Salm 98 - An Bíobla Naofa 1981

Tiarna Buach agus Breitheamh Cóir

1 Salm.

¹ Salm. 1 Canaigí amhrán úr don Tiarna, óir rinne sé éachtaí. Le neart a dheasláimhe is a chuisle naofa, rug sé bua dó féin.

² D'fhoilsigh an Tiarna a shlánú; nocht sé a fhíréantacht do na náisiúin.

³ Chuimhnigh sé ar a bhuanghrá agus a dhílse do theaghlach Iosrael. Chonaic críocha uile na cruinne slánú ár nDé.

⁴ Gairdigí sa Tiarna a thíortha uile, agus nochtaigí bhur n‑áthas dó.

⁵ Canaigí Salm don Tiarna leis an gcruit agus le fuaim na cláirsí.

⁶ Tógaigí gártha le fuaim stoic agus adhairce don Tiarna, ár Rí.

⁷ Bíodh an mhuir agus a bhfuil inti ag búiríl, an domhan agus a maireann ann.

⁸ Bíodh na haibhneacha ag bualadh a mbos; déanadh na sléibhte sult,

⁹ i bhfianaise an Tiarna atá ag teacht a rialú na cruinne. Déanfaidh sé an domhan a rialú go cóir, agus na ciníocha go cothrom.