Salm 90 - An Bíobla Naofa 1981

An Ceathrú Leabhar Síoraíocht Dé agus Díomuaine an Duine

1 Achainí Mhaois, giolla Dé.

¹ Achainí Mhaois, giolla Dé. 1 A Thiarna, is tú ba thearmann dúinn, ár ndídean ó ghlúin go glúin.

² Ó thosach sular saolaíodh na sléibhte, sular rugadh an talamh agus an chruinne, is tú Dia gan tús gan deireadh.

³ Déanann tú deannach arís den duine á rá: “Ar ais libh, a Ádhamhchlann.”

⁴ Óir níl míle bliain i d'fhianaise ach mar an lá a d'imigh tharainn inné, nó mar a bheadh faire na hoíche.

⁵ Sciobann tú chun siúil iad amhail aisling, nó mar fhéar úrghlas na maidine.

⁶ Eascraíonn sé ar maidin agus bláthaíonn sé baintear é agus feonn sé um thráthnóna.

⁷ Táimid dár gcnaí go dearfa le d'fhearg; scanraítear sinn le dásacht do dhíbheirge.

⁸ Chuir tú ár n‑urchóidí os do choinne, ár bpeacaí folaithe faoi sholas do ghnúise.

⁹ Gabhann ár laethanta tharainn is tú i bhfeirg linn; cuirtear deireadh lenár mblianta amhail osna.

¹⁰ Seachtó bliain suim ár saolré; nó ceithre fichid má fhaighimid ár sláinte. Saothar agus stró a sealsan; imíonn siad ar luas agus bíonn deireadh linn.

¹¹ Cé a chuimhníonn ar chumhacht do chuid feirge; cé a mbíonn eagla air roimh neart do bhuile?

¹² Múin dúinn giorra shaoil an duine chun go bhfaighimid críonnacht inár gcroí.

¹³ Fill orainn; cá fhad a bheidh tú feargach? Déan trócaire ar do shearbhóntaí, a Thiarna.

¹⁴ Tabhair ár sáith de do bhuanghrá ar maidin dúinn, go mbeidh áthas orainn agus gairdeas go deo.

¹⁵ Déan lúcháireach sinn i ndíol ar imir tú de bhuairt orainn; i ndíol na mblianta ina bhfacamar an t‑olc.

¹⁶ Taispeáin do bhearta do do sheirbhísigh; agus do chlú is do chumhacht do do chlann.

¹⁷ Go dtaga grásta ár dTiarna Dia anuas orainn agus go soirbhí tú saothar ár lámh; sea, go soirbhí tú saothar ár lámh!