seo an chéad chlárú a rinneadh nuair a bhí Cuirínias ina ghobharnóir ar an tSiria.

³ Agus chuaigh cách chun a gcláraithe, gach aon duine go dtí a chathair féin.

⁴ Agus chuaigh Iósaef freisin suas ón nGailíl, ó chathair Nazarat, go hIúdáia, go dtí cathair Dháiví ar a nglaotar Beithil, de bhrí gur de theaghlach agus de threabhchas Dháiví é féin,

⁵ chun a chláraithe mar aon le Muire, a bhean chéile, a bhí ag iompar clainne.

⁶ Agus tharla, le linn dóibh a bheith ann, gur tháinig a hionú,

⁷ agus rug sí a céad-ghin mhic, agus chuir i gcrios ceangail é, agus shín i mainséar é, de bhrí nach raibh slí dóibh san ósta.

⁸ Agus bhí aoirí sa taobh tíre céanna, amuigh faoin spéir, ag faireachán oíche i mbun a dtréada.

⁹ Agus sheas aingeal an Tiarna láimh leo, agus shoilsigh glóir an Tiarna ina dtimpeall, agus bhí uamhan agus eagla mhór orthu.

¹⁰ Agus dúirt an t-aingeal leo: “Ná bíodh eagla oraibh: óir féach, tá dea-scéala agam daoibh a chuirfidh áthas mór ar an bpobal uile:

¹¹ rugadh Slánaitheoir daoibh inniu–is é Críost an Tiarna é–i gcathair Dháiví.

¹² Agus is comhartha daoibh é seo: gheobhaidh sibh naíonán i gcrios ceangail agus é ina luí i mainséar.”

¹³ Agus bhí go tobann, mar aon leis an aingeal, cuallacht de shlua na bhflaitheas ag moladh Dé agus ag rá:

¹⁴ “Glóir do Dhia in uachtar Neimhe, agus síocháin ar talamh don mhuintir ar a bhfuil a ghnaoi!”

¹⁵ Agus nuair a dʼimigh na haingil uathu sna flaithis, dúirt na haoirí le chéile: “Téimis anonn go Beithil, agus feicimis an ní seo a tharla a dʼinis an Tiarna dúinn.”

¹⁶ Agus dʼimigh go deifreach, agus fuair siad Muire agus Iósaef, agus an naíonán ina luí sa mhainséar.

¹⁷ Agus ar a fheiceáil dóibh, dʼinis siad an ní a dúradh leo mar gheall ar an leanbh seo.

¹⁸ Agus cách a chuala, bʼionadh leo na nithe a dúirt na haoirí leo.

¹⁹ Agus thaiscigh Muire ina cuimhne na nithe seo uile, ag machnamh orthu ina croí.

²⁰ Agus chuaigh na haoirí ar ais ag glóiriú agus ag moladh Dé faoinar chuala siad agus a bhfaca siad, de réir mar a bhí ráite leo.

An Timpeallghearradh: An Toirbhirt

²¹ Nuair a bhí ocht lá caite agus é le timpeall-ghearradh, tugadh ‘Íosa’ mar ainm air, mar a thug an t-aingeal air sular gábhadh sa bhroinn é.

²² Agus nuair a bhí na laethanta caite agus iad le híonghlanadh de réir dhlí Mhaois, thug siad go hIarúsailéim é le toirbhirt don Tiarna–

²³ mar atá scríofa i ndlí an Tiarna: “Gach fireannach atá ina chéad-ghin, is rud coisricthe don Tiarna é”–

²⁴ agus chun go n-ofrálfaidís mar íobairt, de réir a bhfuil ráite i ndlí an Tiarna, “péire colm nó dhá ghearrcach colúir.”

²⁵ Bhí fear in Iarúsailéim darbh ainm Simeon, agus bhí an fear seo fíréanta diaga, ag súil le sólás Iosrael, agus bhí an Spiorad Naomh ina luí air.

²⁶ Agus bhí foilsiú faighte ón Spiorad Naomh aige nach bhfeicfeadh sé an bás nó go bhfeicfeadh Meisias an Tiarna.

