Salm 88 - An Bíobla Naofa 1981

Faoi Bhráca an Bhróin

¹ Amhrán: Salm de chuid chlann Chorach. Don stiúrthóir. Leis an bhfonn “Mahalat”. Mascil Heman an dúchasach.

² A Thiarna Dia, bím ag éamh ort de lá; bím ag caoineadh istoíche os do chomhair.

³ Go dtaga mo ghuí ag triall ort; claon do chluas chun mo ghlóir.

⁴ Óir tá m'anam lánualaithe le buarthaí; tá mo bheatha ag druidim leis an uaigh.

⁵ Áirítear mé ar an drong a ghabhann sa pholl; agus ráinig mé mar neach gan neart;

⁶ mar dhuine ina aonar i measc na marbh, amhail an t‑ár ina luí san uaigh, atá imithe as do chuimhne go brách, agus atá scartha le do chúram caomhnaitheach.

⁷ Chuir tú go domhain san uachais mé, in íochtar an duibheagáin dhorcha.

⁸ Luíonn do dhíbheirg go trom orm; tá mé báite faoi do thonnta go léir.

⁹ Chuir tú mo chairde i bhfad uaim; thug tú orthu déistin a ghlacadh liom. Táim faoi ghlas is ní féidir liom éalú;

¹⁰ tá mo shúile ag meirtniú le téann buartha. Bím ag éamh ort gach aon lá, a Thiarna; is chugat a shínim mo lámha.

¹¹ An ndéanfaidh tú éachtaí do na mairbh? an éireoidh na neamhbheo do do mholadh?

¹² An bhfógrófar do ghrá san uaigh, nó do dhílseacht i measc na marbh?

¹³ An bhfoilseofar d'éachtaí sa dorchacht; agus d'fhíréantacht i dtír na díchuimhne?

¹⁴ Is ort a bhím ag éamh, a Thiarna, is chugat a thagann m'urnaí ar maidin.

¹⁵ Cad chuige duit m'anam a ruaigeadh? cad fáth a bhfolaíonn tú d'aghaidh orm?

¹⁶ Tá mé i m'ainniseoir, i riocht bháis ó m'óige; scanraigh mé romhat gur traochadh mo neart.

¹⁷ Tháinig do dhíbheirg orm anuas, agus rinne do sceimhle mo scriosadh.

¹⁸ Bíonn siad i mo thimpeall de shíor amhail tuile; tagann siad uile i mo thimpeall in éineacht.

¹⁹ Sciob tú uaim mo chara agus mo chomharsa; is í an dorchacht mo chompánachsa feasta.