Salm 89 - An Bíobla Naofa 1981

Turnamh Theaghlach Dháiví

¹ Mascil Ethan an dúchasach.

² Canfaidh mé de shíor faoi do bhuanghrá, a Thiarna; fógróidh mé do dhílseacht ó ghlúin go glúin.

³ Óir is deimhin gur daingníodh do bhuanghrá go brách, agus shocraigh tú do dhílseacht chomh buan le neamh.

⁴ “Cheangail mé conradh,” [a dúirt tú,] “leis an té a roghnaigh mé; dhearbhaigh mé do Dháiví mo sheirbhíseach:

⁵ ‘Socróidh mé do shliocht go brách, agus bunóidh mé do ríchathaoir go deo.’ ”

⁶ Foilsíonn na flaithis do mhíorúiltí, a Thiarna; tá d'fhírinne á moladh ag comhthionól na naomh.

⁷ Óir cé is cosúil leis an Tiarna sna néalta, cé atá inchurtha le Dia ar shlua na bhflaitheas?

⁸ Is uafásach é Dia i gcomhchomhairle na naomh; is éachtach é agus is uamhnach thar a bhfuil ina thimpeall.

⁹ A Thiarna Dia na slua, cé is comhionann leat? Is cumhachtach tú, a Thiarna, agus do dhílseacht de gach leith díot.

¹⁰ Is agatsa atá ceannas ar fhraoch na farraige; is tú a chuireann cosc le tulca na dtonnta.

¹¹ Bhuail tú cos ar Ráhab go ndearna tú bloghanna de; agus scaip tú d'eascairde le do chuisle chumhachtach.

¹² Is leat na flaithis, is leat an talamh; is tú a bhunaigh an domhan agus a bhfuil ann.

¹³ Is tú a chruthaigh an tuaisceart is an deisceart; molann Tábór agus Hearmón d'ainm le corp áthais.

¹⁴ Is cumasach an chuisle atá agat, a Thiarna, is daingean do lámh, agus do dheaslámh crochta.

¹⁵ Cóir agus ceart atá mar bhonn do do ríchathaoir; gabhann buanghrá agus dílseacht romhat amach.

¹⁶ Is aoibhinn don phobal arb eol dóibh an gháir áthais; siúlann siad faoi sholas do ghnúise, a Thiarna.

¹⁷ Déanann siad gairdeas i d'ainm feadh an lae; agus déantar a móradh as ucht d'fhíréantachta.

¹⁸ Is tú, a Thiarna, dealramh a gcumhachta; agus is trí do chaoinchineáltas a ardaítear ár neart.

¹⁹ Óir is é an Tiarna is sciath dár gcosaint; agus is é Neach Naofa Iosrael is rí orainn.

²⁰ Labhair tú tráth i bhfís á rá le do chairde naofa “Thug mé cabhair do ghaiscíoch; d'ardaigh mé fear tofa den phobal.

²¹ Fuair mé Dáiví, mo ghiolla; rinne mé a ungadh le m'ola naofa

²² d'fhonn go mbeadh mo lámh leis de shíor; agus go mbeadh mo chuisle ag neartú leis.

²³ Ní mheallfaidh an namhaid go brách é, ná ní dhéanfaidh an t‑urchóideach foréigean air,

²⁴ ach treascróidh mé a naimhde ina láthair; agus buailfidh mé lucht a fhuatha.

²⁵ Beidh mo dhílse agus mo chineáltas ina fhochair; agus is i m'ainmse a ardófar a neart.

²⁶ Leathfaidh mé a lámh os cionn na mara agus a dheaslámh os cionn na n‑aibhneacha.

²⁷ Glaofaidh sé orm: ‘Is tú m'athair; is tú mo Dhia agus carraig mo shlánaithe.’

²⁸ Ceapfaidh mé ina chéadghin mic é; an té is airde i measc ríthe na cruinne.

²⁹ Coinneoidh mé mo chineáltas go deo dó; agus seasfaidh mo chonradh go daingean leis.

³⁰ Socróidh mé a shliocht go síoraí agus a ríchathaoir mar laethanta na bhflaitheas.

³¹ Má thréigeann a chlann mhac mo dhlí, mura siúlann siad de réir mo phroiceaptaí,

³² más amhlaidh a sháraíonn siad m'fhorálacha, nó más amhlaidh a bhriseann siad m'aitheanta,

³³ agróidh mé a gcion orthu leis an tslat; agus agróidh mé a gcoir orthu leis an lasc,

³⁴ ach ní bhainfidh mé mo bhuanghrá de go deo; ná ní rachaidh mé siar ar mo bhriathar.

³⁵ Ní bhrisfidh mé mo chor ná mo cheangal; ná ní bhréagnóidh mé briathar mo bhéil.

³⁶ Aon uair amháin a mhionnaigh mé; dar mo naofacht, nach ndéanfainn bréag le Dáiví.

³⁷ Mairfidh a shliocht go brách; beidh a chathaoir mar an ngrian i m'fhianaise;

³⁸ mairfidh sí go buan mar an ngealach, ina finné fíordhílis ar neamh.” Selah

³⁹ Ach theilg tú uait le déistin is le corp feirge an té a d'ung tú féin.

⁴⁰ Bhris tú do chonradh le do ghiolla; agus thruailligh tú a choróin sa deannach.

⁴¹ Leag tú a mhúrtha go léir; agus d'fhág tú a dhún ina fhothrach.

⁴² Creachann a ngabhann an tslí é ionas go bhfuil sé ina chúis aithise dá chomharsana.

⁴³ D'ardaigh tú deaslámh a naimhde; chuir tú áthas ar a eascairde go léir.

⁴⁴ Mhaolaigh tú faobhar a chlaímh; is níor thug tú an bua dó sa chath.

⁴⁵ Chuir tú cosc lena ghlóir-réim; leag tú a ríchathaoir ar lár.

⁴⁶ Ghiorraigh tú laethanta a óige; agus d'fhág tú faoi náire shaolta é.

⁴⁷ Cá fhad, a Thiarna, a bheidh tú i bhfolach - an go brách é? Cá fhad a bheidh do dhíbheirg ag bladhmadh mar thine?

⁴⁸ Cuimhnigh, a Thiarna, ar a ghiorracht atá mo shaol; an amhlaidh a chruthaigh tú an Ádhamchlann in aistear?

⁴⁹ Cé hé an duine beo nach bhfeicfidh an bás, nó cé a thabharfaidh a anam ó chumhacht na huaighe?

⁵⁰ Cá bhfuil do chomaoineacha cianaosta, a Thiarna a mhionnaigh tú do Dháiví dar brí do dhílseachta?

⁵¹ Cuimhnigh, a Thiarna, ar an aithis a casadh le do sheirbhísigh; agus mar a iompraím i mo bhrollach maslaí uile na gciníocha -

⁵² na maslaí lena maslaíonn do naimhde mé a Thiarna, lena dtugann siad tarcaisne do chomharba do ungthaigh. 52 Moladh go deo leis an Tiarna; Amen agus Amen!