²⁷ Tháinig sé, faoi luí an Spioraid, isteach sa Teampall; agus le linn dá thuismitheoirí a bheith ag tabhairt an linbh Íosa isteach chun go ndéanfaidís ar a shon de réir nós an dlí,

²⁸ ghlac seisean chuige ina ucht é, agus mhol Dia agus dúirt:

Caintic Shimeon

²⁹ “Anois atá tú ag scaoileadh do sheirbhísigh uait, a Thiarna, de réir dʼfhocail, faoi shíocháin,

³⁰ mar tá mo shúile tar éis do shlánú a fheiceáil

³¹ atá ullamh agat faoi chomhair na bpobal uile:

³² solas chun na náisiúin a shoilsiú agus glóir do phobail Iosrael.”

Tairngreacht Shimeon

³³ Agus bhí a athair agus a mháthair ag déanamh ionaidh de na nithe a dúradh mar gheall air.

³⁴ Agus bheannaigh Simeon iad agus dúirt le Muire a mháthair: “Féach, is dán dó seo a bheith ina thrúig leagtha agus éirithe dá lán in Iosrael agus ina chomhartha a shéanfar–

³⁵ agus gabhfaidh claíomh trí dʼanam féin–chun go bhfoilseofar smaointe as mórán croíthe.”

³⁶ Agus bhí ban-fháidh ann freisin, Anna iníon Fhanúéil, de threibh Áiséar, í anonn i mblianta móra: mhair sí seacht mbliana ag a fear céile tar éis a hóchta.

³⁷ Fágadh ina baintreach í, agus bhí ceithre bliana ochtód an uair seo aici; agus ní fhágadh sí an Teampall, ag seirbhís do Dhia de lá agus dʼoíche le troscadh agus le hurnaithe.

³⁸ Tháinig sí i láthair an uair sin féin, agus thug moladh agus buíochas do Dhia; agus labhair sí mar gheall air le cách a bhí ag súil le hIarúsailéim a fhuascailt.

³⁹ Nuair a bhí gach ní curtha i gcríoch acu de réir dhlí an Tiarna, dʼfhill siad ar an nGailíl, go dtí a gcathair féin Nazarat.

⁴⁰ Agus dʼfhás an leanbh agus neartaigh, é lán dʼeagna; agus bhí grásta Dé ina luí air.

Íosa i Measc na Máistrí

⁴¹ Théadh a thuismitheoirí gach bliain go hIarúsailéim i gcomhair fhéile na Cásca.

⁴² Agus nuair a bhí sé dhá bhliain déag, chuaigh siad suas de réir ghnás na féile;

⁴³ agus nuair a bhí na laethanta caite acu, agus iad ag filleadh, dʼfhan an buachaill Íosa in Iarúsailéim ina ndiaidh, gan a fhios dá thuismitheoirí.

⁴⁴ Shíl siad gur ar an gcomplacht a bhí sé, agus ar theacht dóibh siúl aon lae, bhí siad dá lorg i measc a ngaolta agus a lucht aitheantais,

⁴⁵ agus nuair nach bhfuair siad é, chuaigh siad ar ais go hIarúsailéim dá lorg.

⁴⁶ I gcionn trí lá fuair siad sa Teampall é ina shuí i measc na máistrí ag éisteacht leo agus ag cur ceisteanna chucu.

⁴⁷ Agus bhí alltacht ar chách a bhí ag éisteacht leis mar gheall ar a thuiscint agus ar a fhreagraí.

⁴⁸ Nuair a chonaic siad é, ghabh iontas iad, agus dúirt a mháthair leis: “A mhic, cad chuige a ndearna tú é seo orainn? Féach, bhí mise agus dʼathair do do lorg go cráite.”

⁴⁹ Agus dúirt sé leo: “Cad chuige a mbeadh sibh do mo lorg? Nach raibh a fhios agaibh gur i dteach mʼAthar nárbh fholáir dom a bheith?”

⁵⁰ Ach níor thuig siad an focal a labhair sé leo.

⁵¹ Agus chuaigh sé síos in éineacht leo agus tháinig go Nazarat, agus bhí sé faoina smacht. Agus thaiscigh a mháthair go dílis na nithe seo uile ina croí.

⁵² Agus bhí Íosa ag dul ar aghaidh in eagna agus i bpearsa agus i ngrásta i láthair Dé agus daoine.