Síorach 1_1 - An Bíobla Naofa 1981

An Eagna

¹ Ón Tiarna an uile eagna, agus is leis í go brách.

² Gaineamh na mara agus braonta na fearthainne, agus laethanta na síoraíochta, cé dhéanfaidh iad a áireamh?

³ Airde na spéire, agus leithead na cruinne, agus [doimhne an dubhaigéin], cé ransóidh iad?

⁴ Cruthaíodh an eagna roimh gach ní eile, agus tá bua na tuigse ann ón tsíoraíocht anall.

⁵ (Briathar Dé ar neamh foinse na heagna, agus is iad na dlíthe síoraí a bealaí.)

⁶ Cé dó ar foilsíodh fréamh na heagna? cé arb eol dó a hildána?

⁷ (Cé dó ar foilsíodh eolas na heagna, agus a fuair tuiscint ar a hilbhealaí?)

⁸ Níl ach aon eagnaí amháin ann; is sáruamhnach é, agus é ina shuí ina ríchathaoir;

⁹ Eisean an Tiarna, a chruthaigh [an eagna]; eisean a chonaic agus a mheas í, agus a dhoirt amach í ar a oibreacha go léir.

¹⁰ Thug sé mar bhronntanas í don chine daonna ar fad, agus dháil sé í ar na daoine a bhfuil grá acu dó.

Eagla Dé

¹¹ Is glóir agus móráil í eagla an Tiarna; is aoibhneas í agus coróin na lúcháire.

¹² Cuireann eagla an Tiarna lúcháir ar an gcroí, tugann sí aoibhneas agus áthas agus fad saoil.

¹³ An té arb eagla leis an Tiarna beidh an rath air ag ceann cúrsa; agus beidh beannacht air lá a bháis.

¹⁴ Tús na heagna, eagla an Tiarna; gineadh í leis na creidmhigh i mbroinn a máthar.

¹⁵ Rinne sí a nead i measc daoine mar dhaingean síoraí; agus cloífidh sí lena síol go dílis.

¹⁶ Comhláine na heagna í eagla an Tiarna; cuireann sí meisce ar na daoine lena torthaí.

¹⁷ Líonann sí a dteach uile le mianta a gcroí, agus a stórais lena fómhar.

¹⁸ Coróin na heagna eagla an Tiarna; cuireann sí bláth ar an tsíocháin agus ar an tsláinte.

¹⁹ D'fhéach an Tiarna uirthi agus rinne í a mheas; dhoirt sé anuas léann agus eolas na tuisceana, agus mhóraigh glóir lucht a sealbhaithe.

²⁰ Fréamh na heagna eagla an Tiarna, agus fad saoil is ea a craobhacha.

²¹ (Tógann eagla an Tiarna peacaí ar shiúl; agus an té a mhaireann dílis, casann sé an fhearg i leataobh.)

Foighne

²² Ní dhéanfaidh fearg [an choirpigh an coirpeach] fíréanta; óir is é buile a fheirge a leagann ar lár é.

²³ Fanfaidh fear na foighne leis an uain, agus eascróidh an t‑aoibhneas dó faoi dheireadh.

²⁴ Ceilfidh sé a bhriathra go dtaga an uain, agus beidh cur síos ar a stuamacht ó bhéal a lán.

Fíréantacht

²⁵ I gciste na heagna tá ráite críonna, ach is fuath leis an gcoirpeach an fhíréantacht.

²⁶ Má tá dúil agat san eagna, coimeád na haitheanta, agus seolfaidh an Tiarna chugat í.

²⁷ Óir is é is eagna agus teagasc ann ná eagla an Tiarna, agus is gean leis an dílse agus an cheansacht.

²⁸ Ná bí easumhal d'eagla an Tiarna, agus ná téigh ina gaire le croí i bpáirt.

²⁹ Ná bí ag cur i gcéill go poiblí, agus bí aireach faoi do bhriathra.

³⁰ Ná hardaigh thú féin le heagla go dtitfeá, agus go dtabharfá aithis ort féin; nochtfaidh an Tiarna do rúin, agus caithfidh anuas thú i láthair an chomhthionóil, mar nár tháinig tú faoi eagla an Tiarna ach do chroí lán de chalaois.