Síorach 28 - An Bíobla Naofa 1981

¹ An té a imríonn díoltas, imreoidh an Tiarna díoltas air, mar coinníonn sé cuntas cruinn ar a pheacaí.

² Maith do do chomharsa an éagóir a dhéanann sé, agus nuair a dhéanfaidh tú guí, maithfear do pheacaí duit.

³ Má choimeádann duine olc istigh do dhuine eile, conas is féidir leis leigheas a lorg ar an Tiarna?

⁴ Mura ndéanann sé trócaire ar dhuine cosúil leis féin, conas is féidir leis maithiúnas a iarraidh ina pheacaí féin?

⁵ Níl ann féin ach feoil agus cothaíonn sé fuath; cé a mhaithfidh a pheacaí dó?

⁶ Cuimhnigh ar do chríoch dheireanach, agus scoir den fhuath; cuimhnigh ar an scrios agus an bás, agus mair de réir na n‑aitheanta.

⁷ Cuimhnigh ar na haitheanta agus ná bíodh olc agat do do chomharsa; cuimhnigh ar chonradh an Té is Airde, agus ná tóg ceann den aineolas.

⁸ Seachain an t‑achrann agus is lú peaca a dhéanfaidh tú: óir adhnann fear drochmhianaigh achrann.

⁹ Cothaíonn an fear peacúil aighneas idir cairde, agus síolann eascairdeas idir lucht síochána.

¹⁰ De réir meid an chonnaidh is ea a bheidh an béileach, agus de réir chruas an chomhraic a bheidh an bhladhm; de réir neart an fhir a bheidh a chuthach, agus méadóidh ar a fhearg, de réir a mhaoine.

¹¹ Adhnann aighneas tobann tine, agus doirteann achrann mire fuil.

¹² Séid an sméaróid, agus lasfaidh sí; caith seile uirthi agus múchfaidh sí; as do bhéal amach a thagann siad araon.

An Teanga

¹³ Léan ar an gcúlchainteoir agus ar an gcladhaire; mar is iomaí duine de lucht na síochána a scrios sé.

¹⁴ Rinne an [tromaíocht] a lán a shuaitheadh, agus a scaipeadh ó náisiún go náisiún; scrios sí cathracha daingne, agus leag ar lár teaghlaigh na dtréan.

¹⁵ Thiomáin an [tromaíocht] mná cróga ar shiúl agus d fhág iad gan luach a saothair.

¹⁶ Ní bheidh suaimhneas ag an té a thabharfaidh cluas di; ná ní chuirfidh sé faoi go síochánta.

¹⁷ Fágann buille den lasc riasta, ach briseann léasadh teanga na cnámha.

¹⁸ Is iomaí duine a thit le faobhar claímh, ach is mó ná sin a thit le faobhar teanga.

¹⁹ Is méanar don té a díonadh uirthi, nár tháinig faoina cuthach, nár iompair a cuing, agus nár cuibhríodh faoina geimhle.

²⁰ Óir is cuing iarainn a cuing agus is geimhle cré-umha a geimhle;

²¹ Anbhás an bás a imríonn sí, agus is fearr Seól ná í.

²² Ní bhfaighidh sí smacht ar na fíréin, ná ní dhófar iad ina tine.

²³ An mhuintir a thréigfidh an Tiarna, titfidh siad inti; bladhmfaidh sí ina measc agus ní mhúchfar í; scaoilfear fúthu í mar a dhéanfaí leon, agus bascfaidh sí iad mar a dhéanfadh liopard.

²⁴ Cuir fál droighin timpeall d fháltais, agus cuir do chuid airgid agus óir faoi ghlas i dtaisce.

²⁵ Déan scálaí agus méa do do bhriathra, agus doras agus bolta do do bhéal.

²⁶ Seachain agus ná déan peaca le [do theanga], le heagla go dtitfeá mar chreach leis an té atá i luíochán.