Síorach 44 - An Bíobla Naofa 1981

I Stair na bPatrarc

¹ Molaimis anois fir chailiúla, na sinsir a bhí againn ó aois go haois.

² [Thug] an Tiarna glóir mhór dóibh; tríothu a d'fhoilsigh sé a mhórgacht riamh anall.

³ Bhí ardfhlaitheas ag cuid acu ar a ríochtaí agus thuill siad clú de bharr a gcumais; bhí comhairleoirí críonna ina measc freisin, a thug oracail fháidhiúla uathu,

⁴ Agus fir a thug treoir don phobal lena moltaí, de thoradh a dtuisceana ar léann a muintire, agus le briathra ciallmhara a dteagaisc.

⁵ Bhí cuid acu ina gcumadóirí ceolta binne, agus bhreacaidís laoithe ar phár.

⁶ Fir shaibhre chumhachtacha ab ea cuid eile fós acu, a chaith a saol go síochánta ina n‑áitribh féin.

⁷ Thugadh lucht a gcomhaimsire ómós do na fir seo uile, agus ba mhór é a gclú lena ré.

⁸ D'fhág cuid acu dea-cháil ina ndiaidh, sa chaoi go moltar go haer iad go fóill.

⁹ Tá daoine eile ann, áfach, nach bhfuil aon chuimhne orthu anois, a chuaigh ar ceal faoi mar nach mbeidís riamh ann; tá siad faoi mar nár rugadh riamh iad agus is é an dála céanna é ag a gclann ina ndiaidh.

¹⁰ Ach fir dhiaganta ab ea na fir seo leanas, nach ndearnadh dearmad ar a ndea-oibreacha riamh.

¹¹ Mairfidh a gconách ag a sliocht, agus a n‑oidhreacht [ag sliocht a sleachta].

¹² Seasann a sliocht leis na conarthaí, agus, a bhuíochas orthu, cloíonn sliocht a sleachta leo chomh maith.

¹³ Mairfidh a sliocht go brách, agus ní thiocfaidh meath ar a nglóir.

¹⁴ Cuireadh a gcoirp faoi shuan san úir, ach maireann a gcáil ó ghlúin go glúin.

¹⁵ Fógróidh na ciníocha a gcuid eagnaíochta, agus déanfaidh an comhthionól iad a mholadh go hard.

¹⁶ Bhí gnaoi an Tiarna ar Eineoc agus tógadh in airde é, sampla aithrí do na glúine go léir.

¹⁷ Fuarthas Naoi foirfe gan cháim; in uain na feirge rinneadh de an [ceap]; trídsean a caomhnaíodh iarmhar ar talamh nuair a tháinig an díle.

¹⁸ Rinneadh conarthaí síoraí leis, nach scriosfaí an uile fheoil le díle go brách arís.

¹⁹ Ba athair mhórán ciníocha é Abrahám, agus ní bhfuarthas aon duine mar é i nglóir.

²⁰ Chomhlíon sé dlí an té is Airde, agus chuaigh i gceangal conartha leis; dhaingnigh sé an conradh ina fheoil féin, agus nuair a promhadh é, chruthaigh sé dílis.

²¹ Uime sin gheall an Tiarna de bhrí na mionn go mbeannófaí na ciníocha ina shíol; go gcuirfeadh sé an rath air mar luaithreach na talún, go mórfadh sé a shliocht dála na réaltaí, go dtabharfadh sé an talamh mar oidhreacht dóibh ó mhuir go muir, agus ón abhainn go críocha na cruinne.

²² Thug sé an gheallúint chéanna d'Íosác, ar son a athar Abrahám.

²³ Chuir sé beannacht an uile dhuine agus an conradh ag lonnú ar cheann Iacóib; thug sé aitheantas dó lena bheannachtaí, agus thug dó [an talamh] mar oidhreacht; roinn sé é ina chodanna, agus dháil sé é ar an dá threibh déag.