2 Ríthe 21 - An Bíobla Naomhtha 1817 (Bedell)

Caibidil XXI. Olcas Mhanasseh an rí. 19 Agus Amon.

¹ Do bhí Manasseh dhá bhlíadhain déug dáois a núair do thosuigh sé a ríghe, agus do ríoghaidh cúig bhlíadhna déug agus dá fhithchiod ann Ierusalem. Agus do bé ainm a mhathar Hephsibah.

² Agus do rinne se an ní fa holc a radharc an TIGHEARNA, do réir adhfhuathmhaireachd ná ngeinteadh, noch do theilg an TIGHEARNA amach roimhe chloinn Israel.

³ Oir do chuir sé súas a rís na háite árda noch do mhill Heseciah a athair; agus do chuir sé altóra súas do Bhaal, agus do rinne sé garrán, mar do rinne Ahab rígh Israel; agus do adhuir sé slúagh neimhe, agus do rinne serbhís dóibh.

⁴ Agus do rinne sé altóra a ttigh an TIGHEARNA, dá ndubhairt an TIGHEARNA, Ann Ierusalem chuirfios mé mainm.

⁵ Agus do chuir sé altóra súas do shlúagh neimhe uile a ndá chúirt thighe an TIGHEARNA.

⁶ Agus thug ar a mhac dul thríd an tteine, agus do adhradh daimsearuibh, agus do níodh droigheachd, agus cumann ré leannánuibh síthe agus re luchd fáistine: doibrigh sé mórán uilc a radharc an TIGHEARNA, ler bhrostuigh é chum feirge.

⁷ Agus do shuighidh sé íamháigh ghrábhálta don gharrán do rinne sé annsa tigh, a ttaóibh a ndubhairt an TIGHEARNA ré Dáibhi, agus re Solamh a mhac, Annsa tighsi, agus ann Ierusalem, noch do thogh mé as treabhuibh Israel uile, chuirfios mé mainm go bráth:

⁸ Agus ní chorrocha mé cosa Israel nios mó amach as a ndúithche féin noch thug mé dá naithribh; amháin má choimhéaduid síad a dhéanamh do réir a nuile dhlighe, do aithin mo shearbhfhoghantuigh Maóise dhíobh.

⁹ Acht níor éisteadarsan: agus do tharruing Manasseh íad chum niós mó dulc do dhéanamh ná a ndéarnadar na cineadhacha do dhíbuir an TIGHEARNA roimhe chloinn Israel.

¹⁰ ¶ Agus do labhair an TIGHEARNA tre na shearbhfhoghantaibh na fáighe, dha rádh,

¹¹ Do bhrígh go ndéarnuidh Manasseh rígh Iúdah na neithe adhfhuathmharsa, go ndéarna sé olc ós cionn a ndéarnadar na Hamorítigh, noch do bhí roimhe, agus go ttug air Iúdah mar an gcéadna peacughadh le na iodhaluibh:

¹² Ar a nadhbharsin is marso a deir an TIGHEARNA Día Israel, Féuch, atáim ag tabhairt a leithéid sin dulc ar Ierusalem agus ar Iúdah, gidh bé ar bith chluinfios é, go mbíaidh fuáim iona dhá chluáis.

¹³ Agus sínfidh mé tar Ierusalem dúrubha Shamária, agus plumba thighe Ahab: agus cuimeoluidh mé Ierusalem mar chuimlios duine mias, dá chumailt, agus da hiompógh bun ós cionn.

¹⁴ ¶ Agus tréigfidh mé fuighioll moighreachda, agus seachoduigh mé a láimh á námhad íad; agus béid na ccreich agus na nédail agá naimhde uile;

¹⁵ Do bhrígh go ndéarnadar an ní dob olc ann mo radharc, agus gur chorruigheadar chum feirge mé, on ló fá ttangadar a naithre amach as an Négipt, gus a niugh.

¹⁶ Tuilleamh oile do dhóirt Manasseh fuil neímhchiontach go ro iomarcach, nó gur lion sé Ierusalem ón chionn go chéile; táobh amuich dá pheacadh lé ttug sé ar Iúdah peacughadh, an déanamh an neithe fa holc a radharc an TIGHEARNA.

¹⁷ ¶ Anois an chuid oile do ghníomhaibh Mhanasseh, agus a ndéarna sé uile, agus a pheacaidh noch do pheacaidh sé, nach bhfuilid scríobhtha a leabhar croinice ríogh Iúdah?

¹⁸ Agus do choduil Manasseh a bhfochair a aithreadh, agus do hadhlaiceadh a ngáirdín a thighe féin é, a ngáirdín Ussah: agus do ríoghaidh Amon a mhac na áit.

¹⁹ ¶ Do bhí Amon dhá bhlíadhuin agus fithche daóis an tan do thosuigh sé a ríghe, agus do ríoghaidh dhá bhlíadhuin ann Ierusalem. Agus do bé ainm a mhathar Mesulemet, inghean Harus ó Iotbah.

²⁰ Agus do rinne sé an ní dob olc a radharc an TIGHEARNA, mar do rinne a athair Manasseh.

²¹ Agus do shiubhail sé annsna huile shlighthibh ann ar shiubhail a athair, agus do rinne serbhís do na hiodhaluibh dá ndearnuidh a athair serbhís, agus do adhair sé dhóibh:

²² Agus do thréig sé an TIGHEARNA Día a aithreadh, agus níor shiubhail sé a slighe an TIGHEARNA.

²³ ¶ Agus do chumadar searbhfhoghantuighe Amon feall na aghaidh, agus do mharbhadar an rígh iona thigh féin.

²⁴ Agus do mharbhadar dáoine na tíre an luchd sin uile do rinne feall a naghaidh an rígh Amon; agus do rinneadar dáoine na tíre rígh do Iosiah a mhac na aít.

²⁵ ¶ Anois an chuid oile do ghniomhuibh Amon noch do rinne sé, nach bhfuilid síad scríobhtha a leabhar croinice ríogh Iúdah?

²⁶ Agus do hadhlaiceadh iona thúama é a ngáirdín Ussa: agus do bhí Iosiah a mhac na rígh na áit.