Salm 93 - An Bíobla Naofa 1981

Tá an Tiarna i Réim

¹ Tá an Tiarna ina rí is é gléasta le glóir; chlúdaigh sé é féin le neart; chrioslaigh sé é féin le cumhacht. Bhunaigh sé an domhan go dobhogtha.

² Tá do chathaoir arna daingniú ó na cianta; tá tú ann ón tsíoraíocht, a Thiarna.

³ Thóg na tuilte a nglór, a Thiarna; thóg na tuilte a nglór go torannach; thógadar a nglór go tolgach tréan.

⁴ Is cumhachtaí ná glór na n‑iluiscí, ná tonnta na mara móire, an Tiarna os a gcionn in airde.

⁵ Is dearfa go deimhin do reachtanna; is do do theachsa is cuí an naofacht, a Thiarna, go brách na breithe.