Síorach 34 - An Bíobla Naofa 1981

Brionglóidí

¹ Leis an daoi a bhaineann dóchas folamh bréagach; cuireann brionglóidí sceitimíní ar ghliogairí.

² Is cuma muinín a chur i mbrionglóidí nó greim a bhreith ar scáileanna nó rith i ndiaidh na gaoithe.

³ Is mar a chéile brionglóid [agus scathán], cosúlacht na gceannaithe os comhair na gceannaithe;

⁴ Cad a ghlanfar trí mhíghlaine? Cad a fhíorófar trí bhréag?

⁵ Níl in asarlaíocht, i dtuartha, agus i mbrionglóidí, ach baois, mar speabhraídí mná in íona.

⁶ Mura seoltar iad mar fhiosrú ón Té is Airde, ná tabhair aird ar bith orthu.

⁷ Is iomaí duine a mheall brionglóidí, agus theip orthu siúd a chuir a muinín iontu.

⁸ Comhlíonfar an dlí gan bhréagaireacht, agus is é béal na fírinne a chuireann barr maise ar an eagna.

Taisteal

⁹ Bíonn a lán ar eolas ag fear mórthaistil, agus labhróidh fear na mórthaithí go ciallmhar.

¹⁰ Is beag a bhíonn ar eolas ag an duine gan taithí, ach an té a rinne taisteal bíonn sé ildánach.

¹¹ Is iomaí rud a chonaic mé ar mo chamchuarda, agus fuair mé tuiscint thar mar a fhéadaim a chur i bhfocail.

¹² Is minic a bhí mé i mbaol m'anama, ach tháinig mé slán dá mbarr siúd.

¹³ Mairfidh spiorad lucht eagla an Tiarna, mar tá a ndóchas sa té a fhuasclóidh iad.

¹⁴ An té ar a bhfuil eagla an Tiarna, ní bheidh sé cúthail; ní bheidh drochmhisneach air, mar gurb eisean a dhóchas.

¹⁵ Is méanar do mheanma an té ar a bhfuil eagla an Tiarna; cé air a bhfuil sé ag brath? cé is taca dó?

¹⁶ Tá súile an Tiarna orthu siúd a thugann grá dó; Is dídean thréan é agus teannta láidir; is fothain é ón ngaoth the agus scáth ó ghrian an mheanlae, is cosaint é ar an mbarrthuisle agus lámh chunta in aghaidh titim.

¹⁷ Ardaíonn sé an t‑anam agus tugann solas do na súile; bronnann sé leigheas agus beatha agus beannacht.

Íobairtí agus an Dlí

¹⁸ Muga maga is ea íobairt d'ofráil a fuarthas go héagórach; ní dual glacadh le bronntanas na gcoirpeach.

¹⁹ Ní gean leis an Té is Airde ofrálacha na n‑éagráifeach, agus ní dhéanann raidhse ofrálacha leorghníomh leis i bpeacaí.

²⁰ Is cuma nó mac a bhású os comhair súile a athar, íobairt a ofráil as cuid na mbocht.

²¹ Beagán bia is beatha don bhocht, agus an té a thógann chun siúil é, is lámh dhearg é.

²² An té a bhaineann a shlí bheatha dá chomharsa, maraíonn sé é; an té a bhaineann a thuarastal den fhear oibre, doirteann sé fuil.

²³ Má thógann duine ach go leagann duine eile, cad a bhíonn dá bharr acu ach a dhua?

²⁴ Má ghuíonn duine ach go mallaíonn duine eile, cén glór lena n‑éistfidh an máistir?

²⁵ Má níonn duine é féin tar éis baint le corpán, ach go mbaineann sé leis arís, cad a bhíonn aige de bharr a ionlaithe?

²⁶ Sé an dála céanna é ag an té a dhéanann troscadh ar son a pheacaí, má imíonn sé agus na peacaí céanna a dhéanamh arís, cé thabharfaidh cluas dá ghuí, agus cad a bheidh aige de bharr a umhlaithe?