Síorach 32 - An Bíobla Naofa 1981

¹ An ndearnadar ceannaire díot? Ná tagadh éirí in airde ort; Iompair thú féin ina measc mar dhuine díobh féin; tabhair aire dóibh, agus ansin bí i do shuí.

² Nuair a bheidh do chúraimí déanta agat, suigh agus bí meidhreach dá mbarr, agus faigh coróin ar son do chumas ceannais.

³ Labhair, a sheanóir, óir oireann sin duit; ach déan amhlaidh le cruinneas cainte gan cur isteach ar an gceol.

⁴ Má bhíonn siamsa ann, ná bí ag caint gan stad, agus ná bí ag saíocht in antráth.

⁵ Séala carmhogail ar leaba óir, is ea coirm cheoil ag fleá fíona.

⁶ Séala smaragaide ar leaba luachmhar óir is ea streancán ceoil le fíon fónta.

⁷ Labhair a ógánaigh, más gá duit, ach gan thar dhá uair, agus má chuirtear ceist chugat.

⁸ Labhair go cruinn agus abair mórán i mbeagán focal; bíodh gothaí an eolais ort, ach gan fonn cainte ort.

⁹ I measc na gceannasach, ná hiompair thú féin mar dhuine díobh; agus ná bí ag giofaireacht agus duine eile ag caint.

¹⁰ Gabhann an splanc roimh an toirneach agus gabhann gnaoi roimh fhear modhúil.

¹¹ Éirigh chun imeacht in am, agus ná bí ar deireadh; brostaigh abhaile agus ná bí ag déanamh moille.

¹² Bain spraoi as ansiúd agus déan mar is mian leat féin, ach ná peacaigh le barr díomas teanga.

¹³ Beannaigh ar a shon sin uile an té a rinne thú, agus a shásaíonn thú lena nithe fónta.

Eagla Dé

¹⁴ An té arb eagal leis an Tiarna, glacfaidh sé lena smacht; beidh a ghnaoi ar an muintir a bhíonn á thóraíocht le díograis.

¹⁵ An té a bhíonn ag tóraíocht an dlí, sásóidh sé é; ach beidh sé ina cheap tuisle ag an bhfimíneach.

¹⁶ An mhuintir ar a bhfuil eagla an Tiarna, beidh siad saorbhreathach, agus déanfaidh siad dea-ghníomhartha a spreagadh mar a dhéanfadh lóchrann.

¹⁷ Seachnaíonn an peacach an chasaoid, agus bíonn leithscéal aige chun déanamh mar is áil leis.

¹⁸ Ní dhéanfaidh an fear stuama neamhaird d'aon tuairim; agus ní bheidh an duine díomasach [aindiagaithe] ag cúbadh chuige le heagla.

¹⁹ Ná tabhair léim caorach i nduibheagán, agus ná bíodh mairg tar éis birt ort.

²⁰ Ná tabhair conair phriaclach ort féin, le heagla go mbainfeadh clocha tuisle asat.

²¹ Ná bíodh an iomad muiníne agat ar chonair réidh.

²² Bí ag faire amach do do chlann féin.

²³ Seachain thú féin i ngach beart, mar is é sin is comhlíonadh na n‑aitheanta ann.

²⁴ An té a chuireann a mhuinín sa dlí, tugann sé aird ar na haitheanta; an té a bfuil iontaoibh aige as an Tiarna, ní bheidh thiar air.