Seanfhocal 29 - An Bíobla Naofa 1981

¹ An té a cheartaítear go minic, ach a chruann a mhuineál, bascfar é go tobann gan fáil ar théarnamh.

² Nuair a bhíonn na fíréin i gceannas, bíonn lúcháir ar an bpobal; nuair a bhíonn na hurchóidigh i gcumhacht, bíonn an pobal ag osnaíl.

³ An té a thugann grá don eagna, cuireann sé áthas ar a athair; ach an té a thaithíonn striapacha, scaipeann sé a chuid.

⁴ Daingníonn rí a thír lena cheartas, ach milleann an feallaire é.

⁵ An té a thugann bladar dá chomharsa, leathann sé líon faoina chosa.

⁶ Tá gaiste [faoi chosa] an urchóidigh, ach ritheann an fíréan ar aghaidh go lúcháireach.

⁷ Déanann an fíréan cúram de chearta na mbocht, ní chuireann a leithéid d'eolas as don urchóideach.

⁸ Déanann scigirí cíor thuathail de chathracha, ach cuireann saoithe srian le fearg.

⁹ Téadh saoi chun argóna le daoi, ach cibé acu i bhfearg nó i ngáire é, ní éireoidh leis.

¹⁰ Is fuath le lucht fola an fear gan cháim, ach [is mór le] daoine ionraice a bheo.

¹¹ Scaoileann an t‑amadán lena racht feirge, ach cuireann an saoi srian leis agus smacht air.

¹² Má éisteann rialtóir le héitheach, beidh a fheidhmeannaigh uile ina ropairí.

¹³ Castar an bochtán agus an t‑úsaire ar a chéile; cuireann an Tiarna léas ina súile araon.

¹⁴ Má thugann rí breith ar na boicht le cothromas, bunófar a ríchathaoir go brách.

¹⁵ Bronnann an bata agus an ceartú gaois, ach an leanbh a fhágtar faoi féin, cuireann sé náire ar a mháthair.

¹⁶ Nuair a bhíonn na hurchóidigh [i gcumhacht], leathnaíonn an peaca; ach feicfidh na fíréin ar lár iad.

¹⁷ Smachtaigh do mhac, agus tabharfaidh sé suaimhneas aigne duit; cuirfidh sé áthas ar do chroí.

¹⁸ San áit nach mbíonn fís, caitheann an pobal díobh gach srian; ach is beannaithe an té a choimeádann an dlí.

¹⁹ Ní le briathra amháin a cheartaítear an daor; fiú má thuigeann sé iad, ní thabharfaidh sé aird orthu.

²⁰ An bhfeiceann tú duine éigin béalscaoilteach? tá níos mó dóchais ann d'amadán ná dósan.

²¹ An té a bhíonn ag tláithínteacht le daor óna oige, eisean a bheidh [mar oidhre] air faoi dheireadh.

²² Adhnann an fear drochmhianaigh achrann, agus is cúis mhór peaca fear na feirge.

²³ Déanfaidh a dhíomas féin fear a threascairt, ach bainfidh an t‑uiríseal ó chroí onóir amach.

²⁴ Tá fuath ag comrádaí an ghadaí dá bheo féin; cluineann sé an mhallacht ach ní sceitheann.

²⁵ Is gaiste é eagla roimh dhaoine, ach ní baol don té a chuireann a mhuinín sa Tiarna.

²⁶ Is iomaí duine a bhíonn ag lútáil le rialtóir, ach is ón Tiarna a fhaigheann gach duine a cheart.

²⁷ Is fuath leis an bhfíréan an coirpeach; agus is fuath leis an urchóideach an té is díreach slí.